Read Goan Konkani Mk 13 Bible Online

Mk 13 - Goan Konkani bible

Mk 13

¹Ani To Devmondirantlo bhair sorun vetastanam, Tacheam xisantleam eklean Taka mhonn’lem: “Guruji, kede vhoddle fator polle ani kedeô bandavolli!”

²Zap diun Jezun taka mhonn’lem: “Heô vhoddleô bandavolli tum polletai nhoi? Tancho ek tori fatrar fatôr urcho na, sogllem ghorttann zatelem!”

³Ani Olivet Dongrar, Devmondira samkar To bosun astana, Pedrun, Jakoban, Juanvan ani Andren Tachê lagim vicharlem:

⁴“Hem kedna ghòddtelem tem amkam sang. Ani heam soglleam ghòddnneancho vêll pavlo mhonn ollkhunk kosli khunna?”

⁵Ani portipallun Jezu tankam oxem sangunk laglo: “Mhojem nanv gheun, ‘apunnuch to’ mhonnun, sobar zann ietele ani zaiteank fottoitele dekhun.Tumkam konnem fottoinam zaunk chotraien ravat;

⁷Laginch cholteleam loddaiancho gollbôll tumi aikotat tedna ani pois pettleleam zhuzanchi khobor tumkam pavta tedna, tumi akantum nakat; hem oxem ghoddonk zai, toripunn ho ozun xevôtt nhoi.

⁸Kiteak dês desacher ani raj rajeacher uprastelim, ani hanga-thõi bhikamp zateli ani dukôll poddtolo. Hem sogllem porsuttvenninchi survat.

⁹Tumi aple xidduk ravat. Tumkam dhormsobhent dhorun ditelim ani devsthanamnim tumkam boddoitelim. Mhojê pasot razpalanchea ani razanchea fuddeant, tumi tankam govai diunchê khatir, tumkam ube ravchem poddtelem.

¹⁰Xevotta adim soglleam raxttrank xubhvhortoman porgott zaunk zai.

¹¹Ani dhorun diunk tumkam vhortat tedna, kitem ulounchem tê vixim adim-fuddem huskeum nakat; punn uloitele te tumi nhoi, punn Povitr Atmo To dekhun, tê ghoddier Dev tumkam ditolo, tench sangat.

¹²Jivexim marunk bhav bhavak ani bapui putak dhorun ditolo; put-dhuvô avoi-bapaicher kolpun tancho prann kaddunk laitelim.

¹³Mhojea nanva pasot sogllim tumcho dvês kortelim; punn xevottak porian thir ravtit tankam Dev taronn ditolo.

¹⁴‘Soteanasacho Kanttallo’,[8] taka favonaslelea zagear ubo aslolo tumi polletelim (vachtat tãnnim hem somzunchem). Tedna Judeiant asleleamnim dongrancher pollun vechem;

¹⁵Aplea ghorantlem kitench vhorunk, pattsar asleleamnim sokla denvchem nhoi vo bhitôr sorchem nhoi;

¹⁶xetam-molleamnim asleleamnim aplem avoronn vhorunk porot ieunchem nhoi.

¹⁷Te dis ietôch gorbest bailanchem ani dud diteleanchem kotta!

¹⁸Hinvalleant hem zaina zaunk magat.

¹⁹Devan sonvsar rochla tê meren az porian zaunk na ani hea fuddem zauncho na toslo sontap team disamnim ietolo.

²⁰Ani Sorvesporan te dis unne korunk nasle zalear konnuch vattavonchim naslim, punn Apnnem vinchun kaddleleam khatir Tannem te unne keleat.

²¹Tedna ‘Polle, Krist hanga asa’ vô ‘Polle, To thõi asa’ , oxem konn-ui tumkam sangtit zalear, tumi tem sotmaninakat;

²²kiteak lobadde Krist ani lobadde provadi uprastele ani, zata zalear, vinchun kaddleleank porian fosounk puro tosleô khunna ani ochoriam korun dakhoitele.

²³Mhonntôch chotrai dhôrat, Hanvem tôr tumkam sogllem adinch sangun dovorlam.

²⁴Punn team disamnim, to sontap ietôch, suriacher kallôk poddtolo ani chondrim’ aplo uzvadd diuncho na,

²⁵ani noketram mollba velim khala poddtelim ani ontralla veleô xokti kolkolteleô.

²⁶Ani tedna sogllê podven ani dobajean kupancher ieto Mon’xachea Putak lok dekhtolo.

²⁷Ani tedna To Apleam dutank dhaddun char-ui dixam veleam, prithumecheam ximam thaun ontrallacheam ximam porian asteleam, Apnnem vinchleleank zomoitolo.

²⁸Anjirachea zhaddachi hi vopar somzun gheiat. Tacheô khandiô rosbhorit zatat ani tankam panam futt’tat tedna, gim’ lagim pavla mhonn tumkam kollon ieta;

²⁹têch porim heô vostu ghòddtat mhonn polleun To lagim pavla, darachea umbrear asa mhonn zanno zaiat.

³⁰Hanv tumkam khoreponnim sangtam: hem sogllem ghòddlea bogor hi pinddka ontorchi na.

³¹Sôrg ani prithum’ sortelim, punn Mhojim utram kedinch sorchim nant.

³²Punn ekleach Bapak kaddun, anink konnakuch, sorgincheam dutank vô Putak legun, tea disachi vô ghoddiechi khobor na.

³³To vêll kedna pavtolo to, tumi nokllot dekhun, chotrai dhôrat, zagrut ravat.

³⁴Ek-ekleak ap-aplea vauran, apleam chakrank adhikari diun ani dar-rakhnneak rakhonn korunk laun, aplea ghorantlo bhair sorun ek provas korunk veto konn-eklea mon’xa porim to.

³⁵Hea pasot, ghoracho Dhoni kedna ietolo, tin’sanam, modeanir, kombea-sadar, ki fantea-parar, tem tumi nokllot dekhun zagrut tavat;

³⁶na zalear, To ovchituch pavot ani tumi Taka nhidlelim mellxeat.

³⁷Tumkam sangtam tem soglleank sangtam: zagrut ravat.”