Read Goan Konkani Lk 1 Bible Online

Lk 1 - Goan Konkani bible

Lk 1

¹Survatek thaun amchê modem zaleat teô ghòddnneô dekhleleam sakxidaramnim ani Sobdacheam sevokamnim amkam sondêx dila tea pormannem, hi kotha boroun dovrunk zaite zann vavurleat.

³Hem zanna zaun, mhojê-i pallien, team soglleam ghòddnneanchi mhenotin chovkoxi kelea uprant, tich kotha tuka, xrêxtt Teofila, kroman boroun dovrunk hanvem ievjilem.

⁴Jeam ghòddnneanchi tuka xikovnn mell’lea, ti kitle khatrechi ti tuka tthavem zaunchê khatir, oxem korchem mhonn mhaka dislem.

⁵Judeiacho raza Herod raj choloitalo tedna, Abiasachea vangddacho, Zakarias nanvacho, êk iadnik aslo; tachi potinn, Elizabet nanvachi, Aaronachê sonstechi asli.

⁶Chukoinastana Sorvesporacheô soglleô adnea ani formavnneô pallun, dogam-i Devachê nodrê mukhar nitivont aslim.

⁷Tankam bhurgem-ball naslem, kiteak Elizabet vanztti asli ani dogam-i utar piraiek pavlelim.

⁸Ani oxem ghòddlem: aplea vangddachê pallien Deva mukhar iadnikachi seva korta astana,

⁹iadniki sevechê chali pormannem, tacher sort poddleli dekhun, dhump zollounk to Sorvesporachea Povitr-Sthanant bhitôr gelo.

¹⁰Dhump zollounchea vellar sogllo lôk bhair ravun magnnem kortalo.

¹¹Dhumpa-vedichê uzvê kuxik ubo aslolo Sorvesporacho êk dut taka dixtti poddlo.

¹²Taka polleun, Zakarias ghaborlo ani tacher kampero denvlo.

¹³Punn devdutan mhonn’lem: “Zakarias, tum kamponaka; tujem magnnem Devan mandun ghetlem. Elizabet tujê potinni thaun tuka êk bhurgo zolmotolo, ani Juanv mhonn tum taka nanv ditoloi.

¹⁴Tum khuxal zaun murgott’toloi ani tachea zolman zaitim zannam khuxal zatelim;

¹⁵tôr to Sorvespora mukhar vhôdd zatolo; soro ani lagrem kitench to pieuncho na; ani aplê avoichea kusveant thaun to Povitr Atmean bhòrtolo.

¹⁶Israelacheam zaiteam putam-dhuvank Sorvespora tanchea Deva-xim to portun haddtolo.

¹⁷Avoi-bapaichim ani tancheam bhurgeanchim kallzam ekameka thãi to vollun haddtolo, fiturank to nitivont mon’xanchi zannvai xikoitolo, ani oxem Sorvesporak purti êk porza toiar korchê khatir, to Tachê fuddem Elijachem mon ani boll gheun choltolo.”

¹⁸Zakariasan devdutak mhonn’lem: “Hem khorem mhonn mhaka koxem gomtelem? Tôr hanv mhataro zalam ani mhoji potinn utar piraiek pavlea.”

¹⁹Devdutan zap diun mhonn’lem: “Hanv, Devachea fuddeant ubo asta to Gabriel. Tujê kodde ulounk ani hi bori khobor tuka diunk mhaka Devan tujê-xim dhaddla.

²⁰Polle, mhojeam utrancher tunvem bhavart dovrunk nãi mhonnun, heô vostu ghoddo porian tum mono urtoloi, tujean ulounk zaunchem na! Mhojim utram mat tanchea vellar pallon ietelim!”

²¹Itlea mhonnosôr lôk Zakariasak ravtalo ani Povitr-Sthanant taka hedo uxir zalo mhonn polleun ojap zatalo.

²²To bhair ietôch, tanchê lagim ulounk tachean nozo zalem dekhun, Povitr-Sthanant ek dorxon taka mell’lam mhonn tim somzolim. To tankam fokot kurvô kortalo, ani monoch urlo.

²³Tache sevadhorm-seveche dis bhòrtôch, to porot aplea ghora gelo.

²⁴Thoddeam disamnim, tachi potinn, Elizabet gorbest zali, ani panch mhoine ti bhitôruch ravli.

