Read Goan Konkani Mk 15 Bible Online

Mk 15 - Goan Konkani bible

Mk 15

¹Ani sokallim fuddem mukhel iadnikamnim zannteam, xastream, ani akhê Mha-Dhormsobhê borabôr bhasabhas korun aplo tharav ghetlo: tãnnim Jezuk bandlo ani Taka vhorun Pilatachea hatant ghalo.

²Pilatan Tachê lagim vicharlem: “Judevancho raza tum?” Ani Jezun taka zap diun mhonn’lem: “Tum sangtai toxem.”

³Mukhel iadnik jinsovar garannim Tacher ghaltale.

⁴Pilatan Tachê lagim portun vicharlem: “Tum kãich zobab dinãi? Kitlim garannim, polle, tujer ghaltat te!”

⁵Punn Jezun anink zap kaddli na mhonn Pilatak ojap dislem.

⁶Porbechê somoim,lôk magit tea khõichea-i eka koideak, suttka diunchi chal asli.

⁷Tedna bonddaient khun kel’leam fituram modem Barab’bas nanvacho êk monis bondkhonnint aslo.

⁸Lokacho êk zomo voir choddun gelo ani sodanchê chali pormannem Pilat kortalo tench, apnnam khatir kôr mhonn tache kodde to lok magunk laglo.

⁹Ani Pilatan zap diun mhonn’lem: “Judevanchea razak hanvem suttka dil’li tumkam zai?”

¹⁰Mukhel iadnikamnim Taka nattkaien dhorun dila mhonn to tôr borem zanno aslo.

¹¹Punn te bodlek, mukhel iadnikamnim uchambollai korun, tannim Barab’basak soddunk, taka lailo.

¹²Tedna Pilatan novean zap diun tankam mhonn,lem: “Toxem zalear, tumi Judevancho raza mhonntat taka hanvem kitem korchem?”

¹³Tãnnim novean huiêl marli: “Taka khursar mar!”

¹⁴Torui Pilatan tankam mhonn’lem: “Tôr tannem kitem vaitt kelam?” Punn tim odik vhoddlean huiêl marunk laglim: “Taka khursar mar!”

¹⁵Mhonntôch lokak khuxi korunk sôdtalo dekhun, tãnnim maglelem toxem, Pilatan Barab’basak suttka dili ani Jezuk jerbond diun khursar marunk tanchê svadhin kelo.

¹⁶Tedna soinikamnim Taka nitixallechea razangnnant vhelo ani akhi polttônn zomoili.

¹⁷Taka ek zambllem avoronn ghalem ani, kantteancho êk mukutt vinnun, to Tachea mathear ghalo.

¹⁸Ani te Taka oso noman korunk lagle: “Noman tuka, Judevanchea raza!”

¹⁹Ani êk boddi gheun Tachê tokler martale, Tacher thimpi uddoitale ani dimbi moddun Taka nomoskar kortale.

²⁰Tachim khebaddam kelea uprant, zambllem avoronn kaddun, tãnnim novean Taka Tachim khaxa angavlim ghalim, ani Taka khursar marunk te Taka gheun gele.

²¹Konn-eklo Ciren’kar Simanv, Aleksandracho ani Rufusacho bapui, gramantlo ieun tê vatten vetalo; taka tãnnim Jezucho khuris vhorunk vettik dhôrlo.

²²Ani Golgota zagear (mhonngê Kortteachea zagear) Taka vhelo.

²³Ani tannim gondhrôsan misoll’lolo soro Taka dilo, punn Tannem to gheunk na.

²⁴Taka khursar marlea uprant, konnak kitem vhorchem tem tharaunk, sorti ghalun, tannim apnnam modem Tachim vostram vanttlim.

²⁵Taka khursar marlo tedna sumar donparcho vêll zal’lo.

²⁶Tacher add garanneacho namlekh oso boroun ghal’lo aslo: “Judevancho Raza Ho”.

²⁷Ani Tachê borabôr dogam punddank khursar marle, ekak Tachea uzvean ani dusreak davean.[10]

²⁸

²⁹Te vatten pasar zaun ieto-veto lôk apli tokli haloit ani “Devmondir moddcho asloi ani tin disamnim bandcho asloi To tum. khursa velo denv ani Tuzoch jiv vanchoi atam. Aha...ha!”, oxem mhonnit Tacheô kenddnneô kortalo.

³⁰

³¹Têch porim, borabor mellon, ani “Hannem herank soddoilim khõi, atam tachean apnnakuch soddounk zainam mum rê! Ami polleun tacher bhavart dovorchê khatir, Hea Krista, Israelacho razak atam khursa velo denvum-di!”, oxem mhonnit xastream borabôr mukhel iadnik ekameka lagim uloun Tachim khebaddam kortale. Tachê borabôr khursar marlole te-i Tacheô kexttaiô kortale.

³²

³³Don’par zatôch tin vazo porian sogllea desacher kallôk poddlo;

³⁴ani sumar tin vaztam “Eloi, Eloi, lama sabakhtani,” mhonngê, “Deva Mhojea, Deva Mhojea, kiteak Tunvem Mhaka sanddloi?”, oxem Jezun vhoddlea tallean mhonn’lem.

³⁵Hem aikun,”Ho Elijak apoita!”, oxem thõi ube asleleam kãi zannamnim mhonn’lem.

³⁶Konn-eklo dhanvun gelo ani xirkeant alombem buddoun kaddun ani êkê boddiek lavun “Ravat, Elija taka denvounk ieta zalear polleum-ia.”, oxem mhonnun Taka pieunk diunk laglo.

³⁷Tedna vhoddlean arddun, Jezun prann sôddlo.

³⁸Devmondirantlea Gabhareacho podd’do voir thaun sokol doxim fanttlo.

³⁹Tannem oso prann sôddlo mhonn polleun, “Ho monis khoreponnim Devacho Put aslo.”, oxem Tachea samkar aslo tea xotpotin mhonn’lem.

⁴⁰Kãi bailô-i pois ravun polletaleô; tanchê bhitôr Magdalachi Maria, dhakttea Jakobachi ani Joxechi avoi Maria, ani Salome.

⁴¹To Galileiant astanam Tacho pattlav korun, teô Tachi seva kortaleô. Tea bhair Tachê sangatim Jeruzaleak choddun ail’leô sobar dusreô bailô.

⁴²Sanz zalea uprant, Arimateiacho Juze ailo; to Mha-Dhormsobhecho êk xrêxtt vangddi aslo ani Devachea Rajeachi vatt polletalo. To Toiarecho Dis, mhonngê Sabhata adlo dis dekhun, dhir dhorun Pilata-xim vochun tannem Jezuchi kudd magli.

⁴³

⁴⁴Itlo vegim melo mhonn Pilatak ojap dislem ani, xotpotik apoun haddun, To morun thoddo vell pasar zala zalear tannem vicharun ghetlem.

⁴⁵Xotpoti koddchi sarki khobor ghetôch, Juzek tannem kudd vhorunk dili.

⁴⁶Juzen êk ôl vikti gheun haddli ani Taka denvoun, tê olin revddailo ani khoddpant khonnlelê êkê somadhint Taka dovorlo; magir êk fatôr lonvddun somadhichea tonddak laili.

⁴⁷Mari Magdalen ani Joxetachi avoi Maria Taka khõi dovortat tem polleun asleô.