Read Goan Konkani Mk 2 Bible Online

Mk 2 - Goan Konkani bible

Mk 2

¹Thoddeam disamnim Jezu novean Kapernaumant ailo tedna, To ghora asa mhonn khobor zali,

²ani itlo lôk thõi ektthovlo, ki dara bhair porian tankam zago naslo. Ani Jezu tankam sondex ditalo.

³Tedna choug zann ar-zal’lea eka mon’xak uklun Tachê sorxem gheun aile.

⁴Punn tea lokak lagun tea mon’xak Tache-xim haddunk tanchean zainaslem dekhun, Jezu aslo tea zagea voilo pattôs tãnnim ugto kelo ani, oxi vatt korun, add poddlelea arkara soit tachem antrunn denvoilem.

⁵Tancho bhavart polleun Jezun arkarak mhonn’lem: “Puta, tujim patkam bhògsolim.”

⁶Tedna thõi bosun aslele kãi dhormxastri aplech bhitor oxem chintunk lagle:

⁷“Ho oxem uloita tem kitem? Devninda korta ho! Devak ekleakuch soddun, konnachean patkam bhogsunk zatat?”

⁸Te tanchê bhitôr oxem chint’tat mhonn Aplea otmeant rokddench umzun, Jezun tankam oxi zap dili: “Oslim chintnam tumchech bhitor kiteak gholloitat tumi?

⁹‘Tujim patkam bhògsolim!’, oxem mhonnunk, vô ‘tujem antrunn ukôl ani chol!’, oxem arkarak mhonnunk khoinchem odik sompem?

¹⁰Punn, sonvsarant patkam bhogsunk Mon’xachea Putak podvi asa mhonn tumchea monant rigounchê khatir”... Tannem arkarak mhonn’lem:

¹¹“Hanv tuka sangtam; utth, tujem antrunn ukôl ani tujea ghora voch.”

¹²To monis utthlo ani rokddoch aplem antrunn uklun soglleam hujir thõicho bhair sorun gelo. Hea pasot sogllo lôk ojap zalo ani “Oslem ami kednanch dekhlem na!”, oxem mhonnun tannim Devak vakhannlo.

¹³Galileache doria deger Jezu porot gelo; ani sogllo lôk Tachê sorbhonvtim ekttovlo, ani Tannem tankam xikovnn dili.

¹⁴Fuddem vochun, manddvir boslelea Alfevachea puta, Levik, Tannem dekhlo ani taka mhonn’lem: “Mhojê pattlean ie!” Ani to utthun Tachê pattlean gelo.

¹⁵Ani oxem ghòddlem: tachea ghorant jevnnak boslolo astana, sobar dônddvosuldar ani patki mhonn lêkhlele monis-ui Jezu ani Tacheam xisam borabôr jevnnak boslele; tôr Tacho pattlav korto zaite zann asle.

¹⁶Ani To dônddvosuldaram ani patkeam borabôr jevta-khata tem polleun, Farizêv pokxacheam dhormxastreamnim Tacheam xisank mhonn’lem: “Dônddvosuldaram ani patkeam sangatim tumcho Guru kiteak khata-pieta?”

¹⁷Hem aikun, Jezun tankam mhonn’lem: “Borim asat tankam nhoi, punn vaittakarank ki voizachi goroz; tôr Hanv sugunneank nhoi punn ogunneank apounk ailam.”

¹⁸Ekdam Juanvanche xis ani Farizev upas kortale tedna, kãi zannamnim ieun Taka mhonn’lem: “Juanvache xis ani Farizevache xis upas kortat, punn Tuje xis korinant tem koxem?”

¹⁹Ani Jezun tankam sanglem: “Lognacheam pavnneamnim, novro tanchê sangatim asot porian, upas korunk zata zait? Tanchea sangata novro aso-sôr tanchean upas korunk zaina.

²⁰Punn novreak tanchê modlo kaddun vhorcho vêll pavtolo ani tedna, to dis ietôch, te upas kortele.

²¹Pornnea vostrak konn-ui anvllonk naslelea novea lugttacho kopo marit zalear, novo kopo pornnea vostrachim sutam oddun bhair kaddta ani fallo odik vhodd korta.

²²Nhoi mhonn novo soro pornneam chambddea-potiamnim konn bhorina; bhôrlo zalear, soro chambddea-potio fôddtolo ani soreacho ani tosoch chambddea-potiancho-i ibadd zatolo. Na, novea soreak noveo chambddea-potio.”

²³Ekdam oxem ghòddlem: Jezu eka Sabbatha disa xetantlean vetalo, ani Tache xis cholot astana konnsam toddunk lagle.

²⁴Tedna Farizevamnim Taka mhonn’lem: “Polle, Sabbathachem korum nozo tem kam’ te kiteak kortat?”

²⁵Ani Tannem tankam sanglem: “Davidak ani tacheam sangateank goroz poddli ani bhuk lagli tedna, tannem kitem kelem tem tumi vachunk na kitem?

²⁶Mhonngê koxê bhaxen to, Abiatar porom’-iadnikachea kallar, Devachea ghorant bhitôr sorlo, ani iadnikam bhair konnakuch khaunk sot’tea nasli te Deva mukhar dovorlele undde tannem khele ani apleam sangateank-ui dile, hi soglli khobor tumi vachunk na bi?”

²⁷Ani Tannem tankam sanglem: “Devan Sabbath mon’xam khatir kela, mon’xank Sabbatha khatir korunk nant.

²⁸Mhonn-tôch Mon’xachea Putak Sabbathacher-ui odhikar asa.”