Read Goan Konkani Lk 13 Bible Online

Lk 13 - Goan Konkani bible

Lk 13

¹Thoddeam Galileikarank marun, Pilatan tanchem ani te bhettoitale team bolianchem rogot ek kelem, tê vixim thõi asleleam kãi zannamnim teach vellar Jezuk khobor dili.

²Ani portipall diun Tannem mhonn’lem: “Oxem tãnnim bhôgchem poddlem dekhun, soglleam heram Galileikaram poros he Galileiache monis odik patki asle mhonn tumkam dista kitem?

³Hanv tumkam sangtam: toxem nhoi! Punn tumi jivit-mon bôdlina zaxeat zalear, tumi-i toxench mortelet.

⁴Siloamacho gopur poddlo tedna jim otthra zannam morun gelim, tim Jeruzaleant ravteleam heram soglleam mon’xam poros odik guneanvkar aslim, oxem tumkam dista?

⁵Hanv tumkam sangtam: toxem nhoi! Punn tumi jivit-mon bôdlinam zaxeat zalear, tumi-i toxinch mortelet.”

⁶Ani Tannem hi vopar sangli: “Konn-eklean aplea dakanchea molleant ek anjirachem zhadd lail’lem, ani to tachem foll sodunk ailo tedna, taka kãi-ek mellunk na.

⁷Tedna tannem mollo vosoiteleak mhonn’lem: ‘Polle, az tin vorsam zalim hanv hea anjirachem foll sodunk ietam ani mhaka ek-ui mellona. Mhonntôch tem katrun uddoi; bexttich kiteak svat addaita?’

⁸Punn tannem oxi zap dili: ‘Dhonia, hem-i aniek voros tem asum-di; tachea mundak allem kaddun, taka hanv sarem ghaltam;

⁹ghoddiek taka foll zait; na tôr, magir katôr.’ “

¹⁰Jezu, eka Sabbatha disa, eka devsthanant xikovnn ditalo.

¹¹Ovchit Tachê mukhar dixtti poddli otthra vorsam devcharan opangull kel’li êk bail; ti samkich pongi zal’li ani tichean tokli uklun nitt ubi ravunk zainaslem.

¹²Jezun tika polleli ani Apnna-xim tika apoun haddun mhonn’lem: “Agê, tujea vaittantli tum suttlii.”

¹³Ani Tannem Aple hat ticher dovrinam fuddem, ti sarki ubi zali ani Devak dhin’vasunk lagli.

¹⁴Punn Jezun Sabbatha disa pidda-rôg boro kelo dekhun, devsthanacho odhikari pinddollun oso lokak ulounk laglo: “Vavr korunk sô dis dil’le asat; team disamnim ieiat ani borim zaun vochat, Sabbatha disa naka.”

¹⁵Portipallun Somian taka mhonn’lem: “Arê ddhongeamnô, tumchê bhitorlo zonn-eklo davnnek bandlelea paddeak vô gaddvak soddun, taka Sabbatha disa udkak vhoronam?

¹⁶Tôr otthra vorsam devcharan bandun dovorlelê hê Abrahamachê dhuvek hea Sabbatha disa sôddchi nhoi asli?”

¹⁷Oxem To mhonnta astana soglleam Tacheam dusmanank loz zali, punn Tacheô ojapancheô kornneô polleun sogllea lokak motti khôs zali.

¹⁸Ani Tannem mhonn’lem: “Devachem Raj kitea sarkem mhonnchem? Khõichê vostuk Hanvem tachi sôr korchi?

¹⁹Tem sansvachea bia sarkem.[6] Eka mon’xan tem ghetlem ani aplea porsant roilem; tem vaddlem ani tachem vhodd zhadd zalem ani varea veleam suknneamnim ieun tacheam khandiamnim vosti keli.”

²⁰Tannem anink ek sanglem: “Devachem Raj koslê vostuk sôr korum?

²¹Tem oxem: êkê bailen khomir ghetlo ani, môll’lelea pittachim tin vhoddlim mapam dhorun, tantum to purlo, ani sogllench pitt fuglem.”

²²Dor-eka nogrant ani ganvant vochun, To xikovnn diit Jeruzaleachi vatt choltalo.

²³Tedna konn-eklean Tachê lagim vicharlem: “Saiba, soddvônn gheunk pavtelim tim thoddinch kai?” Tannem tankam oxi zap dili:

²⁴“Oxir darvontteantlean bhitôr sorunk zata toxem vavrat, kiteak, Hanv tumkam sangtam, zaitim zannam bhitôr vochunk sôdtelim, punn tanchean zaunchem na.

²⁵Ghorachea Dhonian bhitôr vochun ekdam dar dhamplea uprant, tumi, bhair ravun, darar marun mhonnunk lagtelet: ‘Dhonia, amkam dar ugôdd.’ Ani To tumkam oxem mhonntolo: ‘Tumi khõichim tim Hanv nokllom.’

²⁶Tedna tumi mhonnteleat: ‘Tujea murean ami jevleanv ani pieleanv ani amcheam rosteancher Tunvem xikovnn dileai.’

²⁷Ani To tumkam sangtolo: ‘Tumi khõichim tim Hanv nokllom; vaitt korteleamnô, sogllim tumi Mhojê thaun pois sorat!’

²⁸Tedna Abraham’, Izak, Jakob ani somest provadi Devachea Rajeant aslele ani tumkam bhair uddoil’lim polleun, koxim mhonn tumi thõi rudon korun ani dant korkoraun astelet!

²⁹Udenti, ostomtê, ut’tori ani dokhinnê thaun lôk ietolo ani Devachea Rajeant jevnnak bostolo.

³⁰Ani, polleiat, atam nimannim asat tim poilim zatelim ani poilim asat tim nimannim zatelim.”

³¹Têch ghoddier Farizevantle kãi zann Jezuk sangunk lagle: “Hangasorlo bhair sorun voch, tôr Herod tuzo jiv kaddunk sôdta.”

³²Ani Tannem mhonn’lem: “Vochat ani tea koleak oxem sangat: ‘Chotrai dhôr, Hanv az ani faleam devchar kaddtam ani pidda-rôg boro kortam, ani tisrea disa Mhozo xevôtt zôddtolom.’

³³Toripunn az, faleam ani porvam Hanvem cholot ravunk zai, tôr Jeruzalea bhair morunk eka provadeak puttovna.

³⁴Jeruzalea, Jeruzalea, tum provadeank jivexim martai ani Devan tujê thãi dhaddleleank fatraitai! Kombi apleam pakotteam tolla apleam pilank korta toxem, kitlê pavtti mhonn tujeam bhurgeam-ballank ektthãi korunk Hanv axetalom, punn tem tuka naka zalem!

³⁵Chotrai dhôr, tumchem ghor Dev tumkam soddun dita. ‘Sorvesporachea nanvan ieta taka zôi!’ oxem tumi mhonncho vêll pavo-sôr tumi Mhaka anink polleunchim nant mhonn Hanv tumkam sangtam.”