Read Goan Konkani Lk 11 Bible Online

Lk 11 - Goan Konkani bible

Lk 11

¹Jezu êkê kodden magnnem korun aslo, ani Tannem tem sompoilea uprant, Tacheam xisantlea konn-eklean Taka mhonn’lem: “Somia, Juanvan apleam xisank magnnem korunk xikoilam toxem, Tum-i amkam xikoi.”

²Tannem tankam sanglem: “Tumi magnnem kortat tedna oxem mhonnat: ‘Bapa, Tujem nanv Povitr zaum; Tujem Raj ieum; Tuji khuxi sorgar zata toxi sonvsarant zaum!

³amcho dispotto giras disachea disa amkam di;

⁴ani amchim patkam bhogôs, kiteak amcher chukleleank ami-i bhôgxitanv; ani amkam tallnnent poddunk dium naka.” punn vaitt vignantlim amkam nivar.

⁵Ani Tannem tankam sanglem: “Tumchê modem konn-ekleak êk ixtt asa mhonn somzat; ani ho modianir tachê-xim vochun taka oxem mhonnta: ‘Ixtta, mhaka tin undde uxnne di;

⁶mhozo êk ixtt vattecho pavun sorla ani taka vaddunk mhojê lagim kãich na.”

⁷Ani tea mon’xan bhitôr thaun oxi zap dili: ‘Mhaka tras dinaka; atam darak khill ghali ani mhojim bhurgim ani hanv nhidunk geleanv; mhojean utthun tuka diunk zaina.’

⁸Ani to darar marituch ravot zalear, Hanv tumkam sangtam, to monis ixttagotik lagun utthun dina zalear-ui, tachê korandaiek lagun taka goroz tem kaddun ditolo.

⁹Toxench Hanv tumkam sangtam: magat ani Dev tumkam ditolo, sôdat ani tumkam melltelem, darar marat ani tem tumkam ugòddtelem;

¹⁰kiteak magtat tim ghetat, sôdtat tankam mellta, ani darar martat tankam tem ugòddtelem.

¹¹Maslli magto aplea putak masllechê svater êk sorôp diit toslo tumchê modem konn bapui asa zait?

¹²Vô tantim magit zalear, bapui taka vinchu kaddun diit?

¹³Tumi vaittovim zaun-ui, tumcheam bhurgeank boreô vostu diunk tumi zannont zalear, tea-vôn kitlo odik tumcho sorgincho Bap Apnna lagim magteleank Povitr Atmo diuncho na?”

¹⁴Mono korun sodd’lo eka monxa velo ek devchar Jezu kaddtalo. Punn to devchar kaddina fuddem to mono ulounk laglo, ani sogllo lôk ojap zalo.

¹⁵Tori astana tea lokantleam kãi zannamnim mhonn’lem: “Beelzebul, devcharanchea pordhana udexim ho monis devchar kaddta.”

¹⁶Her konn-konn Tachi porikxa korunk sorga veli êk khunna Tachê kodde magtalim.

¹⁷Tanchim chintnam ollkhun Jezun oxem tankam mhonn’lem: “Khõichea-i eka rajea bhitôr nagrikanche pongodd ekamekacher uprasun zhuz korunk lagle zalear, tem raj padd zatelem ani ghorar ghor moddon poddtelem.

¹⁸Mhonntôch Soitanachea rajeant-ui ekamekacher zhuztele pongodd asat tôr, tachem raj koxem mhonn ubem dhòrtelem? Hem Hanv sangtam kiteak Beelzebulachê podven Hanv devchar kaddtam mhonn tumi mhonntat!

¹⁹Hanv Beelzebulachê podven devchar kaddtam zalear, tumche pattlavdar konnachê podven kaddtat tôr? Mhonntôch tinch tumchi nit kortelim.

²⁰Punn Hanv Devachê podven devchar kaddtam zalear, Devachem Raj tumchê thãi khorench pavl’lench asa.

²¹Konn-êk bollixtt monis aplim sogllim hatiaram gheun aplem ghor rakhit zalear, tachê kodde asa titleak-ui kãich bhirant na.

²²Punn tachê-kui bollixtt dusro eklo ieun taka haroit tedna, jeam hatiarancher to patietalo tim sogllim ho odik bollixtt monis kann ghetolo ani tacho mal vantt’tolo.

²³Mhojea bhaga nant tim Mhojer add asat; ani Mhojê borabor punzainant tim ximpddaitat.

²⁴Mhello atmo mon’xa velo bhair sortôch, sukea soddear visôv sodit bhonvta, ani taka visôv mellona zaun mhonnta: ‘Hanv bhair sorlolom tea mhojea ghora bhitôr hanv porot rigtolom.’

²⁵Ani thõi ie zalear, tem zhaddlelem ani nettoil’lem taka mellta.

²⁶Tedna to vochun apnna-vôn odik noxtte anink sat atme apnna borabôr gheun ieta; ani bhitôr rigun, thõi te aplem tthikann kortat; ani tea mon’xachi magirli doxa tachê adlê goti poros paxtt zata.”

²⁷To oxem uloita thõich astana zomlelea lokantlê konn-êklê bailen vhoddlea tallean Taka mhonn’lem: ‘Tuka samball’lo to kusvo ani Tuka dud dilem tem horddem bhagi.’

²⁸Punn Tannem mhonn’lem: “Hem khorem; toripunn Devachem utor aikotat ani samballtat tim odik bhagi!”

