Read Goan Konkani Mk 14 Bible Online

Mk 14 - Goan Konkani bible

Mk 14

¹Don disamnim Paskanchi ani Fug-nasleleam Unddeanchi porob zaunchi asli; ani mukhel iadnik ani dhormxastri Jezuk koso abghatan dhôrcho ani jivexim marcho tem sôdtale.

²Tôr te mhonnot: “He porbe-somoim nhoi, na zalear lokachi uchambollai bi zait.”

³Jezu Betanient Simanv koddkarachea ghorant jevnnak boslolo astana, êk bail unch molachem osôl zottamanxechem pormollit tel eka chondrokanti aidonant gheun aili ani aidon foddun tinnem tem tel Tachea mathear ôtlem.

⁴Thõi asleleam kãi zannamnim apnnam modem tiddun mhonn’lem: “Kiteak mhonn hea telacho ibadd?

⁵Tôr oslem tel tin’xeam voir dinarank vikunk ani duddu goribank diunk zatem.” Ani tika tannim bexttaili.

⁶Punn Jezun mhonn’lem: “Korum-di tika; tika tumi kiteak tras ditat? Tinnem Mhojê sorim êk bori kornni keli.

⁷Gorib lôk tumchê modem sodankal asach, ani tumkam zai tedna tumchean tankam borem korunk zata; punn Hanv sodanch tumchea sangata ascho nam.

⁸Tichê kodde korunk zatalem tem tinnem kelem; adim-fuddem Mhoji kudd tinnem nikhipinnek makhli.

⁹Khorench tumkam sangtam, akhea sonvsarak hem xubhvhortoman porgott zait titleam-i svatanr jem hinnem kelam tem-i tichea ugddasak porgott zatelem.”

¹⁰Tedna barantlo eklo, Judas Iskariot, Jezuk mukhel iadnikanchea hatant ghalunk tanchê- xim gelo.

¹¹Tachem aikun tankam sontôs bhòglo ani taka duddu diunk te kobul zale. Mhonntoch, Taka tanchea hatant ghalunk êk boro soêg to sôdunk laglo.

¹²Fug-nasleleam Unddeanchea poilea disa, Paskacho menddro martat tedna, Jezucheam xisamnim Taka mhonn’lem: “Tujem Pask-Jevonn korunk khõi vochun ami toiar kel’lem Tuka zai?”

¹³;Mhonntoch “Xarant vochat ani udkacho kollso khandar marun veto tumkam êk monis melltolo; tachê pattlean vochat

¹⁴ani ‘Mhojeam xisam borabôr Hanvem Pask-Jevonn korunk Mhaka divpacho vosro khõi asa?’, oxem, to bhitôr sorta tea ghorachea dhoniak vicharat.

¹⁵Ani to tumkam mallier, jevnnak borê bhaxen manddlolo êk vhoddlo vosro dakhoitolo; thõi amkam toiar korat.”, oxem sangun, Tannem Apleam xisantleam dogank dhaddle.

¹⁶Xis bhair sorun, Xarant gele ani Jezun sanglelem toxench tankam mell’lem ani tãnnim Pask-Jevnnachi toiari keli.

¹⁷Sanz zatôch, barank gheun Jezu ailo,

¹⁸ani “Mhojê borabôr jevta to, tumchê bhitorlo eklo, Mhozo ghat ghetolo mhonn Hanv tumkam khorench sangtam.”, oxem ap-aplea zagear bosun te jevtana, Jezun mhonn’lem.

¹⁹Te bhov khontibhorit zaunk lagle ani “Hanv Ga to?”, oxem eka pattlean dusro Taka vicharunk lagle.

²⁰“Mhojê borabôr tattant unddo buddoita to, barantlo eklo to.

²¹Apna vixim boroil’lem asa tea pormannem, Mon’xacho Put xevottak veta khoro; punn zo monis Mon’xachea Putacho ghat gheta, tachem kotta! Zolmunkuch naslo zalear tea mon’xak odik borem zatem.”, oxem Tannem tankam sanglem.

²²Ani tanchem jevonn cholta astana, Jezun unddo hatant ghetlo, Devak dhin’vasun to môddlo ani to tankam dilo ani mhonn’lem: “Gheiat, hi Mhoji kudd.”

²³Magir patr ghetlem ani Devak dhin’vasun tem tankam dilem ani soglle tantlem piele.

