Read Goan Konkani Lk 10 Bible Online

Lk 10 - Goan Konkani bible

Lk 10

¹Hachê uprant Somian anink beastôr zannank nemle ani Apunn vecho aslo tea-tea nogrant ani tê-tê svater tankam dogam-dogank Apnna fuddem dhaddle.

²Ani Tannem tankam mhonn’lem: “Pik khorench khup, punn vavraddi thodde; hea pasot pikachea dhonia lagim aplê lunvnnê-môllnnek vavraddi dhadd mhonn magat.

³Vochat, punn landdgeam modem menddre koxe Hanv tumkam dhaddtam mhonn chotrai dhôrat.

⁴Bhokxem vô bhuti vô vhannô vhoronakat, ani vatter konnakuch hoddkinakat.

⁵Khõichea-i ghorant bhitôr sorxeat zalear, ‘hea ghorak xanti!’ oxem poilench mhonnat.

⁶Xanti favo-aslelim mon’xam thõi astit zalear, tumchi xanti tancher denvteli; na tôr , ti tumchê thãi porot ieteli.

⁷Ekach ghorant ravun, tim kitem-i tunkam ditat tem khaiat ani pieiat, tôr vavraddeak aplo muxaro favo. Ghora-ghorim bhonvonakat;

⁸ani khõichea-i nogrant bhitôr sorxeat ani tim tumkam ievkar ditit zalear, tumkam vaddtat tem jevat.

⁹Thõi astit team vaittakarank borim korat ani ‘Devachem Raj tumchê thãi ieunchem zalem’, oxem sangat.

¹⁰Punn khõichea-i nogrant bhitôr sorxeat ani tim tumkam ievkar dina zatit zalear, rosteancher vochun mhonnat:

¹¹‘Amcheam pãiank lagloli tumchea nograchi dhull porian ami tumcher add zhaddun uddoitanv. Toripunn Devachem Raj ieunchem zalem mhonn zanno zaiat.’

¹²Hanv tumkam sangtam: tea Disa Sodomachi zhôddti toslea nogra itli khôr zaunchi na.

¹³Kotta tujem, Korazin! kotta tujem, Bethsaidê! Tôr tumchê modem keleant tim vismitam Tir ani Sidon nogramnim kel’lim zalear, patkachi dhuk dhorun, aplem jivit-mon bodlun, kamblleachem saka-fottem ghalun ani gobracher bosun tednanchê tednanch tim Devaxim portoto aslim.

¹⁴Zhôddtechea Disa Tirachi ani Sidon’chi zhôddti tumchê itli khôr zaunchi na.

¹⁵Ani tum, Kapernauma, voir mollba porian ubaron pavteli mhonn ravtai kitem? Na! patalla porian tum sokla xevttoteli.

¹⁶Tumchem aikotat tim Mhojem aikotat; tumchi beporva kortat tim Mhoji beporva kortat; ani Mhoji beporva kortat tim Mhaka dhaddla Tachi beporva kortat.”

¹⁷Te beastôr xis khuxalbhorit zaun porot aile. Tãnnim mhonn’lem: “Saiba, Tujea nanvan devchar porian amkam khalte zale.”

¹⁸Ani Tannem tankam sanglem: “Viz koso sorgar thaun poddlolo Hanvem Soitanak dekhlo.

¹⁹Polleiat, sorop ani vinchu ani dusmanachi soglli podvi pãiam tolla mostunk Hanvem tumkam odhikar dila; kãi-ek tumkam vaitt zaunchem na.

²⁰Toripunn devchar tumkam khalte zatat mhonn khuxi zaunchê bhaxek, tumchim nanvam sorgar boroil’lim asat mhonn khuxal zaiat.”

²¹Teach vellar Povitr Atmea udexim sontosan bhoron, Tannem mhonn’lem: “Bapa, sorga ani pritumechea Dhonia, heô vostu zannarank ani xanneank lipoun dovorleôi ani supurleam bhurgeank teô ugteô keleôi mhonn Hanv Tuka vakhanntam. Hôi, Bapa, tôr hench Tuka borem dislem.