²⁹Lokachi urpônz Jezu bhonvtonnim vaddot vetali; tedna To oxem mhonnunk laglo: “Hi atanchi pinddka noxtti pinddka; ti êk khunna magta, punn Jonasachi khunna kaddun Dev tika dusri khunna diuncho na;

³⁰kiteak zoso Ninivechea lokak Jonas khunna zal’lo, toso Mon’xacho Put hê pinddkek zatolo.

³¹Zhôddtechea Disa Dokhinnechi Ranni hê pinddkecheam mon’xam borabôr ubi zateli ani ticho guneanv dakhoun diteli, kiteak ti pritumecheam ximam thaun Solomanvachem xanneponn aikunk ail’li; ani, polleiat, Solomanva poros vorto hanga asa Eklo!

³²Ninivecho lôk Zhôddtechea Disa hê pinddkê borabôr ubo zatolo ani ticho guneanv dakhoun ditolo, kiteak Jonasachem provochon aikun tannem aplem jivit-mon bodlun Deva xim porot ailo; ani, polleiat, Jonasa poros vorto hanga asa Eklo!

³³Ponntti lavun konnuch ti êkê lhan kuddint lipoun dovrinant, nhoi mhonn pailê tolla dovrinant, punn bhitôr sortat tãnnim uzvadd polleunchê khatir ti eka peddar dovortat.

³⁴Tujea jivitachi ponn’ti tuzo dollo; tuzo dollo nivôll aslear, sogllem tujem jivit diptibhorit zata; punn tuzo dollo nivôll naslear, tujem jivit-ui kallokant buddon urta.

³⁵Mhonntôch tujê bhitôr asa to uzvadd kallôk zaina zaunk chotrai dhôr.

³⁶Hea pasot, tujem akhem jivit, kosloch kallôk nastana, diptivont zait zalear, tujer aplim kirnnam ghaltelê ponnttê bhaxen, tujem jivit uzvadduch fankoitelem.”

³⁷Jezu uloun thamblo tedna, konn-eklea Farizevan Taka apnnager jevnnak apoilo. Ani To tanger vochun jevnnak boslo.

³⁸Jevnna adim Tannem kiteak hat dhuvunk nant tem polleun, to Farizêv aplea monantuch gholloun vichartalo.

³⁹Ani Somian taka sanglem: “Arê, tumi Farizev patr ani tatt bhailean nitoll kortat, punn tumi bhitorlean nagovnnen ani khotteponnan bhòrleat.

⁴⁰Kitle mhonn pixe tumi! Bhailem toxench bhitorlem teach Devan kelam nhoi?

⁴¹Dekhunuch, tumchê kodde asa tantlem kaddun dublleank diat, ani, polleiat, tumchem sogllem nitoll zatelem.

⁴²Farizevamnô, kottakotta tumchem! Hortelanv, koddipat, ani sogllê torecho bhaji-palo hancho dhavo vantto tumi Devak mhonn farik kortat, punn neainit ani Devacho môg tumi sôddtat. He kaide ki tumi pallunk zai asle, ani te-i chukounche nhoi asle.

⁴³Farizevamnô, kottakotta tumchem! Devsthanamnim poile-voile zage ani tinttear salam’ tumkam zoboruch ruchtat.

⁴⁴Tumchem kotta! Dixtti poddonant ani lôk nokllo zaun tancher cholta tosle fondd tumi.”

⁴⁵Dhormxastreantlea eklean Taka portipallun mhonn’lem: “Guruji, oxem uloun tum amkam-i opman kortai.”

⁴⁶Ani Tannem oxi zap dili: “Dhormxastreamnô, tumchem-i kottakotta! Sõsunk zainant toslim ojim tumi mon’xank vhorunk laitat, punn team ojeank ek bott porian tumi laixat-xe nant.

⁴⁷Kottakotta tumchem! Kiteak provadeank iadgiri bandtat tumi, punn tumcheanch purvozamnim tankam jivexim marle.

⁴⁸Tãnnim tancho jiv kaddlo ani tumi tankam iadgiri bandtat, ani oxem tumcheam purvozanchim kortubam tumi monzur kortat mhonn tumi sarkich govai ditat.

⁴⁹Tea pasot Devachê Zannvaien legun oxem mhonn’lam: ‘Hanv tanchê thãi provadi ani apostl dhaddtolom ani tantleam kãi zannank te jivexim martele ani dhumallo ditele.’

⁵⁰Hea pasot, sonvsar rochla tethun thaun soglleam provadeanchea vikrail’lea rogtacho hê pinddken Devak hixôb diuncho poddtolo.

⁵¹Abelachea rogta thaun tem vedi ani Devmondira modem jivexim marlelea Zakariasachea rogta porian. Hôi, Hanv tumkam sangtam, hê pinddken Devak hea soglleacho hixôb diunchoch poddtolo!

⁵²Dhormxastreamnô, kottakotta tumchem! Kiteak Zannvaiechi chavi tumi gheun geleat; tumi bhitôr sorunk nant te sorunk nant, ani bhitôr sorunk sôdtalim tankam-i tumi bhitôr sorunk diunk na.”

⁵³Hem sangun Jezu thõisorlo bhair sorlea uprant, Farizev ani dhormxastri ekdomuch Tacheam pallank lagle ani tonddak tondd zaunchea monan Taka sobar proxn ghalit ravle.

⁵⁴Te Taka fas manddun Tachea tonddantlea koslea-i utracher Taka dhorunk ravtale.