Read Goan Konkani Lk 19 Bible Online

Lk 19 - Goan Konkani bible

Lk 19

¹Jezu, Jerikeant bhitôr sorun, nograntlean cholot vetalo.

²Zakêv nanvacho mukhel dônddvosuldarantlo eklo ani astik monis ovchituch thõi pavlo.

³Jezu konn to, Zakêv polleunk sôdtalo. Punn angan mottvo dekhun, lokachê khettik lagun tachean nozo zalem.

⁴Tea pasot Jezuk polleunchê khatir to fuddem dhanvun vochun eka rumbddichea zhaddar choddlo, kiteak Jezu tê vatten vecho aslo.

⁵Tea zagear pavtôch, Jezun voir nodor marli ani taka polleun mhonn’lem: “Zakêv, vegim denvun ie, tôr az Mhaka tumger vochun ravunk zai.”

⁶Ani to vegim-vegim denvlo ani khuxalkaien Taka apnnager soniman kelo.

⁷Hem polleun sogllea lokan gunngunnun mhonn’lem: “Patki mon’xager ravunk gela mum rê ho!”

⁸Soglleanchê nodrek ubo ravun Zakevan Somiak mhonn’lem: “Saiba, polle, mhaka asa titleacho-i ordo vantto hanv goribank ditam, ani hanvem konnank fosoileant zalear chovpott portun ditam.”

⁹Jezun taka mhonn’lem: “Az hea ghorak taronn ailem, kiteak ho-i Abrahamacho put.

¹⁰Tôr Mon’xacho Put sanddleleank sodun kaddunk ani taronn diunk aila.”

¹¹Lôk hem aikota astana, Tannem anink êk vopar sangli, kiteak To Jeruzaleak lagim pavlolo ani Devachea Rajeachi veginch prokasnni zateli mhonn tim somzotalim.

¹²Mhonntôch Tannem sanglem: “Konn-êk unch kulliecho monis apnnak raza korun gheun porot ieunchê khatir eka poixilea desant gelo.

¹³Apleam dha sevokank apoun haddun, tankam tannem dha bhangra-nanne [8] vanttun dile ani mhonn’lem: ‘Hanv portun ie-sôr, he gheun vepar-dhondo korat!’

¹⁴Tache ganvbhav taka zolltale ani tachê pattlean tãnnim niropi dhaddun oxem sanglem: ‘Ho monis amcho raza zal’lo amkam naka.”

¹⁵Toripunn to raza zaun porot ailo, ani jeam sevokank tannem duddu dil’lo, tantlea zonn-eklean kitlo-so veparacho adav kaddlo tem polleunk tannem tankam apounk laile.

¹⁶Poilean ieun mhonn’lem: ‘Dhonia, tujea eka bhangra-nannean dha bhangra-nanne zôddle.’

¹⁷Tannem zobab dilo: ‘Xabas, borea sevoka! ilê-xê vostunt tum visvaxi zaloi dekhun hanv tuka dha nograncher odhikar ditam.’

¹⁸Ani dusrean ieun mhonn’lem: ‘Dhonia, tujea eka bhangra-nannean panch bhangra-nanne zôddle.’

¹⁹Ani haka-i tannem mhonn’lem: ‘Ani tuka hanv panch nograncher odhikar ditam.’

²⁰Magir tisrean ieun mhonn’lem: ‘Dhonia, tujo bhangra-nanno ho polle asa; eka rumalak bandun hanvem to kuxin dovorlolo;

²¹kiteak mhaka tuji bhirant asli, tôr tum khôr monis; tunvem dovrunk nãi tem tum uklun vhortai ani tunvem vompunk nãi tem tum lunvun ubartai.’

²²Razan taka zap dili: ‘Arê noxttea chakra, tujinch utram dhorun tujer hanv khastichem formonn martam. Hanv khôr monis, hanvem dovrunk na tem hanv uklun vhortam, ani hanvem vompunk na tem hanv lunvun ubartam mhonn tum tôr zanno asloi.

²³Toxem zalear, mhozo duddu tunvem benkent kiteak ghalo nãi? Porot ieun kolantora soit hanv to gheto aslom.’

