Read Goan Konkani Mk 4 Bible Online

Mk 4 - Goan Konkani bible

Mk 4

¹Novean To doriachê dodder xikounk laglo; punn lokacho hedo vhoddlo zomo Tachê bhonvtim ektthovlo, ki To doriant aslelea eka hoddear choddun boslo, ani sogllo lôk doriachê vatten dhodder ravlo.

²To tankam sobar vostu voparimnim xikounk laglo, ani xikoitam-xikoitam Tannem oxem mhonn’lem:

³“Aikat! Êk vomp’pi vompunk gelo;

⁴ani vomptana thoddem bim vattechê deger poddlem ani suknneamnim ieun tem khelem.

⁵Dusrem zobôr-xi mati nasli toslê khoddpi zomnir poddlem; ani matiechi kholai na zaun, tem veginch kirlolem,

⁶punn vot ietôch korpolem, ani mull na zaun suklem.

⁷Dusrem kantteam modem poddlem; kantte vaddle ani tãnnim taka fugar kelem, ani pik zalem na.

⁸Ani her bim borê zomnir poddlem; tem kirlolem ani vaddlem ani taka pik zali; ekak tis, ekak satt ani ekak xembhôr.”

⁹Ani Tannem mhonn’lem: “Aikunk kan asleleamnim aikunchem.”

¹⁰Ani To eklo aslo tedna, baram xisam borabôr Tachea sangata asleleamnim voparinchi somzonni Tachê kodde vicharli.

¹¹Ani Tannem tankam oxem sanglem: “Devachea Rajeacho gutt ollkhunk Devan tumkam dennem dilam; punn bhair asat tankam soglli xikovnn voparimnim.

¹²Oxem kiteak “polletam-polletam tankam disona zauncheak, ani aikotam-aikotam tankam somzona zauncheak, na zalear tim aplem jivit bodôltit ani tankam bhogsonnem mellot.’

¹³Magir Tannem tankam mhonn’lem: “Hi vopar tumi somzonant? Tôr her soglleô vopari koxeô somzotelet?

¹⁴Vomp’pi vompta tem, Utor.

¹⁵Tannim aikona fuddem, Soitan rokddoch ieta ani tanche bhitor vomplelem bim kaddun vhorta tem, vatter vomplam tem utor, him tim.

¹⁶Têch porim, Utor aikotôch rokddinch khuxalkaien tem ghetat,

¹⁷punn tankam apnnam bhitôr pallam nant dekhun, tim chôdd vogôt togonant; Utrak lagun vign vô dhumallo iena fuddem, tim rokddinch bhavarta thaun koddsorun vetat tem, khoddpi zomnir vomplem tem utor, him tim.

¹⁸Ani her dusrim Utor aikotat,

¹⁹punn hea sonvsarache huske, girestkaiechi bhul ani her dusream vostunchi axa bhitôr sorun Utor damun dhôrtat ani taka pik zaina tem, kantteam modem vomplam tem utor, him tim.

²⁰Ani Utor aikotat, tem mandun ghetat, ani ekak tis, ekak satt, ani ekak xembhôr pik ditat tem, borê zomnir vomplam tem utor, him tim.”

²¹Tannem oxem-i mhonn’lem: “Konn tori ponntti pailê pondak vô bajê tolla dovrunk haddta? Eka peddacher dovrunk nhoi?

²²Tôr ugtem zalea bogor kãich thuim liplelem na; ani uzvadda ieilea bogor kainch thuim gupit na.

²³Aikunk konnank kan aslear, tãnnim aikunchem.”

²⁴Tannem tankam anink sanglem: “Tumi aikotat tachi chotrai dhôrat. Tumi zôkxeat teach mapan Dev tumkam porot zôktolo ani odik-ui ditolo;

²⁵kiteak asa tankam Dev anink ditolo ani na tanchê koddlem kitem asa tem-i To kaddun ghetolo.”

²⁶Anink-ui Tannem mhonn’lem: “Ek monis aplea xetant bim vompta;

²⁷rat ani dis, to nidlolo asum vô zago asum, bim kirlota ani vaddta; hem koxem tem to kãich nokllo.

²⁸Zomin apnna osttongim foll dita, poilim palo, magir konnos ani xekim konnsant gulgulit gotto.

²⁹Ani xet piktôch, luvnni pavli mhonnun rokddoch to villo laita.”, oxem Devachem Raj.

³⁰Tea bhair Tannem mhonn’lem: “Devachem Raj kiteak sôr korum-ia? Vô kosli vopar ghalun tem chitarum-ia?

³¹Sansvacho konno zomnir vomptana, sonvsarant asat titleam-i biam poros supurlo,

³²punn vomplea uprant vaddta ani porsantleam soglleam zhaddam poros vhôdd zata; ani taka hedeô vhoddleô khandiô futt’tat, ki varea veleam suknneank tachê savllê tolla asro gheunk mellta, tea sansvachea konnea porim, Devachem Raj.”

³³Tanchean aikun gheum ieta tosleam sobar voparimnim To tankam Aplo nirôp ditalo;

³⁴voparim xivai tanchê kodde uloinaslo, punn kuxin astana Apleam xisank sogllem foddun sangtalo.

³⁵Teach disa, sanz zatôch, Tannem tankam sanglem: “Poltoddi ia.”

³⁶Ani tea lokak soddun, Taka aslo toso hoddeant vhelo; Tachê borabôr anink-ui hoddim aslim.

³⁷Tedna êk mottem vadoll-modd suttlem ani lharam hoddeacher futt’talim ani hoddem udkan bhoron buddonk pavlem.

³⁸Ani To Apunn verea-xim uxeacher nidlolo. Tãnnim Taka utthoun mhonn’lem: “Guruji, ami mortanv tem Tuka kãich poddunk na?!”

³⁹Utthun Tannem vareak bexttailem ani doriak mhonn’lem: “Gopchip! Thôndd za.!” Ani varem thamblem ani vhôdd thonddai zali.

⁴⁰Magir Tannem tankam mhonn’lem: “Tumi itle bhezudd kiteak? Ozun-ui tumkam bhavart na?”

⁴¹Tedna te zobor bhiele ani ekamekak mhonnunk lagle: “Ho konn mhonn zait? Tôr varo ani doria porian Tachem aikotat!”