Read Goan Konkani Lk 16 Bible Online

Lk 16 - Goan Konkani bible

Lk 16

¹Jezun Apleam xisank oxem sanglem: “Konn-eklo girest monis aslo ani taka êk mukdom’ aslo; ho tachê girestkaiechi vatt laita mhonn konnem tachê sorxem vochun hacher firiad dili.

²Haka apoun haddun, dhonian vicharlem: ‘Tujê vixim hanv hem aikotam tem kitem? Tujea karbharacho hixôb di; tôr hea fuddem mhozo mukdom’ zaunk tuka mellchem na!’

³Tedna mukdoman apnnach bhitôr mhonn’lem: ‘Mhozo dhoni mhojê koddchem mukdom’ponn kann gheta mhonntôch, hanv atam kitem korum? Khonnunk mhaka sokot na; bhik magunk mhaka loz dista.

⁴Xabas, koll’lem mhaka! Mhaka mukdom’ponna velo nikllailea uprant, konnem tori mhaka apnnager gheunchê khatir hanvem kitem korchem tem mhaka ievzolem!’

⁵Aplea dhoniachea ek-eklea rinnkareak apoun, tannem poilea lagim vicharlem: ‘Mhojea dhoniak tum kitlem devo asai?’

⁶Tannem zap dili: ‘Xembhôr mapam tel.’ Mukdoman taka sanglem: ‘Hem polle tujem lêkhpotr; bos hanga ani vegim tacher pon’nas boroi.’

⁷Magir dusreak vicharlem: ‘Ani tum kitlem devo asai?’ Tannem portipall kelo: ‘Xembhôr khanddiô gonv.’ Mukdoman taka sanglem: ‘Hem polle, tujem lêkhpotr ghe ani oixim boroi.’

⁸Tozviten aplem kam’ kelem mhonn Dhonian tea naddbudhichea mukdomak vornnilo, kiteak sonvsari mon’xam apleam sarkeam lagim cholta-gholltana uzvaddacheam mon’xam poros odik tozvitechim.

⁹Tôr Hanv tumkam sangtam: girestkai sonvsari, punn tumkam ixtt-ixttinni zoddun gheunk ticho upêg korat; oxem, ti ontrun veteli tedna, tim tumkam sasnnacheam biraddamnim svagôt korun ghetelim.

¹⁰Jim ekdom’ unnea molacheam vostumnim khatrechim, tim unch molacheam vostumnim-i khatrechim; ani jim ekdom’ unnea molacheam vostumnim khottim, tim unch molacheam vostumnim-i khottim.

¹¹Mhonntôch, zôr he sonvsari girestkaiecho favo to upêg korunk tumkam patieunk nozo zalem, tôr khori-osôl girestkai tumchea hatant ghalunk konn tumkam patietolo?

¹²Devan tumkam dil’leam tumcheô nhoi team vostumnim tumi zôr visvaxi ravunk nant, tôr tumcheôch zauncheô asat teô vostu Dev koso ditolo tumkam?”

¹³Khõicheach chakran dogam dhonianchi borabôr chakri korum nozo, kiteak to ekleak zolltolo ani dusreacho môg kortolo, vô ekleak chikttun ravtolo ani dusreachi beporva kortolo. Tumchean Devachim ani borabôr girestkaiechim gulam zaum nozo.”

¹⁴Hem sogllem aikun, dhon-girestkaiek lobhdol’le Farizev Tacheô moskoreo korunk lagle.

¹⁵Ani Tannem tankam sanglem: “Mon’xanchê nodrek apunn promannik mhonn dakhounk sôdtat te tumich te, punn Dev tumchim kallzam boro ollkhota; tôr mon’xam unch molachem mhonn lêkhtat tem Deva mukhar kanttallo.

¹⁶Somurt ani Provadeanchi xikovnn Juanvachea kalla porian choltaleô; tê meren Devachem Raj porgott zata ani tantum bhitôr sorunk sogllim nêtt kortat.

¹⁷Somurtintlem ek kuskutt bhair poddchê poros, sôrg ani prithum’ nopoit zaunk odik sompem.

¹⁸Zo aplê potinnik soddun dusrê lagim logn zait, to pordvar korta; ani ghovan soddlelê bailê lagim zo logn zait, to-i pordvar korta.”

¹⁹Konn-êk girest monis aslo; to tambddim ani nazuk sonni vostram nhestalo ani disachea-disa borim-borim jevnnam korun dhadoxi jietalo.

²⁰Ani Lazar nanvacho êk bhikari, soglloch chovnamnim bhoron, tachea darvonttea-xim poddon astalo;

²¹girestachea meza velem poddta tem khaun aplem pott bhorunk to axetalo. Sunnim legun ieun tachim chovnam lenvtalim.

²²Magir êk dis to bhikari melo ani devdutamnim taka Abrahamachea gopant vhorun dovorlo. To girest-ui melo ani taka vhorun purlo.

²³Iemkonddant attevitte bhôgta astana, tannem aple dolle ubarun Abrahamak ani tache kuxik aslelea Lazarak pois dekhle,

²⁴ani oxi bob marli: ‘Abraham’ bapa, mhoje churchure kôr ani aplea bottachi tembi udkant buddoun mhoji jib thôndd korunk Lazarak dhadd, kiteak hea ujeant hanv bharim vollvolltam.’

²⁵Ani Abrahaman mhonn’lem: ‘Puta mhojea, tujea jivitant jitlem tunvem sukh bhôglem, titlem Lazaran dukh sôslem mhonn ugddas kôr; mhonntôch atam taka buzvônn mellta ani tum dogdogtai.

²⁶Titlench nhoi, konn hanga thaun tumchê-xim vochunk sodit zalear, tachean zaina, nhoi mhonn thõi thaun hanga ieunk-ui zaina, kiteak amchê ani tumchê modem mottem vhoddlem patall thirail’lem asa.’

²⁷Tedna tannem mhonn’lem: ‘Toxem zalear, bapa, taka mhojea bapaichea ghora dhadd mhonn tujê lagim poratun magtam;

²⁸tôr mhaka panch bhav asat; te-i hê volvolleanchê svater iena zaunk tannem tankam xiddkaunche.’

²⁹Punn Abrahaman taka sanglem: ‘Tankam Moizes ani provadi asat; tanchem tãnnim aikunchem.’

³⁰Punn tannem portun mhonn’lem: ‘Toxem nhoi, Abraham’ bapa; mel’leantlo konn-ui tanchê-xim vochot zalear, te jivit-mon bodôltele.’

³¹Xekim Abrahaman taka sanglem: ‘Moizesachem ani provadeanchem te aikonant zalear, mel’leantlo konn-ui jivont zalear legun tanchea monant sot rigchem na.”