Read Goan Konkani Mk 5 Bible Online

Mk 5 - Goan Konkani bible

Mk 5

¹Te doriachê pelê toddi Gerajenanchea mulkant pavle.

²Ani Jezu hoddeantlo bhair sortôch, mhello atmo boslolo êk monis somadhim modlo bhair sorun rokddoch Taka mellunk ailo.

³Tannem somadhim modem aplem biradd kel’lem ani sanklleamnim legun konnachean taka bandunk zainaslem,

⁴kiteak sobar pavtti taka khoddeamnim ani sanklleamnim bandlolo, punn tannem sanklleo tôddloleô ani khodde moddun uddoil’le. Konnachean taka domaunk zainaslem.

⁵Sogllea vellar, disacho toso ratcho, to somadhim modem ani dongrancher astalo, ani huieli marun apnnakuch fatramnim ghave kortalo.

⁶Pois thaun Jezuk polleun to dhanvun ailo, Tachê mukhar sorpottlo

⁷ani vhoddlean bob marun tannem mhonn’lem: “Jezu, Bhov Vortea Devachea Puta, mhojê kodde tuka koslem kam’ asa? Devachean, tujê lagim hat zoddun magtam: mhaka dogdainaka!”

⁸Kiteak Jezu taka mhonntalo: “Mhellea atmea, hea mon’xa velo bhair sor!”

⁹Ani Jezun taka vicharlem: “Tujem nanv kitem?” Ani tannem Taka zap dili: “Mhojem nanv Loskor, kiteak ami khup zann.”

¹⁰Ani apnnak mulka bhair ghalinaka mhonn tannem Tachê kodde laleun maglem.

¹¹Thõi dongra lagim dukrancho êk vhôdd hindd chortalo; ani devchar Tachê lagim oxem magunk lagle:

¹²“Amkam team dukramnim dhadd; tanchê bhitôr amkam rigum-di.”

¹³Jezun tankam rojea dili ani te mhelle atme bhair sorun dukramnim rigle, ani sumar don hozar dukrancho to akho hindd koddxea velean doriant xevttolo ani buddun melo.

¹⁴Tanche rakhnne pollun gele ani nogrant ani kheddeam-ganvamnim tãnnim hi khobor kollit keli. Ani lôk kitem zalem tem polleunk ailo;

¹⁵ani Jezu sorxem ieun, devchar koxttaitalo to monis — mhonngê, zacher Loskor boslolem toch — angavlim nhesun ani toklen sarko zal’lo thõi bosla to polleun, tim bhielim.

¹⁶Zãnnim devchar bosleleak kitem ghòddlem ani dukram vixim kitem zalem tem dekhlelem, tãnnim herank sanglem.

¹⁷Tedna to lôk aplea mulkantlo bhair sorun voch mhonn Jezu kodde magunk laglo.

¹⁸Ani To hoddear choddtanam, devchar boslolo to monis apnnak Tachea sangata ravunk di mhonn magunk laglo,

¹⁹punn Jezun dilem na, ani taka sanglem: “Tujea ghora ani tujea loka-xim voch ani Sorvesporan tujê khatir kedeô vhoddleô vostu keleô ani koxi Tannem tuji doia keli, tem tankam sang.”

²⁰To gelo ani Jezun apnna khatir kedeô vhoddleô kornneô keleô teô Dha Nogranchea mulkant porgottunk laglo; ani sogllim ojap zalim.

²¹Jezu novean hoddear choddun doriachê pelê toddi vetôch, lokachi vhôdd urpônz Tachê sorxem ektthovli; ani To doriachê dhodder aslo.

²²Tedna Jairus nanvacho eka devsthanacho odhikari ailo ani Taka polleun Tacheam pãiam poddlo,

²³ani Tachê kodde oxem laleun maglem: “Mhoji dhuv mornnachê tonnir pavlea; ie ani ticher tuje hat dovor, tika bori kôr, tika vanchum-di.” oxem Tachê kodde laleun maglem.

²⁴Ani To tachê borabôr gelo; puskôll lôk Tachê pattlean vetalo ani Taka chênchtalo.

²⁵Bara vorsam rogt-pat zal’li thõi êk bail asli;

²⁶sobar voizanchem vokhod kortanam zaitem sosun-ui ani sogllo aplo duddu khorchun-ui tika kãich gunn poddunk naslo, punn tichi gôt odik paxtt zal’li.

²⁷Jezuchi khobor aikun, “Tacheam vostrankuch hat lain zalear, hanv borim zatelim”, oxem tinnem mhonn’lem dekhun, loka modlean tachea pattlean ti geli ani Tinnem pattlean Tachea avoronnak hat lailo.

²⁹Ani rokddich tichea rogtachi zhôr sukli ani apunn piddentli bori zali mhonn tichea angant tika bhòglem.

³⁰Ani tech ghoddier, Apnnakoddcho gunn bhair sorlolo mhonn Apnnachêch bhitôr rokddoch zanna zaun, “Mhojeam vostrank konnem hat lailo?”, oxem mhonnun, Jezun loka vatten vollon vicharlem.

³¹Punn “Lôk Tuka chênchta mhonn Tum tôr polletai, ani torui ‘Mhaka konnem hat lailo?’ ”, oxem Tacheam xisamnim Taka mhonn’lem.

³²Ani oxem konnem kelem tem polleunk, Tannem sorbhonvtim nodor marli.

³³Tedna bhieun ani kampun apnnak kitem ghòddlelem tem zanno zaun, ti bail lagim sorli ani Tacheam pãiam poddli ani sogllem sot tinnem Taka sanglem.

³⁴Tannem tika mhonn’lem: “Dhuvê mhojê, tujea bhavartan tuka bori keli. Xantin voch atam ani tujê piddentli meklli za.”

³⁵To uloita thõich astana, “Tuji dhuv bhair poddli; Gurujik anink tras kiteak ditai?”, oxem sangunk, devsthanachea odhikariager thaun dhaddlele monis pavle.

³⁶Punn tãnnim mhonnlelem tem kanar gheun, “Tum bhienaka; bhavart mat dhôr!”, oxem Jezun devsthanachea odhikareak sanglem.

³⁷Ani Pedru, Jakoba ani Jakobachea bhava Juanva, bogor Tannem konnakuch Apnna borabôr ieunk diunk na.

³⁸Devsthanachea odhikarea-ghorant bhitôr sortôch Jezun lok vhoddlean rodd’to ani zaitem sangun vilapto ek gollbôll dekhlo.

³⁹Bhitôr vochun, “Tumi kiteak mhonn gollbolltat ani roddtat? Cheddum morunk na, tem nhidlam.”, oxem Tannem tankam mhonn’lem.

⁴⁰Ani lôk Taka hansunk laglo. Punn tankam soglleank bhair ghalun, cheddvachea bapaik ani avoik ani Apleam sangateank gheun, cheddum aslem thõi To gelo.

⁴¹Ani cheddvachea hatak dhorun, “Talitha, kum’!” mhonngê “Dakttea cheddva, utth!”, oxem Tannm mhonn’lem.

⁴²Ani rokddench cheddum utthun bhonvunk laglem. Taka bara vorsam aslim. Ani lôk ojap zaun bharim thottaklo.

⁴³Ani konnakuch hem gomoina zaunk Tannem khoraien formailem. Ani cheddvak khaunk diat mhonn tankam sanglem.