Read Goan Konkani Lk 12 Bible Online

Lk 12 - Goan Konkani bible

Lk 12

¹Tea mhonnosôr Jezu bhonvtim khup gordi zali ani hozaramnim lôk ekamekak chirdditalo; tedna poilo Apleam xisam lagim uloun Tannem mhonn’lem: “Farizevanchea khomira vixim mhonngê tanchea ddhongeponna vixim chotrai dhorat..

²Atam dhamplolem asa titlem-i ugtem zalea xivai ravchem na.

³Tôr kallokant tumi sanglam tem disa-uzvadda aikunk ietelem ani khasgi kuddant futfutun tumi uloileant tem pattsancher porgott zatelem.

⁴Tumkam, Mhojeam ixttank, Hanv sangtam: kuddicho jiv kaddtat ani tachê magir anink kãi-ek tanchean korunk zaina, tosleank tumi bhienakat.

⁵Punn tumi konnak bhieunchem tem tumkam sangtam: jiv kaddlea uprant emkonddant uddounk tank asa Taka bhieiat. Hôi, Hanv tumkam sangtam, Taka mat bhieiat.

⁶Don as’sarionank[4] panch xerkam viktat nhoi? Tori astana, tantlea ekleachi-i Devak visôr poddona.

⁷Tumchê tokleche kens porian soglle mêzlele asat. Mhonntôch bhienakat. Xerkanchea bhirea poros tumi odik unch molachim.

⁸Tumkam sangtam: mon’xam hujir konn-ui Mhaka mandun ghetit zalear, tankam Mon’xacho Put-ui Devacheam dutam hujir manun ghetolo.

⁹Punn konn-ui mon’xam hujir Mhaka manun ghena zatit, tankam Devacheam dutam hujir Hanv-ui manun gheuncho na.

¹⁰Ani konn Mon’xachea Putacher add kitem-i uloitit, Dev tem tankam bhôgxitolo; punn konn Povitr Atmeachi ninda kortit zalear, Dev ti tankam bhôgxicho na.

¹¹Tumkam devsthanamnim ani nitidaram vô odhikaream mukhar vhortit tedna, koso ani kitem zobab diuncho, vô kitem ulounchem tem, husko dhorinakat.

¹²Tôr tumi kitem mhonnunk zai tem Povitr Atmo, to vêll ietôch, tumkam xikoitolo.”

¹³Lokachea zomeantlea konn-eklean Jezuk mhonn’lem: “Guruji, amkam poddlam tea daizacho mhozo vantto kuxin kaddun mhaka di mhonn mhojea bhavak sang.”

¹⁴Punn Tannem taka oxi zap dili: “Mon’xa, tumchê bhitôr neainit vô vanttop korunk Mhaka konnem nemla?”

¹⁵Magir Tannem tankam sanglem: “Chotrai dhôrat ani dhon-girestkaiechi axa sarkich soddun diat, kiteak konnank puskôll girestkai asli-i zalear, tanchem jivit ticher dhòrlelem na.”

¹⁶Magir Tannem tankam êk vopar sangli : “Êk girest monis aslo ani tacheam xetam-bhattank khup pik zalem;

¹⁷tedna to apnnach bhitôr chintunk poddlo: ‘Mhozo pik-paddo bhorun dovrunk mhojê lagim zago na. Hanvem kitem korchem?’

¹⁸Ani tannem mhonn’lem: ‘Oxem kortolom: mhoje kodde moddun, tanchê-kui vhoddle bandtolom ani mhojeam xetam-bhattanchem sogllem utpon ani mhozo asto-mal tantum bhorun dovortolom.

¹⁹Magir mhakach oxem mhonntolom: jiva mhojea, sobar vorsank puro-so khup mal tujê adhin asa; visôv ghe, kha-pie ani mouz mar.’

²⁰Punn Devan taka mhonn’lem: ‘Arê pixea, az rati tujê koddlo tuzo jiv porot magcho asa. Mhonntôch tunvem toiar korun dovorlãi tem konnank?’

²¹Apnnak ttheve ektthãi kortat punn Deva mukhar girest zaunk nant, tanchi gôt hi!”

²²Uprant Tannem Apleam xisank mhonn’lem: “Dekhunuch Hanv tumkam sangtam: jiva khatir kitem jevchem-khaunchem, vô kuddi khatir kitem nheschem-pangurchem, tê vixim huskenakat.

²³Kiteak mhonn’lear jiv jevnna poros odik molacho ani kudd nhesnna poros odik molachi.

²⁴Kavlleancher barkaien nodor marat; te vompinant vô lunvinant, ani tanchê lagim kodde ani orôv dovorche zage nant; tori Dev tankam pôsta. Suknneam poros kitlim odik molachim nhoi tôr tumi?!

²⁵Ani huske kaddun tumchem auk êk hat-bhôr vaddounk tumchê bhitorlea konnak tank asa?

²⁶Itli lhan vôst tumchê kodde ghoddona tôr, kiteak mhonn her vostum vixim tumi huske kaddtat?

²⁷Konelam koxim vaddtat tem chintun polleiat. Tim koxtt korinant, sut-ui kaddinant; tôr Hanv tumkam sangtam: Solomanv porian sogllea aplea dobajeant tantlea eka sarko nhesunk na.

²⁸Tôr az xetant asa ani faleam kaddun ujeant uddoitat tem tonn hea jin’san Dev nhesoita zalear, tea-vôn kitlo odik tumkam To nettouncho na, holkea bhavartacheam mon’xamnô?