²⁵Tinnem mhonn’lem: “Sorvesporanuch hem kelem. Mhojer Apli doiall dixtt ghalun, mon’xam modem hanvem bhôglolo beman Tannem pois kelo.”

²⁶[Elizabetichea gorbestponnachea][1] sovea mhoineant Nazaret nanvachea Galileiantlea eka nogrant Devan Gabriel dutak

²⁷êkê soirik-zal’lê ankvari sorxim dhaddlo. Davidachea Ghoranneantlea eka dadlea lagim tichi soirik zal’li. Tea dadleachem nanv Juze aslem, ani ankvarichem nanv Maria.

²⁸Ti asli thõi vochun, devdutan mhonn’lem: “Noman tuka, Devachê chôdd opurbaiechê! Sorvespor tujê sovem asa.”

²⁹Hem tachem utor aikun, ti ekdom’ ghaborli ani hem noman koslem zait tem chintunk poddli.

³⁰Punn devdutan tika mhonn’lem: “Bhienaka, Mariê! Tum Devachê opurbaiechi.

³¹Aik! Tum gorbest zateli ani eka putak zolm diteli, ani Jezu hem nanv Taka ditelii.

³²To vhôdd zatolo ani Bhov Vorto Dev Taka Aplo Put mhonntolo, ani Tachea bapai Davidachem xinvason Sorvespor Dev Taka ditolo.

³³ani To Jakobachea Ghoranneacher sasnnachea sasnnak raj choloitolo, ani Tachem raj kednanch sompchem na.”

³⁴Marien devdutak mhonn’lem : “Mhaka dadlea lagim sombond na mhonntôch, hem koxem ghòddtelem?”

³⁵Ani devdutan zap diun mhonn’lem: “Povitr Atmo tujer ietolo ani Bhov Vortea Devachi xokti tujer savlli ghalteli. Heach khatir tum zolm diunchi asai tea povitr bhurgeak Devacho Put mhonn Sorvespor nanv ditolo.

³⁶Ani polle, tujê soirê Elizabetin utar piraier eka putacho gorb samball’la ani vanztti mhonntalim ti atam sovea mhoineachi asa.

³⁷Kiteak Devachean zaina mhonnlelem kãich na.”

³⁸Tedna Marien mhonn’lem: “Hi asam hanv Sorvesporachi chakornn: zaum mhojê sovem tujea utra pormannem.” Ani devdut tichê sorxilo koddsorlo.

³⁹Team disamnim Maria utthli ani dongri vattarant, Judachea eka nogrant, doddvoddan geli;

⁴⁰ani Zakariasachea ghorant bhitôr sorun, tinnem Elizabetik noman kelem.

⁴¹Elizabetin Mariechem noman aikona fuddem, tichea kusveant aslelea ballkan uddi marli ani Elizabet Povitr Atmean bhòrli.

⁴²Ani vhoddlea tallean udgarun tinnem mhonn’lem: “Ostoream modem subhagi tum, ani subhagi tujê kuxichem foll!

⁴³Ani mhojea Somiachi avoi mhojê-xim ieunchi mhonn mhaka khõichean favo zalem?

⁴⁴Tôr polle, tujea nomanacho sad mhojea kanar poddona fuddem, mhojea kusveant asto ballkan khuxalkaien uddi marli.

⁴⁵Ani Devan tuka sanglam tem purnntaien pallon ietelem mhonn tunvem bhavart dhôrloi dekhun tum subhagi!”

⁴⁶Marien mhonn’lem: “Mhozo otmo Sorvesporak vakhannta,

⁴⁷Deva mhojea Taroka khatir mhozo jiv murgott’ta!

⁴⁸Aplê chakornnichê lhan’vikaiecher Tannem dixtt ghali: hôi, atanchean soglleô pinddka mhaka subhagi mhonntelêo!

⁴⁹Mhojê khatir vhodd-vhodd vostu keleô Tannem: Sorvbollixtt To, Povitr Nanv Tachem!

⁵⁰Tachi bhokti korteleank pavta pinddkechê pinddkent Tachi doia.

⁵¹Aplea bavlleachi To xokti dakhoita, kallzant gorv dhôrteleank duspottaita.

