Read Goan Konkani Mk 6 Bible Online

Mk 6 - Goan Konkani bible

Mk 6

¹Ani thõi thaun bhair sorun To Aplea ganv-ghora gelo ani Tache xis-ui Tachê borabôr gele.

²Ani Sabbath pavtôch To devsthanant xikounk laglo. Ani sobar zannam Taka aikun Tachê xikovnnê vixim ojap zaun mhonntalim: “Hem sogllem haka khõichem ailem? Ani taka dil’li asa ti zannvai kosli? Ani tacheam hatamnim oslim vismitam ghòddtat tim koxim?

³Ho thovoi nhoi? Ho Mariecho put nhoi? Jakob, Jose, Judas ani Simanv hancho bhav nhoi to? Tacheô bhoinni-i hanga amchê modem ravtat nhoi?” Ani tim Taka mandun gheunk kobul naslim.

⁴Jezun tankam sanglem: “Eka provadeak fokot aplea khaxa ganvant, apleam soiream-dhaiream modem ani aplea ghorabeant man na.”

⁵Bhov thoddeam piddevontancher Aple hat dovrun Tannem tankam borim kelim tanche bhair, Tachean thõi koslench vismit korunk zaina zalem,

⁶Ani tankam bhavart na mhonn Taka ojap dislem. Tedna bhonvtonncheam gramamnim vochun, To xikovnn ditalo.

⁷Magir Tannem bara zannank Apnna-xim apoile, ani mhelleam atmeancher tankam podvi diun, dogam-dogank To dhaddunk laglo.

⁸Ani Tannem tankam formailem: “Eka danddea bhair, vattek kãich vhoronakat, nhoi khann-jevonn, nhoi bhuti, nhoi mhonn penkttak duddu;

⁹pãiank vhannô ghalat; eka bhair dusrem anglem vhoronakat.”

¹⁰Ani tankam sanglem: “Khõisor-ui eka ghorant tumi bhitôr sorxeat, tea gramantle bhair sorun vexeat porian thõich ravat;

¹¹ani khõicho-i ganv tumkam ievkar dina zait zalear ani thõicho lôk tumchem aikunk kobul nasot zalear, tankam êk xiddkavnni diunchê khatir, tê svatê vele bhair sortana, tumcheam pãianchi dhull zhaddun uddoiat.”

¹²Mhonntôch te gele ani soglleamnim jivit bôdolchem mhonn lokak porgottunk lagle.

¹³Ani khup devchar kaddtale ani sobar vaittakarank-ui tel lavun borim kortale.

¹⁴Jezuchem nanv gaztalem dekhun Herod razak Tachi khobor pavli. Kãi zannam mhonnot: “Juanv Batist mel’leantlo jivont zala, dekhun tachêkodde vismitam zatat.”

¹⁵Punn konn-konn mhonnot: “To Elija.” Anink-ui her konn-konn mhonnot: “To êk provadi, Adleam provadeantleam eklea porim, to ek provadi.”

¹⁶Tem aikun Herodin mhonn’lem: “Hanvem xins kapunk lail’lem toch Juanv novean jivo zala.”

¹⁷Tôr teach Herodin Herodias nanvachê aplea bhava Filipachê bailek apli bail kel’li; tika lagun tannem monis dhaddun Juanvak dhôrlolo ani bondkhonnint ghal’lo.

¹⁸Karonn Juanv Herodik mhonntalo: “Tujea bhavachê bailek tujean tuji bail korun dovrum nozo.”

¹⁹Punn Herodia-sichea kallzant tacho rag xiztalo ani ti taka jivexim marunk sôdtali, punn tika toxem korunk mellonaslem.

²⁰To êk promannik ani bhoktivont monis mhonn zanno zaun, Herod Juanvak bhietalo ani taka rakhtalo. To sangta tem aikun pattim-fuddem sortalo, ani tori khuxê-monan taka kan ditalo.

²¹Oxem astam, Herodin aplea vadd-disa apleam odhikareank, apleam subedarank ani Galileiacheam vhodd-vhodd mon’xank ek vhoddlem ratchem jevonn kelem tedna ek soeg upraslo.

²²Ani têch Herodiaxichi dhuv bhitôr sorun nachli, ani Herodik ani tachê sangatim jevteleank man’li; tedna tannem cheddvak mhonn’lem; “Tuka zai tem mhojê kodde mag ani hanv tuka ditolom.” Ani tika oso soput dilo: “Magxi titlem-i ditolom, mhojê razvottechem ord zalear legun.”

²³

²⁴Bhair vochun cheddvan avoi kodde vicharlem: “Kitem magum?” Tinnem zobab dilo: “Juanv Batistachem xins.”

²⁵Rokddich, raza sorxim taktin bhitôr ieun, cheddvan oxem maglem: “Atanchea-atam, eka tattar, Juanv Batistachem xins tuvem mhaka dilelem zai.”

²⁶Razacher vhôdd sontap ailo; punn apleam soputank ani hajir asleleam pavnneank lagun, cheddvak dil’lem utor moddunk taka khuxi na zali.

