Read Goan Konkani Mk 9 Bible Online

Mk 9 - Goan Konkani bible

Mk 9

¹Ani Tannem mhonn’lem: “Hanv tumkam khorench sangtam: hanga ubim asat tantlim kãi zannam Devachem Raj podven ail’lem dekhlea bogor morchim nant.”

²Sov dis uprant, Jezu Pedruk, Jakobak ani Juanvak Apnna borabôr gheun ekvodde aschê khatir eka unch dongrar gelo, ani tanchê mukhar Tannem Aplem rup bodôl’lem.

³Tachim vostram itlim loklokit ki sonvsarant konnui moddvolla lagim dhovim korunk zainant titlim dhovim-ful zalim.

⁴Ani thuim, Moizes ani Elija Jezu lagim uloito tankam dixtti poddle.

⁵Tedna Pedrun uloun Jezuk mhonn’lem: “Rab’bi (mhonngê “Guruji”), ami hangasoruch aslear borem; tôr tin tombu korum-ia, êk Tuka, êk Moizesak ani êk Elijak.”

⁶Kitem mhonnchem tem toch nokllo aslo; te bhieun kamplele.

⁷Ani eka kupan tancher savlli ghali. Ani kupantli oxi êk zap zali: “Opurbaiecho To, Ho Mhozo Put, Tachem aikat!”

⁸Ovchit bhonvtonnim nodor martoch, Jezu bogor apnnam borabôr anink konn tankam dixtti poddlo na.

⁹Dongra vele denvtana, dekhlelem tem, Mon’xacho Put mel’leantlo punorjivont zai-sôr konnakuch sanginakat mhonn Tannem tankam hukum’ ghalo.

¹⁰Mornnantlo punornivont zaop, hem kitem zait kai mhonn vichar korit, tannim hi gozal apnnam bhitôr samball’li.

¹¹Tedna, “Elija poilo ieunk zai, mhonn dhormxastri kiteak mhonntat?”, oxem tãnnim Tachê lagim oxem vicharlem.

¹²“Hôi, sogllem novean manddun haddunk Elija khoreaninch poilo ieta. Tori astana, Mon’xachea Putan zaitem sõsunk zai mhonn ani mon’xamnim Tachi beporva korunk zai mhonn koxem boroil’lem asa tôr?

¹³Punn Hanv tumkam sangtam: Elija nhoich ailo, punn, tachê vixim boroil’lem aslem tea pormannem, apnnank zai aslem toxem tãnnim tachê sorim kelem.”, oso Tannem zobab dilo.

¹⁴Xisam sorxem pavle tedna, tanchê bhonvtonnim lokachi vhôdd urpônz ektthovleli ti ani dhormxastri tanchê kodde vad-vivad kortale te tãnnim dekhle.

¹⁵Ani Jezuk pollena fuddem sogllo lôk ojap zaun thottaklo, ani Taka noman korunk dhanvun ailo.

¹⁶Ani Tannem tanchê lagim vicharlem: “Tanchê kodde tumcho koslo vad-vivad zatalo?”

¹⁷Portipallun lokantlea eklean mhonn’lem: “Guruji, mono devchar boslelea mhojea putak Tujê sorxim hanvem haddla;

¹⁸to taka dhôrta titlê-i pavtti taka dhornnir xevttita; ani to tonddantlean fenno kaddta, dant korkoraita ani tann zata. Ani taka kaddun uddoiat mhonn hanvem Tujeam xisank sanglem, punn tanchean nozo zalem.”

¹⁹Tannem portipallun mhonn’lem: “Bhavart-nasleli pinddka tumi! Kedna porian tumchê borabôr Hanvem aschem? Kedna porian Hanvem tumkam sônschim? Taka Mhojê sorxem haddat.”

²⁰Ani tãnnim taka Jezu-xim haddlo. Ani Jezuk dekhona fuddem devcharan taka foddfoddailo ani to dhornnir poddun tonddantlean fenno kaddit lolltalo.

²¹Ani Jezun tachea bapaik vicharlem: “Taka kedna-san oxem zaun ieta?” Tannem zap dili: “Bhurgeponnar san;

²²ani tacho nas korunk, devchar taka bogor-bogor ujeant ani udkant uddoita. Punn tujean kitem zata zalear, amche churchure dhorun amkam pav!”

²³Punn Jezun taka sanglem: “ ‘Tujean zata zalear’, oxem sangtai? Bhavart dhôrta taka sogllem korunk zata.”

²⁴Rokddoch cheddeachea bapain dukam golloun vhoddlean mhonn’lem: “Bhavart dhôrtam. Mhojea unnea bhavartak adar di.”

