Read Goan Konkani Mk 7 Bible Online

Mk 7 - Goan Konkani bible

Mk 7

¹Farizev ani kãi dhormxastri Jeruzaleak thaun ieun Tachê sorxem ektthovle,

²ani Tacheam xisantle kãi zann mhelleam hatamnim, mhonnchê hat dhuinastanam, jevtat mhonn tãnnim pollelem.

³Farizev ani soglle Judev, purvileanchê chali pormannem, bogor-bogor hat samke bore-korn dhulea xivai jevinant;

⁴ani tinttear thaun ietôch, nhalea-dhulea xivai jevinant; ani te samballtat teo herui sobar chali asat teo heo: patram, kollxe ani kanxeachim aidonam dhuvpa vixim.

⁵Mhonntôch Farizevamnim ani dhormxastriamnim Tachê lagim vicharlem: “Zannteanchê chali pormannem tuje xis kiteak cholonant, punn mhelleam hatamnim kiteak jevtat-khatat?”

⁶Tannem portipallun tankam sanglem: “Izaiasan tumam ddhongeam vixim adinch sarkem sangun dovorlam, ‘Hi porza onttamnim Mhaka vakhannta, punn tanchem kalliz Mhojê-sun pois asa.

⁷Tôr mon’xamnim kel’le kaide xastram koxim xikoun, ti Mhoji polki puza korta.’,oxem boroun asa tea pormonnem,

⁸Devachi adnea sanddun, mon’xancheô chali tumi palltat.”

⁹Ani tankam mhonn’lem: “Aplich chal samballchê khatir, Devachi adnea kuxin kaddunk kitle mhonn huxar tumi!

¹⁰Tôr Moizesan sanglam: ‘Tujea bapaik ani avoik man di, ani bapaik vô avoik xirapta to morun vochum.’

¹¹Punn tumi sangtat: ‘Konn-ui bapaik vô avoik oxem mhonnot zalear: ‘Mhojê koddlem kitem-i tuka upkarto tem hanvem ‘korban’ kelem (mhonnchê Devak bhettoilem);’

¹²tea uprant aplea bapai vô avoi pasot tumi taka kãich korunk dinant;

¹³he baxen tumi diun aileat te xikovnentlean Devachem utor tumi nirfoll kortat. Ani osleô zaiteô her vostu tumi kortat.”

¹⁴Ani novean lokak apoun Tannem sanglem: “Sogllim tumi, Mhojem aikat ani somzun gheiat:

¹⁵mon’xam bhailem kitench tanchê bhitôr vochun tankam mhellim korunk xokona; punn mon’xam bhitorleô vostu bhair sorun ietat teôch mon’xank mhellim kortat.”[1]

¹⁷Ani lokak sanddun, ghorant bhitôr ietôch, Tacheam xisamnim hê vopari vixim Tachê kodde vicharlem.

¹⁸Ani Tannem tankam mhonn’lem: “Tumi-i somzo-naslele mum? Bhailem kitench mon’xam bhitôr vochun tankam mhellim korunk zaina;

¹⁹tem tanchea kallzant rigona; tem pottant veta ani xekim kuddintlem bhair veta mhonn tumi somzonant?” (Oxem uloun, sogllem khann nitoll mhonn Tannem dakhoun dilem.)

²⁰Ani Tannem mhonn’lem: “Mon’xam-bhitorleô bhair sortat teôch vostu mon’xank mhellim kortat.

²¹Kiteak bhitôr thaun mon’xanchea kallzantle bhair sorta te vaitt xevott he: kazar zainasleam eka-mekacho lingbhog, choriô, khun,

²²pordvar, apsvart, khotteponn, fottkirponn, kamchar, nirdukai, ninda, gorv, murkheponn.

²³Him sogllim vaittam bhitôr thaun bhair sortat ani mon’xank mhellim kortat.”

²⁴Ani thõicho utthun To Tirachea ani Sidon’chea prantant gelo; thõi To eka ghorant bhitôr sorlo. Hem konnak gomlelem Taka naka aslem, punn Tachi khobor lokak kollonastana urli na,

²⁵Punn Tachê vixim aikona fuddem, aple dhuvecher ek mhello atmo aslo, ti êk bail bhitôr aili ani Tacheam pãiam poddli.

²⁶Ti bail Grik, ani zolman Sirofenisiekarnn asli.Aplê dhuvê velo devchar kadd mhonn tinnem Jezukodde maglem.

²⁷Tannem tika zap dili: “Bhurgeank poilim dhadoxi zaum-di; kiteak bhurgeancho unddo kaddun sunneank ghalop sarkem nhoi.”

²⁸Punn tinnem portipallun Taka mhonn’lem: “Hôi, Somia, punn meza tolla poddtat te, bhurgeangele unddea-kuddke sunnim-i khatat.”

²⁹Ani Tannem tika mhonn’lem: “Hea tujea zababak lagun, tujean vochum ieta; tujê dhuvê velo devchar bhair sorlo.”

³⁰Ani ghora voch zalear, tachê velo devchar gel’lo, ani tika aplem bhurgem antrunnar add poddlelem mell’lem.

³¹Novean Tirachea prantantlo bhair sorun, Sidon’chê vatten, Dha-Nogranchea mulkant, Jezu Galileiachea Doria-kodde ailo.

³²Tedna konn-eklea zôdd jibechea bhereak Tachê sorxem haddlo ani tacher hat dovor mhonn lokan Jezu kodde maglem.

³³Ani loka modlo taka kuxin vhorun Jezun tacheam kanamnim Aplim bottam ghalim ani Apli thimpi kaddun tachê jibek laili.

³⁴Magir sorgak dolle ubarun, Tannem suskar sôddlo ani mhonn’lem: “Ef’fatha!”,mhonnchê: “Tuje kan ugte zaum!”.

³⁵Hem mhonnta mhonnosôr, tache kan ugòddle ani tachê jibecho bandpas suttlo ani to sarko ulounk laglo.

³⁶Ani konnakuch sanginakat mhonn Jezun tankam formailem. Punn jitlo To tankam formaitalo, titlim odik tim porgôtt’talim

³⁷ani sangum nozo titlim thottakun mhonntalim: “Hannem sogllem borem kelem; Tannem bhereank kan dile ani moneank jib dili.”