²⁴“somest mon’xam pasot, varoilam tem, hea Korarachem Mhojem rogot hem.

²⁵Devachea Rajeant Hanv novo soro piein porian, hea fuddem ho soro Hanv anink pieuncho na mhonn Hanv tumkam khorech sangtam.”, oxem Tannem tankam mhonn’lem.

²⁶Ani stotram gailea uprant, Olivetchea Dongrar vochunk te bhair sorle.

²⁷“ ‘Hanv gonvlleak jivexim martolom ani xellianchi duspôtt zateli’, oxem Povitr Pustokar oxem boroilelem asa dekhun tumi soglle Mhaka soddun vetelet.

²⁸punn Devan Mhaka punorjivont kortôch, Hanv tumche adim Galileiant vetolom.”, oxem Jezun tankam sanglem tedna,

²⁹“Sogllech porian Tuka soddun gele zalear, hanv kednanch Tuka sôddcho na!”, ho Pedrun Taka zabab dilo.

³⁰Jezun taka sanglem: “Az, aichêch rati, kombean don pavtti sad ghalchê adim, tin pavtti tum Mhaka ollkhonãi mhonn sangtoloi mhonn Hanv tuka sot sangtam.”

³¹Punn tannem odikuch bhasun mhonn’lem: “Tujê borabôr mhaka morunk legun poddlem zalear, hanv Tuka ollkonam mhonn sangchonam!” Heram soglleamnim toxench mhonn’lem.

³²Getsemani mhonnlelea molleant te pavle. Jezun Apleam xisank mhonn’lem: “Hanvem magnnem korin porian tumi hanga bosat.”

³³Ani Pedruk, Jakobak ani Juanvak Apnna borabôr vhorun, To thorthorunk ani middmiddunk laglo.

³⁴Ani Tannem tankam sanglem: “Morunk pasun puro titlê khontin Hanv buddlam; hangach ravon zagronn korat.”

³⁵Ani matso fuddem vochun To dhornnir poddlo ani zata zalear, ho vêll Apnna velo pois vochum mhonn Tannem magnnem kelem.

³⁶Tannem mhonn’lem: “Ab’ba, Bapa Mhojea, Tujean kitem-i korunk zata; hem patr Mhojê thaun pois kadd; toripunn Mhaka zai toxem nhoi, Tuka zai toxem zaum-di.”

³⁷Ani portun ieilo ani te Taka nhidlele mell’le. Tedna Tannem Pedruk mhonn’lem: “Simanv, tum nhidlai? Êk tas-bhôr tujean zago ravunk zalem na mum?

³⁸Tumi tallnnent poddona zaunk zage ravat ani magnnem korat; otmo raji asa khoro, punn kudd osokt.”

³⁹Ani novean vochun, tinch utram mhonnun Tannem magnnem kelem.

⁴⁰Porot ieun te Taka nhidlele mell’le; tanche dolle jemen zodd zal’le ani Taka koxi zap diunchi ti te nokllo asle.

⁴¹Ani Tannem tisrê pavtt ieun tankam mhonn’lem: “Ozun nhidun, visôv ghetat tumi? Puro atam. Vêll pavlo. Polleiat, Mon’xachea Putak patkeanchea hatant ghala.

⁴²Utthat, chol ia ami. Mhaka poradhin korpi to lagim asa.”

⁴³Oxem uloita astananch Judas, barantlo eklo, thõi pavlo ani tachê sangatim torvari ani tonnke gheun, mukhel iadnikamnim, dhormxastriamnim ani zannteamnim dhaddlolo lokacho êk zomo aslo.

⁴⁴Taka poradhin korpean tankam oxem mhonnun khunna dil’li: “Hanv umo ghetolom to eklo monis, toch to; taka dhôrun rakhonddara khal vhorat.”

⁴⁵Ani iena fuddem, rokddoch Judas Jezu sorxem gelo “Rab’bi!” (mhonngê “Guruji!”), mhonnun Taka umo dilo.

⁴⁶Ani tãnnim Tachea angar hat ghalun Taka dhôrlo;

⁴⁷tedna Tachê borabôr asleleantlea eklean torvar kaddun porom’-iadnikachea chakracher marun tacho kanuch katorlo.

⁴⁸Jezun tankam mhonn’lem: “Hanv ek pundd zal’lea porim torvari ani tonnke gheun tumi Mhaka dhorunk aileat kitem?

