Read Goan Konkani Lk 17 Bible Online

Lk 17 - Goan Konkani bible

Lk 17

¹Jezun Apleam xisank mhonn’lem: “Bhavart soddun divpacheô tallnneô asteleôch; punn jeam mon’xam udexim teô ietit, tanchem kotta!

²Heam lhanantlea ekleak porian tãnnim bhavart soddunk oddun vorchê adim, tankam golleak danteachem pedd bandun doriant uddoilim zalear, tankam odik borem zato aslem.

³Chotrai dhôrat: tuzo pelo tujer chuk korit tôr, taka xiddkai; ani to apli chuk ollkhun ghetit zalear, taka bhogôs.

⁴Ani to tujer disak sat pavttim chuk korit ani sat pavttim tujê-xim porot ieun ‘mhozo guneanv zalo’, oxem mhonnot zalear, tunvem taka bhôgsuncho.”

⁵Apostlamnim Somiak mhonn’lem: “Amcho bhavart vaddoi.”

⁶Tedna Somian mhonn’lem: “Sansvachea konnea itlo tumkam bhavart asot zalear, ‘umtton voch ani doriant rigun pallam sôdd’, oxem hea amorichea zhaddak tumchean mhonnunk zatelem, ani tem tumchem aikotelem.

⁷Tumchê modem konn-eka mon’xak êk chakôr asa mhonn somzat; xet kosun vô menddram choroun to chakôr porot ghora ieta tedna ‘chol vegim ani jevnnak bos’, oxem taka dhoni mhonntolo kai? Hachê bhaxek,

⁸‘mhojem jevonn toiar kôr ani hanv khai-pie-sôr, penkttak kas marun mezachem kam’ kôr ani magir tum kha-pie’, oxem to mhonncho na kai?

⁹Apnnem sanglelim kamam chakran kelim dekhun dhoniak chakracho upkar astolo kai?

¹⁰Toxench, tumkam sanglelem titlem-i kelea uprant, tumi-i mhonnat: ‘Chaltim-bexttim chakor ami; amcho kaido aslo toch ami pall’la.’ ”

¹¹Jeruzaleak veta astana, Jezu Samariechê ani Galileiachê ximê velean cholot vetalo.

¹²Eka ganvant bhitôr sortana, kodd futtlele dha zann Taka vatter mell’le; te pois ube ravle

¹³ani, vhoddlean ulo marun, tãnnim mhonn’lem: “Jezu, Guruji, amchi kaklut kôr!”

¹⁴Tannem tankam polleun mhonn’lem: “Vochat ani iadnikank tumchem ang dakhoiat.” Ani thõi veta astananch te nitoll zale.

¹⁵Tantlo eklo, apunn boro zalo mhonn dekhona fuddem, Devak vhoddlean vakhannit portun ailo,

¹⁶ani Jezucheam pãiam-xim sorpottun tannem Tache abhar man’le; ani to êk Samariekar aslo.

¹⁷Hem polleun Jezun taka oxem mhonn’lem: “Dha-i zann nitoll zale, nhoi? Her nnov khõi pavle tôr?

¹⁸Hea porkea mon’xa bhair porot ieun Devachi tokhnnai kortolo konnuch na zalo !”

¹⁹Ani Tannem taka mhonn’lem: “Utth ani voch; tujea bhavartan tuka boro kelo.”

²⁰Devachem Raj kedna ieunchem asa tem Farizevamnim Jezu lagim vicharlem tedna, Tannem oxi zap dili: “Nodrek poddtat tosleam khunnamnim Devachem Raj ieunchem na.

²¹‘Hem, polle, hanga asa; tem, polle, thõi asa’, oxem lôk mhonncho na. Tôr zanno zaiat: Devachem Raj tumchê modem asa.”

²²Ani Tannem Apleam xisank sanglem: “Mon’xachea Putacho êk dis tori polleunk tumi axetelet toslo dis ietolo, punn tumkam to polleunk mellcho na.

²³Tedna konn tumkam sangtolo: ‘Ho thõi polle!’ vô ‘Hangasôr polle!’ Bhair soronakat ani tanchê pattlean vochonakat.

²⁴Zoxem zoglavnnem marta tedna, tacho loklôk ontrallachê êkê ximer thaun dusrê ximer porian poddta, toxench, Tacho Dis ieta tedna, Mon’xachea putachem zatelem.

²⁵Punn tea adim To zaitem sôstolo ani hi atanchi pinddka Taka bhairaiteli: hi Devachi khuxi.

²⁶Zoxem Noachea kallar zalem, toxench Mon’xachea Putachea kallar zatelem.

²⁷Noa tarvant bhitôr sorlo to dis porian lôk khata-pietalo, logn zaun ani logn korun diun aslo; tea mhonnosôr poriallo ailo ani tachê vorvim tim sogllim nattak zalim.

²⁸Ani zoxem Lotacheam disamnnim ghòddlem, toxench zatelem. Lôk khata-pietalo, viktalo ani viktem ghetalo, laita-roitalo ani ghoram bandtalo;

²⁹punn jea disa Lot Sodomantlo bhair sorlo, tea disa sorgar thaun ujea-gondhokacho pavs poddun tachê vorvim soglleancho bhosm zalo.

³⁰Mon’xachea Putachi prokasnni zateli tea disa toxench zatelem.

³¹To Dis ietôch konn pattsar astit ani tanchi mustaiki ghorant asot zalear, ti vhorunk tãnnim sokol ieunchem nhoi; toxench xetant astit tãnnim kiteakuch lagun porot vechem nhoi;

³²Lotachê bailek kitem ghòddlem tacho ugddas korat.

³³Aplo jiv samballunk sôdtat tim aplo jiv ibadd kortelim, ani aplo jiv ibadd kortat tim aplo jiv vanchoitelim.

³⁴Hanv tumkam sangtam: tê rati dogam zannam eka antrunnar nidlelim astelim, punn tantlea ekleak vhortele ani dusreak sanddtele.

³⁵Dogi bailô eka dantear dollun asteleô, punn tantlê eklêk vhortele ani dusrêk sanddtele.” [7]

³⁷Tãnnim Jezu lagim vicharlem: “Saiba, khõi?” Ani Tannem tankam sanglem: “Moddem asot thõi gid-ui ektthovtele.”