²⁴Ani thõi asleleank tannem sanglem: ‘Hachê koddcho to bhangra-nanno kaddun gheiat ani dha bhangra-nanne asat taka to diat.’

²⁵Ani tãnnim taka mhonn’lem: ‘Dhonia, tachê lagim dha bhangra-nanne asat mum!’

²⁶‘Tôr hanv tumkam sangtam: jea konna lagim asa, taka anink-ui melltelem; punn jea konna lagim na, tachê lagchem asa tem-i kann ghetele.

²⁷Punn hanv tancho raza zal’lom naka asleleam team mhojeam dusmanank hangasôr haddat ani mhojeam dolleam hujir tancho jiv kaddat.’ ”

²⁸Oxem uloilea uprant, Jeruzaleak choddun vochpachi vatt dhorun, Jezu fuddem gelo.

²⁹Ani oxem ghòddlem: Olivet mhonntat tea Dongra sorxem asto Betfage ani Bethaniê lagim pavtôch, Tannem dogam Apleam xisank dhaddle

³⁰oxem sangun: “Tumchê samkar asto gramant vochat; thõi bhitôr sortanch, ozun porian tacher konnuch bosunk na toslem, ek gaddvachem xingrum, bandlelem tumkam melltelem; tem sôddun hanga haddat.

³¹‘Taka kitea pasot tumi sôddtat?’, oxem konn-ui tumkam vicharit zalear, Somiak tachi goroz asa mhonn taka sangat.”

³²Dhaddlele te gele ani, sanglelem toxem, ek gaddvachem xingrum tankam mell’lem.

³³Tea xingrak te sôddtastana, tacheam dhoniamnim tankam mhonn’lem: “Tea xingrak kiteak sôddtat tumi?”

³⁴Tãnnim oxi zap dili: “Somiak tachi goroz.”

³⁵Ani tãnnim taka Jezu-xim haddlem; aplim avoronnam tea xingracher ghalun, Jezuk tacher bosoilo.

³⁶To fuddem veta astana, lôk aplim vostram vatter patllaitalo.

³⁷Ani Olivet Dongrachê denvtê lagim pavtôch, Tacheam xisancho vhôdd zomo, apnnem dekhleleam soglleam Tacheam vismitam pasot, vhoddlea tallean, khuxalkaien Devak

³⁸oso porkondunk laglo: “Sorvesporachea nanvan ieta tea Razak zôi! Sorgar xanti! Bhov Vortea Devak mhoima!”

³⁹Loka modleam kãi Farizevamnim Taka mhonn’lem: “Guruji, Tujeam xisank oge ravat mhonn formai.”

⁴⁰Ani Tannem tankam oso portipall kelo: “Hanv tumkam sangtam: him ogim ravtit zalear, fator porian arddunk lagtele.”

⁴¹Ani lagim pavtam, Xar nodrek poddtôch, tachê voir dukam golloun

⁴²Tannem mhonn’lem: “Aichea disa tori, tuka xantik pavoupacheo vattô tunvem mat ollkhun ghetloleôi zalear! Punn na; tujeam dolleank teô atam liploleô asat.

⁴³Hôi, tuje dusman tujê bhonvtim matiechim durgam ubartele, tuka veddho ghaltele, ani soglleam vattamnim tuka chinrgôtt’tele, osle tujer dis ietele;

⁴⁴te tuka ani tujeam kottam bhitôr asleleam tujeam bhurgeam-ballank dhornnir apttitele; ani tujê bhitôr fatrar fatôr ubo urunk te diunche nant; kiteak Dev tuka bhett diunk ailo to dis tunvem ollkholo nãi!”

⁴⁵Ani Devmondirant bhitôr sorun thõi vikri korteleank oxem mhonnun To bhair ghalunk laglo:

⁴⁶“ ‘Mhojem Ghor magnneachem ghor’, oxem Povitr Pustokar boroil’lem asa, punn tem tumi choranchi dhôl kelea.”

⁴⁷Ani dispotto Devmondirant xikoit aslo. Mukhel iadnik, xastri, ani porjeche vhoddil Tacho nas korunk sôdtale;

⁴⁸punn kitem ani koxem korchem tem tankam somzoch naslem, kiteak sogllo lôk Tacheam utrank bhul’lolo.