Read Goan Konkani Lk 18 Bible Online

Lk 18 - Goan Konkani bible

Lk 18

¹Sodanch magnnem korchi goroz ani jiv sôddcho nhoi mhonn Jezun xisank hi vopar sangli:

²“Eka nogrant konn-êk nitidar aslo; taka Devachi bhirant, nhoi mhonn mon’xachi bhidda-i nasli;

³ani tea nogrant konn-ekli vidva-i asli. Tachê-xim ieun-ieun ti oxi magtali: ‘Neai korun mhojea dusmanachea hatantli mhaka nivar.’

⁴Punn zaito kall tannem tichem aikunk na. Tori magir tannem apnnach bhitôr mhonn’lem: ‘Hanv Devak bhienam ani mon’xachi-i bhidda hanv dhorinam khoro;

⁵toripunn hi vidva mhaka tras dita dekhun, hanv tika neai korun ditolom; na zalear ieun-ieun xekim ti mhozo jiv khateli.’ ”

⁶Somian fuddem mhonn’lem: “To khotto nitidar kitem sangta taka chit diat.

⁷Tôr Dev Apnnak dis-rat ulo marteleam Apleam vinchleleank sosnnikaien kan diuncho na ani tancho neai korun tankam nivarcho na?

⁸Hôi, Hanv tumkam sangtam, To tankam veginch nivartolo. Toripunn Mon’xacho Put ietolo tedna, Taka sonvsarant bhavart melltolo kai?”

⁹Apunn promannik mhonn somzun, apnnancheruch patietalim ani herank lekhinaslim tosleam kãi mon’xank Tannem oxi êk vopar sangli:

¹⁰“Dog monis, eklo Farizêv ani dusro dônddvosuldar, magnnem korunk Devmondirant choddun gele.

¹¹To Farizêv nitt ubo ravun oso aplea monant magnnem kortalo: ‘Deva, hanv Tuka dhin’vastam, kiteak hanv heram mon’xam sarko nhoi; te chor-nagovnne, oneaii, pordvari; he-tea dônddvosuldara-i sarko nhoi hanv.

¹²Satolleak don pavttim hanv upas kortam, mhojê kodde asa titleacho-i dhavo vantto farik kortam.’

¹³To dônddvosuldar aplo pois ubo ravlo; dolle porian sorgar lavunk taka kalliz zaina zalem; punn horddem boddoun-boddoun to mhonntalo: ‘Deva, hanv êk patki! mhoji kaklut kôr!’

¹⁴Hanv tumkam sangtam, ho monis Devak manovlolo zaun aplea ghora portolo, punn to dusro Devak manovlolo zaunk na. Kiteak apnnankuch unch kaddtat tankam Dev khala uddoitolo, apunnuch khaltim zatat tankam Dev unch kaddtolo.”

¹⁵Bhurgeam-ballank Jezun hat lavchê khatir, Tachê-xim lôk tankam gheun ietalo; hem polleun xis tankam addaunk lagle.

¹⁶Tedna Jezun team bhurgeank Apnna-xim apoun mhonn’lem: “Bhurgeank Mhojê-xim ieunk diat ani tankam addainakat; kiteak Devachem Raj osleanchench.

¹⁷Bhurgea bhaxen zaun Devachem Raj mandun ghenant tim tantum bhitôr sorchinch nant.”

¹⁸Odhikareantlea eklean Jezu lagim oxem vicharlem: “Borea Guruji, Sasnnik Jivit mellun gheunk hanvem kitem korunk zai?”

¹⁹Jezun taka mhonn’lem: “Mhaka boro kiteak mhonntai? Ekleach Devak kaddun, dusro konnuch boro nhoi.

²⁰Tum adnea tôr zannoi: ‘Jivexim marum noiê; pordvar korum noiê; chorum noiê; lottik govai dium noiê; tujea bapaik ani avoik man di.’ ”

²¹Tea mon’xan Taka zobab dilo: “Bhurgeponnim-san hem sogllem hanv pallun ailam.”

²²Hem aikun Jezun taka sanglem: “Anink ekuch tuka unnem: tujê kodde asa titlem-i vik ani duddu goribank di, ani tuka sorgar tthevo melltolo; magir ie ani Mhozo pattlav kôr.”

²³Him utram aikun, to bhov khontovlo kiteak to khup girest aslo.

²⁴Oso taka polleun Jezun mhonn’lem: “Girestkai asleleank Devachea Rajeant bhitôr sorunk kitlem mhonn kotthin!

²⁵Devachea Rajeant êk girest monis bhitôr sorchê poros, eka unttak suiechea birddeantlean vochunk odik sompem.”

²⁶Aikoteleamnim mhonn’lem: “Toxem zalear, konnak taronn melltelem?”

²⁷Tannem zap dili: “Jem mon’xam kodde ghoddona, tem Deva lagim ghòddta.”

²⁸Tedna Pedrun mhonn’lem: “Polle, ami sogllem sanddun Tuzo pattlav kela.”

²⁹Jezun taka portipall kelo: “Konn-ui Devachea Rajea pasot ghor-dar vô bail, vô bhav-bhoinni, vô avoi-bapui vô bhurgim-ballam sanddtit zalear, Hanv tumkam khorench sangtam,

³⁰tim hea kalla-iugant hachê-kui zaitem ogllem, ani ieta tea kall-iugant sasnnik jivit ghetelim.”

³¹Bara zannank kuxin vhorun, Jezun mhonn’lem: “Ami atam Jeruzaleak choddun vetanv, ani Mon’xachea Puta sombondim provadeam udexim boroil’lem asa titlem-i sompadon ietelem.

³²Taka videxeanchê adhin kortele, he Tacheô moskoreô kortele, Taka jerbond ditele, Tacher thimpi uddoitele,

³³ani jerbond dilea uprant Taka jivexim martele, ani tisrea disa To punorjivont zatolo.”

³⁴Punn hantlem kãich te somzunk nant ani heam utrancho ôrth tankam lipon urlo ani kitea vixim Jezu oxem uloitalo tem te somzukuch nant.

³⁵Jezu Jerikea lagim pavta astanam, konn-eklo kurddo rosteachê deger bhikek bosun aslo.

³⁶Khup lôk tevxilean veta tacho avaz aikun, tem kitem gai mhonn tannem vicharlem.

³⁷Nazaretkar Jezu tennem veta mhonn taka sangtôch,

³⁸to arddun mhonnunk laglo: “Jezu, Davidachea Puta, mhoji kaklut kôr!”

³⁹Ani fuddem vetalim tãnnim ogo rav mhonn taka bobatt keli. Punn odikuch arddun to mhonnot ravlo: “Davidachea Puta, mhoji kaklut kôr!”

⁴⁰Jezu thamblo ani taka Apnna-xim haddunk lavun, to lagim sortôch, Tannem Tachê kodde vicharlem:

⁴¹“Hanvem tuka kitem kel’lem zai?” Tannem mhonn’lem: “Saiba, mhaka novean nodor ie-xi kôr.”

⁴²Jezun taka sanglem: “Novean nodor ghe. Tujea bhavartan tuka boro kelo.”

⁴³Ani rokddich taka nodor aili ani Devachi tust korit to Tachê pattlean gelo. Ani hem polleun, sogllea lokan Devak vakhannlo.