Read Goan Konkani Mk 3 Bible Online

Mk 3 - Goan Konkani bible

Mk 3

¹Anink êk pavtt Jezu eka devsthanant bhitôr sorlo ani hatak ar zal’lo êk monis thõi aslo.

²Tacher guneanv ghalchê pasot, Sabbatha disa To tea mon’xak boro korit kai mhonn te Taka tellun asle.

³Hatak ar zal’lea mon’xak Tannem mhonn’lem: “Utth, soglleam modem ubo rav.”

⁴Magir tankam vicharlem: “Sabbatha disa borem korum-ieta ki vaitt? Jiv vanchoum-ieta ki kaddum-ieta?” Punn te ogech ravle.

⁵Tedna ragan tancher nodor bhonvddaun, tanchea kallzachê darunnaiê pasot khontibhorit zaun, Tannem tea mon’xak mhonn’lem: “Tuzo hat sôdd!” Tannem to sôddlo, ani tacho hat adlê bhaxen sarko zalo.

⁶Torui Farizev bhair gele ani koxê bhaxen Taka nattak korcho tê vixim Herodichea pokxacheam mon’xam borabôr rokddoch Tacher add guddmêll korunk lagle.

⁷Jezu Apleam xisam borabôr doria lagim koddsorun gelo ani Tachê pattlean Galileiachea lokachi khêtt zali; tea bhair Judeia thaun,

⁸Jeruzalea-sun, Idumeia thaun, Jordanachê pelê toddi thaun, ani Tir ani Sidon hanchê bhonvtonnchea lokachi vhôdd urpônz, To kortalo tem aikun, Tachê-xim aili.

⁹Te lokache urponjik lagun, ti Apnnak chirdd’dun uddoit mhonn, Apnnak ek hoddem toiar dovrunk Tannem Apleam xisank sanglem.

¹⁰To sobar lokak boro kori dekhun, vaittakaram aslim titlim-i Taka hat lavunk Tacher poddtalim;

¹¹ani mhelle atme, Taka pollena fuddem, Tachê mukhar pãiam poddun huiêl martale ani mhonn’tale: “Tum Devacho Put!”

¹²Punn Apnnak dakhoun dina zaunk To khoraien tankam xiddkaitalo.

¹³Ani dongrar choddun Jezun Apnnak zai tankanch Apnna-xim apoile; ani te Tachê-xim gele.

¹⁴Ani Apnna borabôr aschê pasot ani provochon korunk tankam dhaddchê khatir Tannem bara zannank nemle, ani Tannem tankam apostl mhonn’le,

¹⁵ani devchar kaddunk-ui Tannem tankam podvi dili.

¹⁶Mhonntôch nemlele bara zann Te he: Simanv — haka Pedru mhonn Jezun nanv ghalem;

¹⁷Zebedevacheam putam, Jakobak ani Jakobachea bhava Juanvak, Boanerges, mhonngê Goddgoddeache Put, mhonn addnanv dilem;

¹⁸Andre, Filip, Bartolomêv, Matêv, Tomas, Alfevacho put Jakob, Tadêv, Krantikar Simanv,

¹⁹ani Tacho ghat ghetlo to Judas Iskariot.

²⁰Ani Jezu eka ghorant gelo ani novean itlo lôk thõi ektthovlo ki jevunk porian tankam fursôt nasli.

²¹Ani “tachi môt firlea”, oxem lok mhonn’ta dekhun, tachim soirim, hem aikolea uprant, Taka dhorun haddunk bhair sorlim;

²²Ani “Tacher Beelzebul bosla ani devcharanchea pordhana udexim to devchar kaddta.” oxem Jeruzaleak thaun denvun ail’le dhormxastri mhonntale.

²³Tankam Apnna sorxim apoun, To tankam voparimnim sangunk laglo: “Soitanachean koso mhonn Soitanak bhair ghalunk zata?

²⁴Khõicheim-i ek raj apnnacheach bhitôr fantton pongodd zaun eka-mekacher zuztit zalear, tem raj ubem dhorom nozo;

²⁵ani ek ghorabo apnnach bhitor fanttlear, to ghorabo ubo urom nozo.

²⁶Toxench, Soitan apnna-cheruch uprasun fanttlear, ubo urom nozo, tacho xevôtt pavla.

²⁷Punn tea bollixitt monxak poilo bandlea xivai, tachea ghorant konnachean rigunk zaina, ani tacho mal-ui luttunk zaina; poilo tea bollixtt mon’xak bandlea uprant tachem ghor luttunk zata.

²⁸Tanchea patkank ani kosleoi devninda tim uloitat tankam lagun, mon’xancheam putam-dhuvank Dev bhogxitolo mhunn, Hanv tumkam khorench sangtam;

²⁹Punn Povitr Atmeacher devninda kortit tankam kednanch bhogsonnem aschem na, punn tim sasnnak urta toslea patkachim guneanvkarim.”

³⁰“Mhello atmo tacher bosla”, oxem te mhonntale dekhun, hem To uloilo.

³¹Jezuchi avoi ani Tache bhav pavun sorlim ani, bhair ravun, tãnnim Taka apounk dhaddlo.

³²Tachê bhonvtonnim khup lôk boslolo aslo, ani “Polle, Tuji avoi ani Tuje bhav bhair asat ani Tuka sôdtat.”, oso Taka nirôp dilo.

³³“Mhoji avoi ani Mhoje bhav konn?”, oxem Tannem vicharlem.

³⁴Ani Apnna bhonvtim bosleleancher nodor bhonvddaun, “Him asat Mhoji avoi ani Mhoje bhav.

³⁵Devachi khuxi kortat tinch Mhozo bhav ani Mhoji bhoinn ani Mhoji avoi.”, oxem Tannem mhonn’lem.