⁴⁹Dispotto Devmondirant xikovnn diun tumchê modem Hanv aslom tedna, tumi Mhaka dhôrunk na. Punn Povitr Pustokachim utram pallon ieunk zai.”

⁵⁰Tea vellar soglle xis Taka sanddun pollun gele.

⁵¹Konn-êk tornnatto, aplem ang fokot êkê olin pangrun, Tachê pattlean vetalo; tãnnim Taka dhôrlo,

⁵²punn tanchea hatant ôl soddun diun, to vinglloch pollun gelo.

⁵³Ani Jezuk porom’-iadnika mukhar haddlo; ani soglle mukhel iadnik, zannte ani dhormxastri thõi ektthovle.

⁵⁴Pedru pois thaun Tachê pattlean cholun porom’-iadnikachea razangnnant bhitôr porian gelo, ani rakhonddaram borabôr dhogtteak bosun xektalo.

⁵⁵Mukhel iadnik ani akhi Mha-Dhormsobha, Jezuk mornnachem formonn diunchê khatir, Tacher firiad korunk konn-ui aropi melltit gai mhonn sôdtale, punn tankam konnuch mellunk na.

⁵⁶Khorem mhonn’llear, sobar zann Tacher add lottik firiad ditale, punn tancheô firiadi ekamekak zomonasleô.

⁵⁷Ani kãi zann utthun Tacher oxem boglantt ghaltale:

⁵⁸“Mon’xancheam hatamnim bandlelem hem Devmondir hanv môddtolom, ani mon’xancheam hatamnim bandunk naslelem dusrem ek tin disam bhitôr bandtolom’, oxem tannem sanglelem ami aikolam.”

⁵⁹Punn hê-i babtint tanchê firiadichi govaiki zomonasli.

⁶⁰Tedna tanche samkar ubo ravun “Kãich zap dinãi? He tujer add hi firiad ditat tem kitem?”, oxem porom’-iadnikan Jezu kodde vicharlem.

⁶¹Jezu ogoch ravlo ani Tannem zap kaddli na. “Subhagi Devacho Put To, krist To Tum?”, oxem novean porom’-iadnikan Tachê lagim vicharlem.

⁶²Jezun taka sanglem: “Hôi, Hanvunch to! Ani dev-podvechea uzvea hatak boslolo ani sorginchea kupancher ieto Mon’xachea Putak tumi dekhtelet.”

⁶³Tedna aplim vostram pinzun porom’-iadnikan mhonn’lem: “Anink sakxidaranchi amkam kosli goroz?

⁶⁴Tuminch devninda aikolea. Tôr tumkam kitem dista?” Moronn favo aslea porim, soglleamnim Tacher formonn marlem.

⁶⁵Tedna ‘Bhakit kor!’, oxem mhonnun, kãi zann Tacher thimpi uddounk lagle, ani, Tachem tondd dhampunk laglim, Tacher thapttam marunk laglim. Ani rakhonddaramnim-i Taka vhorun mar dilo.

⁶⁶Pedru sokla razangnnant astana, porom’-iadnikachi konn-ekli chakornn aili,

⁶⁷ani dhogtteak boslelea Pedruk dekhonam fuddem, taka boro korun polleun tinnem mhonn’lem: “Tum-i Nazaretkar Jezu borabôr astaloi!”

⁶⁸Punn na mhonnun tannem sanglem: “Tum kitem mhonntai tem hanv nokllom; hanv tem somzo-i na.” Ani thõicho koddsorun to fuddlea angnnant bhair sorun gelo. [Tedna kombean sad ghalo.][9]

⁶⁹Taka novean polleun ti chakornn thõi bhonvtim asleleank mhonnunk lagli: “Ho monis tache bhitorlo eklo!”

⁷⁰Punn tannem novean na mhonn’lem. Ani matxea vogtan thõi asleleamnim novean Pedruk mhonn’lem: “Dubhava vinnem tum-i tanchê bhitorlo eklo; tum-i Galileikar mum rê!”

⁷¹Punn to apnnacher xirap ghalunk ani soput gheun mhonnunk laglo: “Tumi sangtat tea mon’xak hanv ollkhoch na!”

⁷²Tedna rokddoch kombean dusrê pavtt sad ghalo; ani Jezun sanglelea hea utracho Pedruk ugddas ailo: “Kombean don pavtti sad ghalchê adim tin pavtti tum Mhaka ollkhonãi mhonn sangtoloi.” Ani to dukhamnim roddunk laglo.