²²Sogllem Mhojea Bapan Mhojea hatant ghal’lem asa; ani Put konn to konnuch nokllo bogor Bap; ani Bap konn to konnuch nokllo bogor Put ani zankam Bap dakhoun diunchi Putak khuxi asot tim mon’xam.”

²³Ani Apleam xisam vatten vollon ani tankam kuxin gheun Tannem mhonn’lem: “Tumi polletat tem polletele dolle bhagi;

²⁴tôr Hanv tumkam sangtam: tumi polletat tem polleunk zaite provadi ani patxai axele, punn tankam mellunk na; ani tumi aikotat tem aikunk-ui te axele, punn tankam aikunk mellunk na.”

²⁵Tedna Jezuk kosak lavunk eka dhormxastrean utthun oxem vicharlem: “Guruji, sasnnik jivit mellonk, hanvem kitem korunk zai?”

²⁶Tannem taka oxi zap dili : “Somurtint kitem boroil’lem asa? Tem koxem vachtai, sangxi?”

²⁷Tannem portipallun mhonn’lem: “Sogllea tujea kallzan, sogllea tujea jivachea bollan, sogllê tujê xoktin, ani sogllea tujea monan Sorvespora tujea Devacho tum môg kortoloi, ani tuzo môg kortai tosoch tujea peleacho kortoloi.”

²⁸Ani Jezun taka sanglem: “Tuzo zobab sarko asa; toxench kôr ani tuka jivit melltelem.”

²⁹Punn aplea vicharak karonn asa mhonn dakhounk tannem Jezuk vicharlem: “Tôr mhozo pelo konn?”

³⁰Jezun oso portipall kelo: “Konn-êk monis Jerikeak vochunk Jeruzalea thaun denvun ietalo; vatter to choranchea hatant sampoddlo; tãnnim tachê kodde aslem titlem-i kann gheun, taka ghai poddo-sôr mar ghalo, taka ordo-mel’lo korun sôddlo ani apunn pollun gele.

³¹Tedna oxem ghòddlem: konn-eklo iadnik têch vatten denvun ietalo; tannem taka dekhlo ani dusrê kuxin soron to cholot ravlo.

³²Tosoch êk levit tevxilean pavun sorlo ani taka polleun, to-i dusrê kuxin soron cholot fuddem gelo.

³³Punn êk vattsur Samariekar tevxilean vetana tachê sorxem pavlo ani, taka polleun, tea babddeache taka churchure disle.

³⁴To lagim ailo, tel ani soro lavun tannem tache ghai bandle, taka aplea gaddvacher ghalo ani êkê khannavollint taka vhorun tacho poramôs kelo.

³⁵Dusrea disa tannem don dinar kaddun khannavollkarak dile ani mhonn’lem: ‘Tacho samball kôr ani kitem-i ogllo khôrch tuka zait zalear, hanv porot ietam tedna tuka farik kortolom.’

³⁶Team choranchea hatant sampoddleleacho, heam tegam bhitôr konnem apunn pelo zaun dakhoilem-xem tuka dista?”

³⁷Tannem zap dili; “Tachi doia korun dakhoili tannem.” Tedna Jezun taka sanglem: “Voch ani tum-vui toxench kôr.”

³⁸Magir ghòddlem tem hem: Apli bhonvddi korta astana, Jezu eka ganvant bhitôr sorlo ani Marta nanvachê êkê bailen aplea ghorant Taka soniman kelo.

³⁹Tika Maria mhonnleli êk bhoinn asli; ti Somiachem utor aikunk Tacheam pãiam kodde bosun ravli.

⁴⁰Punn Marta ghoracheam rattimnim bharim harpit zatali; Tachea fuddeant ieun tinnem mhonn’lem: “Jevnnacho sogllo bhar mhojê bhoinnin mhojeruch sôddlo mhonn Tuka kãich poddona? Ie ani mhaka adar di mhonn sang mum tika!”

⁴¹Ani portipallun Somian mhonn’lem: “Marta, Marta, kitleam vostunchi mhonn dhasti tuka?

⁴²Thoddeôch vostu puro, khorem mhonn’lear êkuch gorjechi. Marien boro to vantto vinchun kaddla ani konnuch tichê lagcho to kann gheuncho na.”