Read Goan Konkani Lk 15 Bible Online

Lk 15 - Goan Konkani bible

Lk 15

¹Dônddvosuldar ani sogllê torechim patki mon’xam Jezuk aikunk Tachê-xim ietalim;

²ani Farizev toxe dhormxastri gunngunnun oxem mhonntale: “Ho monis patkiank borê bhaxen gheta ani tanchê borabôr jevta-khata.”

³Tedna Tannem tankam oxi êk vopar sangli:

⁴“Tumchê modem xembhôr menddre aslolo konn-êk monis asa mhonn somzat; tantlo ek menddro sanddlo mhonnum-ia; nnoian’nnoi oronneant soddun, sanddla to mello-sôr taka sodunk vochonastam to ravot gai?

⁵Ani to mell’lea uprant, to khuxal zaun taka khandar ghalta

⁶ani, ghora pavtôch, ixttank ani xezareank apoun to mhonnta: ‘Mhojo sanddlolo menddro mell’lo mhonn mhojea vangdda khuxal zaiat.’

⁷Têch bhaxen, Hanv tumkam sangtam, êk patki monis jivit-mon bôdlit zalear, tachê pasot sorgar kedo vhoddlo sontôs zatolo! Jivit-mon bodôlpachi apnnank goroz na mhonn chint’telim nnoian’nnoi promannik mon’xam astit tôr, hanchê pasot sorgar hedo sontôs na mhonn Hanv tumkam sangtam!

⁸Vô rupeache dha nanne asleli konn-êk bail asa mhonn somzat; tantlo êk sanddot zalear, ponntti pettoun, ghorak sarônn marun, to nanno mello-sôr mhenotin to sodinastana ti ravot kai?

⁹Ani to mell’lea uprant, ti apleam ixttinnink ani xezarnnink apoun mhonnta: ‘Mhozo sanddlolo nanno mhaka mell’lo mhonn mhojea vangdda khuxal zaiat.’

¹⁰Têch porim, Hanv tumkam sangtam, êk patki monis jivit-mon bôdlit zalear, Devache dut sontosbhorit zatele.”

¹¹Anink-ui Tannem sanglem: “Konn-eklea mon’xak dog put asle

¹²ani tanchê modlea dhakttean bapaik oxem mhonn’lem: ‘Bapa, mhaka poddta to daizacho vantto mhaka kaddun di.’ Ani tannem tankam daiz vanttun dilem.

¹³Ani thoddeam disam bhitôr dhakttea putan apnnachem aslem titlem-i ektthãi kelem ani ghorantlo bhair sorun to eka poixilea ganvant gelo; ani thõi mostem jivit jieun tannem aplê girestkaiechi vatt laili.

¹⁴Ani tannem sogllem hogddaun uddoitôch, tea ganvant êk khôr bhuk poddli ani to-i oddchonnik sampoddlo.

¹⁵Tedna vochun to tea ganvantlea konn-ekleager chakrek ravlo; ani tannem taka aplea xetant dukram chorounk dhaddlo;

¹⁶ani dukram khatat teô sangô tori khaun aplem pott bhorunk taka khuxi ietali, kiteak konn taka jevnnak kãich dinaslo.

¹⁷Xekim, soirannar ieun, tannem mhonn’lem: ‘Kitle disvoddeache manai mhojea bapaichea ghorant naka-puro zai-sôr jevun-khaun asat, ani hanv hanga bhuken mortam!

¹⁸Tôr hanv utthun mhojea bapai-xim vetolom ani taka mhonntolom: ‘Bapa, hanvem sorgacher ani tujer add patok kelam;

¹⁹mhaka tuzo put mhonnunk anink mhaka favo na; tujeam manaiantlo eklo koso mhaka dhôr.’

²⁰Ani utthun to aplea bapai-xim gelo. Poisuch astana tachea bapain taka dekhlo ani tachem kalliz churchurlem; ani dhanvun vochun tannem taka veng marli ani tache ume gheit ravlo.

²¹Putan taka mhonn’lem: ‘Bapa, hanvem sorgacher ani tujer add patok kelam; mhaka tuzo put mhonnunk anink mhaka favo na.’

²²Tedna bapain apleam chakrank sanglem: ‘Boreantlem borem ek vostr veginchê-vegim haddun taka nhesoiat; tachea bottak mudi ani pãiank vhannô ghalat;

²³gulgulit paddkulo haddun marat; jevonn korum-ia ani borem-borem khaun-pieun khuxal zaum-ia.

²⁴Kiteak ho mhozo put mel’lo, to novean jivont zala; sanddlolo, to porot mell’la.’ Ani tãnnim jevunk suru kelem.

²⁵Tedna tacho vhoddlo put xetant aslo ani ieun ghora lagim pavtam-pavtam tannem songit ani nach zatat tim aikolim

²⁶ani, eka chakrak apoun, kitem zalam kai mhonn tannem vicharlem.

²⁷Chakran zap dili: ‘Tuzo bhav aila, ani to solamoti pavlo mhonn tujea bapain gulgulit paddkulo marla.’

²⁸Punn to zobôr ragar zalo ani portipallun tannem bapaik oxem mhonn’lem:

²⁹‘Polle, itlim vorsam zalim hanv tuji seva-chakri kortam ani tujem utor hanvem kednanch moddunk na, tori mhojeam ixttam borabôr jevunk-pieunk tunvem mhaka kednanch êk bokddo legun dilo nãi;

³⁰punn xindoll bailam borabôr aplem daiz khaun-hogddaun ho tuzo put iena fuddem tunvem tachê pasot datto-motto paddkulo marloi!’

³¹Punn tannem taka sanglem: ‘Puta mhojea, tum sodanch mhojea sangata asai ani jem kitem mhojê lagim asa tem sogllem tujench.

³²Punn borem jevonn korunk ani khuxal zaunk purtem karonn aslem: tôr ho tuzo bhav mel’lo, to novean jivont zala; sanddlolo, to porot mell’la.”