²⁵Apnna-xim lotton ietelea lokak polleun, Jezun mhellea atmeak oxem mhonnun bhenkddailo: “Monea-bherea atmea, Hanv tuka hukum’ ghaltam: tachê velo bhair sor ani hea fuddem tacher ienaka!”

²⁶Bob marun ani bharim taka foddfoddaun to tachê velo gelo; ani to cheddo itlo mel’lea porim zalo, ki sobar zannamnim mhonn’lem: “To melo!”

²⁷Punn Jezun tachea hatak dhorun taka ubo kelo ani tachean ubo ravunk zalem.

²⁸To ghorant bhitôr sortôch Tacheam xisamnim kuxin ieun Tachê lagim vicharlem: “Amchê kodde kiteak taka kaddunk zalem na?”

²⁹Tannem tankam sanglem: “Osli zat magnneache udexinch bhair sorunk zata.”

³⁰Thõiche bhair sorun te Galileiantlean vetale, punn hem konnakuch gomlelem Taka naka aslem,

³¹kiteak To Apleam xisank xikovnn ditalo ani tankam sangtalo: “Mon’xachea Putak mon’xanchea hatant ghalcho asa ani te Taka jivexim martele, ani Taka martôch tin disam uprant Dev Taka punorjivont kortolo.”

³²Punn To sangtalo tem te somzunk nant ani Tachê lagim vicharunk-ui te bhietale.

³³Te Kapernauma pavle, ani ghora ietôch Tannem tankam vicharlem: “Vatter koslo vivad kortaleat tumi?”

³⁴Apnnam modem konn vhoddlo kai mhonn te vatter ekameka kodde vad-vivad kortale dekhun,Te ogech ravle.

³⁵Bosun Tannem Bara Zannank apoile ani tankam sanglem: “Konnak poilo zaunchi khuxi aslear, to soglleam poros nimanno ani soglleancho chakôr zauncho.”

³⁶Tedna, eka bhurgeak dhorun, taka tanchê modem ubo kelo; ani taka vengent gheun tankam sanglem:

³⁷“Mhojê khatir osleam bhurgeantlea ekleak ghetat tim Mhaka ghetat, ani Mhaka ghetat tim Mhaka nhoi, punn Mhaka dhaddla Taka ghetat.”

³⁸Juanvan Taka mhonn’lem: “Guruji, amcho pattlav korinaslolo êk monis Tujea nanvan devchar kaddtana ami dekhlo; ani amcho pattlav korina mhonnun, taka ami mona kelo.”

³⁹Punn Jezun mhonn’lem: “Taka mona korinakat; kiteak Mhojea nanvan vismit kortit tim kednanch rokddim Mhojer vaitt ulounchim nant.

⁴⁰Tôr amcher add nant tim amchea bhaga asat.

⁴¹Hanv tumkam khorench sangtam: tumi Kristachim pattlavdaram mhonn konn-ui tumkam êk pelo-bhôr udok pieunk ditit zalear, tanchi mozuri tankam mellonastana urchi na.

⁴²Punn bhavart dhôrteleam heam lhanam modlea ekleak ho bhavart soddunk konn-ui oddun vhortit tôr, gaddum ôddta toslem ek danteachem pedd tanchea golleak bandun tankam doriant uddoilear odik borem zatelem.

⁴³Ani tumcho hat patok korunk tumkam oddun vhorta zalear, to katrun uddoiat; don hat asun emkonddant, palovnam-toslea ujeant, vechê poros, lunddim zaun Jivitant bhitôr sorlear tumkam odik borem.[2]

⁴⁴

⁴⁵Ani tumcho pãi patok korunk tumkam oddun vhorta zalear, to katrun uddoiat; don pãi asun emkonddant tumkam uddoil’lê poros, thonttim zaun Jivitant bhitôr sorlear tumkam odik borem.

⁴⁶

⁴⁷Ani tumcho dollo bi patok korunk tumkam oddun vhorta zalear, to bhair uddoiat; don dolle asun emkonddant tumkam uddoil’lê poros êkuch dollo gheun Devachea Rajeant bhitôr sorunk tumkam odik borem.

⁴⁸Thõi emkonddant poddleleank khata to kiddo moron morona ani uzo kednanch palovn palovna.

⁴⁹Mitta vorvim ghòddta toxem, ujea vorvim Dev zonn-eklea mon’xak xud’dh korun samballtolo.

⁵⁰Mitt êk bori vôst, punn mittachi kharsann geli tôr, kitea vorvim tumi taka portun kharsann diteleat? Tumchê modem mitt asum-di, ani ekameka lagim xanti vosum-di.”