²⁷Tech ghoddier, razan rakhonndarak dhaddlo ani Juanvachem xins eka tattar haddunk lailem. Tannem vochun bondkhonnint tachi tokli kapli,

²⁸ani xins tattar ghalun haddlem ani cheddvak dilem, ani cheddvan tem aplê avoik dilem.

²⁹Hem aikun, Juanvache xis aile ani tachi kudd vhorun tãnnim ti êkê somadhint ghali.

³⁰Apostl Jezu-xim ektthovle ani apnnem jem kel’lem ani xikoil’lem, titlem-i tãnnim Taka kollit kelem.

³¹Tedna Tannem tankam sanglem: “Êkê eksurê svater tumi ekvodde ieiat ani matso visôv gheiat.” Kiteak ietim-vetim itlim zannam aslim ki jevunk legun tankam fursôt nasli.

³²Ani hoddear choddun te êkê eksurê svater kuxin gele.

³³Te vetat mhonn polleun, sobar zannamnim khõi tem parkilem ani pãi-vatten soglleam nogram thaun thõi tim vegim-vegim gelim ani tanchê adim pavlim.

³⁴Ani hoddeantlo bhair sortana Jezun êk vhoddli urpônz dekhli ani gonvlli-nasleleam xelliam porim aslim dekhun, kallzant thaun tanche Taka churchure disle ani sobar vostu To tankam xikounk laglo.

³⁵Chôdd uxir zalo mhonn polleun, Tacheam xisamnim lagim ieun mhonn’lem: “Hi svat eksuri ani zobôr uxir zalo;

³⁶bhonvtonncheam molleamnim ani gramamnim vochun apnnank jevonn-khann viktem gheunchê khatir tankam dhadd.”

³⁷Ani portipallun Tannem tankam sanglem: “Tumich tankam jevunk diat.” Ani tãnnim mhonn’lem: “Tôr vochun don’xim dinaranche undde vikte gheun ami tankam khaunk diunchem kitem?”

³⁸Ani Tannem tankam vicharlem: “Tumchê kodde kitle undde asat? Vochun polleiat.” Ani chovkoxi korun tãnnim sanglem: “Panch undde ani don maslleô.”

³⁹Soglleank chombeam-chombeamnim hirvea tonnacher jevnnak bosunk laiat mhonn Tannem tankam formailem.

⁴⁰Mhonntôch tim xembhorancheam ani pon’nasancheam zomeamnim kuxin-kuxin boslim.

⁴¹Tedna Tannem panch undde ani don maslleô hatant gheun ani sorgak dolle ubarun Devak dhin’vasnni keli, magir undde môddle, ani te lokak vanttunk, Tanne te xisam kodde dile; toxeôch don maslleô Tannem soglleank vanttleô.

⁴²Sogllim jevlim ani dhadoxi zalim.

⁴³Unddeanche ani maslleanche urlele kuddke-tukdde ektthãi korun tãnnim bara panttleô bhôrleô.

⁴⁴Undde khel’le te dadlech panch hozar asle.

⁴⁵Magir Apunn lokak dhaddta mhonnosôr, Jezun Apleam xisank vegim, hoddear choddun, Apnna adim poltoddi Bethsaidê vochunk laile.

⁴⁶Ani tankam dhaddtôch, Apunn dongrar magnnem korunk gelo.

⁴⁷Ani tin’san zatôch hoddem doriant modem pavlem ani To ekloch dhodder aslo;

⁴⁸ani portem varem martalem dekhun te tanddunk koxttovtale mhonn polleun, fantea parar doriacher cholun To tanchê-xim ailo, ani tanchê fuddem vochunk kori.

⁴⁹Punn konn doriacher cholta tem polleun, bhut mhonn somzun, tãnnim killônch marli;

⁵⁰kiteak soglleamnim Taka dekhlolo ani tancher akant ail’lo. Punn rokddoch tanchê lagim uloun Tannem mhonn’lem: “Dhir dhôrat, Hanv to! Bhienakat!”

⁵¹Ani To tanchê sorxim hoddear choddlo ani varem thamblem. Ani te apnnam bhitôr ekdomuch thottakle,

⁵²kiteak, zodd monache zaun, vaddoil’leam unddeancho ôrth tankam mellunk naslo.

⁵³Doria utrun te poltoddi Genezaretak pavle; thõi tãnnim hoddem lailem.

⁵⁴Ani te hoddeantle bhair sorona fuddem, lokan rokddoch Jezuk ollkholo;

⁵⁵ani akhea prantant dhanvim-dhanvim vochun, To khõi asa ti khobor aikun, thõi vaittakarank antrunnar ghalun haddunk laglim.

⁵⁶Ani To veta thõisôr, zaum gramamnim, zaum nogramnim, zaum molleamnim, vaittakarank moidanar dovortalim ani Tachea vostrachê degek punn hat lavunk di mhonn tim Tachê lagim magtalim; ani Taka hat laitalim titlim-i borim zatalim.