²⁹Mhonntôch kitem khaunchem, vô kitem pieunchem, hacho vichar korunk bosonakat, ani monant husko dhorun jienakat.

³⁰Oslea soglleacher iklo dovorta sonvsarantlo onbhavarti lôk. Tumkam heam soglleam vostunchi goroz mhonn tumcho Bap tôr zannoch.

³¹Tumi zalear, Devachea Rajeacheam nemam pormannem manddlelea jivitacher tumcho iklo dovrat ani sogllem ier-ui To tumkam ditolo.

³²Supurlea hindda, kosloch husko dhorum nakat, kiteak tumkam Raj diunchem mhonn tumchea Bapak khuxi zalea.

³³Tumchê kodde asa tem vikun dhormdan korat. Pornneô zaun pinzonant tosleô potiô, soron-sorona toslo tthevo, sorgar tumkam ballgun dovrat: thõi chôr pavona ani sannôs-ui khaun ibadd korina.

³⁴Tuzo tthevo asa thõi tujem kalliz-ui astelem.

³⁵Tumchea penkttak bandat ani tumcheam hatamnim pettleleô ponntteô gheun ravat.

³⁶Aplo dhoni logna-porbe thaun porot ieun darar marina fuddem, taka dar ugôddchê khatir tachi vatt polleun ravtat tosleam mon’xam porim tumi zaiat.

³⁷Dhoni ieta tedna taka zagrut melltit te chakor bhagi! Khorench tumkam sangtam, to aplea penkttak bandtolo, tankam jevnnak bosoitolo, ani apunn tanchê modem bhonvun tanchi seva kortolo.

³⁸Ani modianir vô fantea para adim porian to pavot zalear ani te taka toxench melltit tôr, te chakor bhagi!

³⁹Hem mat zanno zaiat: khõichea vogtar chôr ietolo to ghoracho dhoni zanno aslo zalear, dubhava-vinn to zagrut ravto aslo ani aplem ghor foddun nagounk diuncho naslo.

⁴⁰Tumi-i toxinch toiar ravat, kiteak chintinaslelea vellar Mon’xacho Put ietolo.”

⁴¹Tedna Pedrun mhonn’lem: “Somia, amkanch vô heram somestank-ui Tum hi vopar sangtai?”

⁴²Somian oxi zap dili: “Ghorant asleleank vogtar jevonn vaddun diunk, dhonian aplea ghorabeacher odhikar dil’lo konn visvaxi ani xanno karbhari zait-so tumkam dista?

⁴³Aplo dhoni ieta tea vellar, aplem kam’ korit astam taka mellot to chakôr subhagi.

⁴⁴Hanv tumkam khorench sangtam, apnna kodde asa titleacher-ui to taka odhikar ditolo.

⁴⁵Punn ‘porot ieunk mhozo dhoni lambai korta’, oxem to chakôr apnnach bhitôr mhonnun, heram chakrank ani chakornnink marunk ani apunn khaunk-pieunk ani bebdikai korunk lagot zalear,

⁴⁶to ravonaslelea disa ani to nokllo aslelê ghoddier tea chakracho dhoni pavtolo ani taka mornnachi xikxa laitolo ani bhavart-nasleleam mon’xanchea vangdda taka bhair uddoitolo.

⁴⁷Aplea dhoniachi khuxi kitem ti zanno zaun-ui, ti pallunk toiari porian korunk na toslea chakrak khup sotteancho mar poddtolo.

⁴⁸Ti kitem ti nokllo asleleak, tacheam kortubank khast favo zalear taka thoddech sotte poddtele. Jeam konnank Devan chodd dilam, tanchê koddchem To chodd magtolo; ani jeam konnank Devan chodd patielam, tanchê koddlem To chodd gheunk ravtolo.

⁴⁹Prithumer uzo pettounk Hanv ailam, tori to petton bhogbhogtalo zalear, kitlo mhonn Hanv khuxi zauncho naslom!

⁵⁰Hanvem ek batism gheuncho asa, ani to ghei porian Mhaka koxê bhaxen jivan jiv na zala!

⁵¹Hanv prithumecher xanti haddunk ailam, oxem tumkam dista? Hanv tumkam sangtam: na, bogor bhêd ghalunk Hanv ailam.

⁵²Hea fuddem ekach kuttumbant panch zannam modem oxi futt poddteli: tegam dogancher add ani dogam tegancher add;

⁵³bapui putacher add ani put bapaicher add; avoi dhuvecher add ani dhuv avoicher add; sasu sunecher add ani sun sasucher add.”

⁵⁴Tannem lokak anink-ui mhonn’lem: “Ostomtê thaun ek kup choddon manddta tem polleun, tumi rokddinch paus ieta mhonntat, ani toxench ghòddta;

⁵⁵ani dokhinnê thaun varem martôch tumi mhonntat: ‘Borich gormi zateli’, ani toxench ghòddta.

⁵⁶Arê ddhongeamnô, prithumechem ani mollbachem tondd koxem parkunchem tem tumi zannont; ho kall parkunk tumchê lagim koxem zaina tôr?

⁵⁷Nitt-sarkem kitem tem tumchinch tumi kiteak tharainant?

⁵⁸Tujea vadea borabôr odhikarea-xim vetastana, tumcho tontto sompounk vatteruch zata titlem-i kôr; na zalear, tim tuka nitidara-xim oddun vhortit, ani nitidar tuka kosabachea hatant diit, ani kosab tuka bondkhonnint ghalit.

⁵⁹Hanv tuka sangtam, tuzo nimanno lepton [5] tunvem farik kori-sôr thõisorli tuka suttka mellchich na.”