⁵²Podvedarank To sodram voile xevttita, hinn-holkeank unch ubarta.

⁵³Bhukel’leank To boream-boream denneamnim bhôrta, girestank rikameam hatamnim porot dhaddta. Abrahama ani tachê sonsti khatir sorvkallak amcheam purvozank dil’lea utracho, Aplê kakluticho, Tannem ugddas kelo ani Israela, Aplea chakrak, xeronna ghetlo.”

⁵⁴

⁵⁵

⁵⁶Maria sumar tin mhoine Elizabetichea sangata ravli ani magir aplea ghora portoli.

⁵⁷Itlea mhonnosôr Elizabet porsutt zaunche dis pavle ani tika êk bhurgo zalo.

⁵⁸Devan tichê thãi vhôdd doia dakhoili mhonn aikun, tichim xeza-samarim ani soirim-dhairim tika porbim diunk laglim.

⁵⁹Atthvea disa ballkachi sunôt korunk ailim ani tachea bapaichea nanva pormanem Zakarias mhonn taka nanv diunk sôdtalim,

⁶⁰punn tachê avoin utor ghalun mhonn’lem: “Na, taka Juanv mhonn nanv diunk zai.”

⁶¹Ani tãnnim tika sanglem: “Tujea gotrant tea nanvacho konnuch na.”

⁶²Tedna taka kitem nanv diunchem kai mhonn tachea bapaichi khuxi sodun kaddunk, tãnnim bapai kodde kurvô korun vicharlem.

⁶³Ani tannem folli magun gheun ticher boroilem: “Tachem nanv Juanv.” Ani sogllim ojap zalim.

⁶⁴Teach vellar tachem tondd ugòddlem, tachi jib suttli ani Devachi tust korun to ulounk laglo.

⁶⁵Sogllim xezarim thottaklim ani Judeiachea akhea dongri mulkant heô ghòddnneô gaztaleô

⁶⁶ani aikoteleamnim teô aplea monant rigoun mhonn’lem: “Ho bhurgo koslo utortolo-so tumkam dista?” Kiteak Sorvesporacho hat tachê sovem aslo.

⁶⁷Tacho bapui Zakarias, Povitr Atmean bhoron, oxem bhakit korun uloilo:

⁶⁸“Vakhann’nni Sorvesporak, Israelachea Devak! Kiteak Aplê porjek Tannem bhett dili, Tika soddounk To ailo.

⁶⁹Aplea sevoka Davidachea Ghoranneantlo Tannem amchê khatir eka bollvont Tarokak upzoilo.

⁷⁰Amcheam dusmanachea tabeantlim, ani amcho dvês dhôrteleam soglleancheam hatantlim Apunn amkam soddoitolo mhonn Apleam bhoktivont provadianchê tonddim magam thaun Tannem bhasaillem.

⁷¹

⁷²Amcheam purvozank apunn doia dakhoitolo ani aplea povitr koraracho ugddas kortolo mhonn Tannem sangun dovorlelem.

⁷³Amcheam dusmanancheam hattantlim suttoun, bhiranti vinnem Tachi bhokti korunk, Apunn amkam favo kortolo mhonn soput gheun Tannem amchea bapa, Abrahamak utor dil’lem.

⁷⁴

⁷⁵Oxem ami sogllea amchea jivitant Tachea fuddeant povitr ani promannik zaunk pavtelenv mhonn dil’li bhasavnni ti, Tannem atam pall’li.

⁷⁶Ani ballka mhojea, Bhov Vortea Devacho Provadi mhonn lôk tuka pachartolo, kiteak tum Sorvesporacheô vattô toiar korunk Tachê fuddem vetoloi.

⁷⁷Apleam patkanchem bhogsonnea udexim aplem taronn zata ti ollokh tum Tachê porjek ditoloi:

⁷⁸amchea doiall-maiall Devachea kallzachem dennem hem. Amchê voir sorga velo êk Suria To ude-so kortolo ani amkam bhett diunk dhaddtolo.

⁷⁹Kallokant ani mornnachê savllent jieteleank to Suria uzvadd ditolo ani amchim panvlam xantichea margar ghaltolo.”

⁸⁰Ani bhurgo vaddtam-vaddtam budhin ghôtt zait gelo. Israelak sobhêmazar dixtti poddo-sôr to oronneant ravtalo.