Read Goan Konkani Lk 14 Bible Online

Lk 14 - Goan Konkani bible

Lk 14

¹Magir oxem zalem: eka Sabbatha disa Farizevanchea konn-eklea mukheliager Jezu jevnnak gel’lo tedna, te Taka tellun polletale.

²Udok angant bhoron suzlolo êk monis Tachea mureant aslo.

³Dhormxastream ani Farizevam lagim uloun Jezun mhonn’lem: “Sabbatha disa piddevontank borim korum-ieta ki na?”

⁴Punn te ogech ravle. Tedna Tannem taka dhorun boro kelo ani dhaddlo.

⁵Ani tanchê lagim uloun Jezun mhonn’lem: “Tumchea konnachoi put vô paddo bãit poddlo zalear, Sabbath mhonnun rokddoch taka kaddinastana to ravot mum?”

⁶Hea utrak zobab diunk tanchean nozo zalem.

⁷Poile-voile zage koxê bhaxen vinchun kaddtale tem polleun, jevnnak apoil’leank Jezun oxi êk vopar sangli:

⁸“Tuka lognachea jevnnak konn apoit tedna, vochun manachê svater bosonaka; kiteak tujê-vôn odik manadik dusrea konnak tannem ghoddiek apoila zait,

⁹ani tumkam dogãik-ui apoileat to thõi ieun tuka mhonnot: ‘Tuji svat haka di.’ Ani tedna, loz zaun, tunvem nimanni svat gheunchi poddot.

¹⁰Hea pasot konn tuka jevnnak apoit tedna, vochun nimannê svater bos; hê porim tuka apoila to iet tedna, taka oxem mhonnunk melltelem: ‘Ixtta, voilê svater vochun bos.’ Tedna borabôr jevnnak bosleleam hujir tuka man zatolo.

¹¹Kiteak apnnankuch unch kaddtat tankam Dev khala uddoitolo ani apunnuch khaltim zatat tankam Dev unch kaddtolo.”

¹²Ani Apnnak apoil’lo taka-i Jezun sanglem: “Tum donparchem vô ratchem jevonn ditai tedna, tujeam ixttam-ixttinnink, vô bhavam-bhonnink, vô soireank, vô girest xezareank apoinaka, kiteak ghoddiek tim-i tuka porot apnnanger apoitit ani tujem apovnnem bad kortit.

¹³Punn jevonn ditai tedna, dublleank, khoddeank, thontteank ani kurddeank apoi.

¹⁴Tanchean tujem apovnnem bad korunk zainam mhonntôch, tum bhagi zatoloi; punn promannik mon’xam punorjivont zatelim tedna, tuji tuka mozuri mellteli.”

¹⁵Hem aikun, borabôr jevnnak bosleleantlea konn-eklean Jezuk mhonn’lem: “Devachea Rajeant jevnnak bostit tim subhagi!”

¹⁶Punn Jezun taka sanglem: “Konn-eklea mon’xan ek vhoddlem rat-jevonn kelem ani zaitea lokak apoilo.

¹⁷Jevnnacho vogôt zatôch, ‘Ieiat, sogllem toiar zalam!’, oxem apoil’leank vochun sangunk, tannem aplea chakrak dhaddlo.

¹⁸Punn sogllech eksarke nibam diunk lagle. Poilean chakrak mhonn’lem: ‘Hanvem bhatt viktem ghetlam, tem mhaka vochun polleunk zai; dekhun mhaka mafi kôr mhonn upkar magtam.’

¹⁹Dusrean mhonn’lem: ‘Hanvem paddeanchim panch zotam viktim ghetleant, tim topasunk vetam; dekhun mafi kôr mhonn upkar magtam.’

²⁰Tisrean mhonn’lem: ‘Hanv halinch logn zalam, mhonntôch mhaka ieunk zaina.’

²¹Hem sogllem chakran porot ieun aplea dhoniak kollit kelem. Tedna pinddollun ghorkaran aplea chakrak sanglem: ‘Nogracheam rosteancher ani bidimnim vegim voch ani goribank, panglleank, kurddeank ani thontteank hanga gheun ie.’

²²Magir chakran mhonn’lem: ‘Dhonia, tujea hukuma pormannem kelem; tori astana anink-ui svat asa.’

²³Ani dhonian chakrak sanglem: ‘Nogra-bhaileam rosteancher ani oddpam modem voch ani mhojem ghor bhòrta toxem lokak bhitôr ieunk boll kôr.

²⁴Hanv tumkam sangtam: apoil’leam bhitorlo eklo legun mhojem jevonn chakunk pavcho na.’ ”

²⁵Khup lokache zome Jezu borabôr choltale ani Tannem vollon tankam mhonn’lem:

²⁶“Zôr konn-ui Mhojê-xim ietit ani aplea bapaicho, avoicho, bailecho, bhurgeancho, bhavancho ani bhoinnincho, ani aplea jivacho porian dvês korina zatit, tankam Mhojeam xisam modem zago na.

²⁷Ani jim konn aplo khuris gheun Mhojê pattlean ienant, tankam Mhojeam xisam modem zago na.

²⁸Tumchê bhitorlo konn-ui êk gopur bandunk sodit zalear, to sompounk goroz titlo khôrch korunk apnna lagim zait ki na, hacho adim-poilo bosun odmas korcho na gai?

²⁹Na tôr, buniad marlea uprant, tem xarti pavounk taka tank na zait zalear, polletat titlim-i tacheô moskoreô korun mhonntelim:

³⁰‘Hea mon’xan bandunk addailem, punn tachean sompounk nozo zalem.’

³¹Vô konn raza dusrea eka razacher zhuz korunk vetolo zalear, dha hozar soinik gheun vis hozaranchi fouz haddta taka apnnachean fuddo korunk zata ki na, tem adim-poilem bosun chintina zait?

³²Zaina tôr, to poisuch astana, niropi dhaddun ‘somadhanachi boli korum-ia’ mhonn magtolo.

³³Têch bhaxen tumchê modlim konn-ui apnnam lagim asot titlem-i soddun dina zatit zalear, tankam Mhojeam xisam modem zago na.

³⁴“Mitt borem; punn mittachi kharsann bigòddli zalear, taka anink kitean portun kharsann diunchi?

³⁵Tem zomnik vô gairik-ui upkaronam. Tem kaddun bhair uddoitat. Aikunk kan asleleamnim aikunchem.”