Read Goan Konkani Mk 16 Bible Online

Mk 16 - Goan Konkani bible

Mk 16

¹Sabbath sorlea uprant, vochun Jezuchê kuddik lavunk, Mari Magdalen, Jakobachi avoi Maria ani Salome, hãnnim pormollit mosalo vikto gheun haddlo.

²Ani satolleachea poilea disa bhov sokallim, suria udetana, teô somadhi-xim aileô.

³Teô ekamekak mhonntaleô: “Somadhichea tondda veli fatôr konn amkam dhuklun ditolo?”

⁴Punn nodor mar zalear, ti fatôr, borich vhoddli asun-ui, dhukol’leli tãnnim dekhli.

⁵Somadhint bhitôr vochun, dhovem anglem neslolo êk tornnatto uzvean boslolo tãnnim dekhlo ani teô kampleô.

⁶Punn tannem mhonn’lem: “Bhiem nakat; khursar marlelea Nazaretkar Jezuk tumi sôdtat; Devan Taka punorjivont kelo; To hanga na. Taka dovorleli ti svat polleiat.

⁷Punn To tumchê adim Galileiak veta, ani Tannem sanglelea pormannem, tumi Taka thõi dekhtelet mhonn Tacheam xisank ani Pedruk sangat.

⁸Bhirantin borun ani ojab zaun te somadintlim bhair sorun, teô bailô pollun geleô; tancher bhõi ani kampero suttlolo dekhun tãnnim konnakuch kãi sangunk na.

⁹Satolleachea poilea disa, sokallim punorjivont zaun, Jezu poilo Mari Magdalenak dixtti poddlo; tichê vele Tannem sat devchar kaddlele.

¹⁰Tinnem vochun Tachê borabôr astalim ani atam dukh korun roddtalim tankam kollit kelem.

¹¹Punn To jivo asa ani tika dixtti poddla mhonn tãnnim aikun-ui sotmanunk na.

¹²Hachê uprant tanchê bhitorle dog zann eka ganvant cholun vetale; dusrem ek rup gheun To tankam dixtti poddlo.

¹³Tãnnim ieun herank sanglem, punn hanchem-i tãnnim sotmandunk na.

¹⁴Xekim, ikra zann jevtastana, tankam To dixtti poddlo. Apnnak punorjivont zal’lo dekhlolo tanchem tãnnim sotmanun ghetlem na dekhun, bhavart dhôrchê svater aplench khorem korun ravle mhonnun Tannem tankam bexttaile.

¹⁵Ani Tannem tankam sanglem: “Akhea sonvsarak vochat, sogllê rochnnek xubhvhortoman porgôttat.

¹⁶Bhavart dhôrtit ani batism ghetit tankam soddvônn mellteli; punn bhavart dhôrinam zatit tim khastichem formonn ghetelim.

¹⁷Bhavart dhôrteleam sovem heô khunna dixtti poddteleô: Mhojea Nanvan devchar kaddtelim, noveô bhasô uloitelim,

¹⁸sorop dhôrtelim, ani jiv kaddpachem kitem-i tim pietit bi, tankam tem vaitt zaunchem na, piddevontancher hat dovrun tim tankam borim kortelim.

¹⁹Ani Somia Jezun tanchê kodde uloun sompoitôch, Devan Taka voir sorgar ubarun vhelo ani thõi To Devachea uzveak bosla.

²⁰Xisamnim vochun sogllê kodden xubhvhortoman porgôttlem. Somi tanche borabor vaurun, ghodd’talim team vizmitam vorvim, tanchem utor sot mhonn thiraitalo.[11]