Read Goan Konkani Lk 2 Bible Online

Lk 2 - Goan Konkani bible

Lk 2

¹Sogllea sonvsarachi lôkgonnti korchi mhonn team disamnim Bhov Xrêxtt August Somrazacho [2] hukum’ bhair sorlo.

²Hi poilich lôkgonnti Kirin Siriecho razpal astana zali.

³Ani sogllim ap-aplem nanv lavun diunk ap-aplea ganvak vetalim.

⁴Apunn Davidachea Ghoranneantlo ani kuttumbantlo mhonntôch, Juze-i Galileiantlea Nazaret nogra thaun Judeiantlea Bethlehem’ mhonnlelea Davidachea nogrant gelo.

⁵Apnna lagim lognachem utor zal’lê ani gorbest aslelê Mariê sangatim aplem nanv lavun diunchê khatir tannem toxem kelem.

⁶Ani thõi astananch tiche porsutt zaunche dis bhòrle

⁷ani tinnem aplea malgoddea Putak zolm dilo; ani tankam khannavollint svat nasli dekhun, tinnem taka falliamnim guttlaun khavnnent dovorlo.

⁸Teach kheddea ganvant rat-paro korun gonvlli aple hindd rakhtale.

⁹Sorvesporacho êk dut tanchê sorxem ubo zalo ani Sorvesporachem tez tanchê bhonvtim porzoll’lem ani te bhieun thorthorle.

¹⁰Devdutan tankam mhonn’lem: “Bhienakat! Polleiat, vhodda sontosachi khobor hanv tumkam gheun ailam, ani hoch sontôs sogllê porjek bhògtolo;

¹¹tôr az Davidachea nogrant tumkam êk Soddvonnar zolmola; Toch To Krist Somi.

¹²Ani hi tumkam khunna: falleamnim guttlail’lo ani khavnnent dovorlolo tumkam êk ballôk melltolo.”

¹³Tedna ovchituch tea devduta borabôr Devachi tust gaito devdutanchi êk urpônz sorgar thaun denvleli dixtti poddli;

¹⁴“Bhov unchlea sorgar asto Devak mhoima, ani prithver Tache opurbaiecheam mon’xank Tachi doia ani xanti!”

¹⁵Ani devdut tanchê sorxile kaddun sorgar vetôch gonvlli ekamekak mhonnunk lagle: “Ami Bethlehemak vochum-ia ani jem kitem ghòddlam ani Sorvesporan amkam kollit kelam tem polleun ieum-ia.”

¹⁶Ani vegim-vegim voch zalear, Maria, Juze ani khavnnent dovorlolo ballôk tankam mell’lim.

¹⁷Ballkak polleun, jem kitem Tachê vixim tankam sanglelem, tem tãnnim porgott kelem.

¹⁸Ani gonvlliamnim tankam sangleli khobor aikun sogllim ojap zalim.

¹⁹Maria heô soglleô ghòddnneô aplea kallzant gholloun samballtali.

²⁰Ani apnnank sanglelem toxench sogllem aikolea ani pollelea uprant, Devak mhoima diit ani Tachi vakhann’nni korit gonvlli porot aile.

²¹Ballkachi sunôt korunk atth dis bhòrtôch, Jezu mhonn Taka nanv ghalem; hench nanv To Aplê avoichea kusveant sombhovchê adim devdutan Taka ghalchem mhonn sanglelem.

²²Moizesachê Somurti pormannem tanchi xud’dhi korche dis bhòrle; tedna oxem zalem: “Kusvo ugôddta to dôr-eklo put Sorvesporak bhettoil’lo zatolo”, Sorvesporachê Somurtint boroil’lea hea utracho ugddas korun, ballkak Sorvespora mukhar dovrunk ani, Sorvesporachê Somurtint sanglelem asa tea pormannem, “kovddeanchê zoddiecho, na zalear parveancheam don pileancho” iôdn somorpunk, ballkak Jeruzaleak vhelo.

²³

²⁴

²⁵Tedna Simeianv nanvacho êk promannik ani bhoktivont monis Jeruzaleant aslo; to Israelachê soddvonnechi vatt polletalo ani Povitr Atmo tacher aslo.

²⁶Sorvesporachea Kristak pollelea xivai to morcho na mhonn Povitr Atmean taka kollit kel’lem.

²⁷To Atmeachea preronnan Devmondirant ailo, ani Somurtichê chali pormannem ballka Jezuk korchem aslem tem korunk, avoibapain Taka bhitôr haddlo tedna,

²⁸tannem-i Taka apleam hatamnim ghetlo ani Devachi tust korun mhonn’lem:

²⁹“Tunvem mhaka sanglãi toxem, Tujea hea sevokak, Dhonia, xantin atam vochunk ditai;

³⁰kiteak soglleam raxttram mukhar Tunvem toiar kel’li soddvônn

³¹mhojêch nodren hanvem dekhli:

³²porzank uzvaddaito taronnik-Prokas, Tujê porjê Israel’cho Tunvench favo kel’lo protap!”

³³Ani Tachê vixim mhonnot tem aikun tachea avoibapaik ojap distalem.

³⁴Tedna Simeianvan tankam axirvad dilo ani Tachê avoi, Mariek tannem mhonn’lem: “Aik, Israelant zaitim zannam bhi poddunk, ani zaitim zannam novean utthunk, toxench konn-konn Tacher add vochunk, êk kuru koxi Devan Taka nemla.

³⁵Hea vorvim zaiteanchim gupit chintnam ugtim zatelim. Ani êk torsad tujem kalliz aspas vidhteli.”

³⁶Axerachea kullachi, Fanuelachi dhuv, An’na êk provadinn asli; ti utar piraiek pavleli; logn zalea uprant vidva zai-sôr ti sat vorsam aplea ghova borabôr jiel’li;

³⁷ani atam piraiechim tika chouraixim vorsam zal’lim. Dis-rat upas ani magnnim korun, ti Devachi bhokti kortali ani Devmondirantuch astali.

³⁸Ti-i teach vellar thõi pavun sorun Devak vakhannunk lagli ani Jeruzaleachê soddvonnechi vatt polleun asteleam soglleank ballkachi khobor ti sangunk lagli.

³⁹Ani Sorvesporachê Somurti pormannem korchem aslem titlem-i kelea uprant, tim Galileiant, aplea Nazaret nogrant, porot ailim.

⁴⁰Piraien vaddtana, Bhurgo ghôtt zait vetalo ani zannvaien bhortalo; ani Devacho axirvad Tacher aslo.

⁴¹Tacho avoibapui vorsachea-vorsa Paska-Porbek Jeruzalea vetalo.

⁴²Ani To bara vorsancho zalo tedna, tim sodanchê bhaxen Porbek, Jeruzaleak gelim;

⁴³ani porbeche dis sorlea uprant, portun ietalim tedna, Tachea avoibapaik kollonastana bhurgo Jezu Jeruzaleant pattim ravlo.

⁴⁴Punn To vattecheam sangateam borabôr astolo mhonn somzun, tim eka disachi vatt cholun ailim ani soiream-dhaiream ani ollkhichea loka modem tãnnim Taka sôdlo.

⁴⁵To mellonam zatôch, Taka sodit-sodit tim portun Jeruzaleak gelim.

⁴⁶Ani tin disam uprant To tankam Devmondirant mell’lo: xastream modem bosun To tanchem aikotalo ani tankam vichar korit aslo.

⁴⁷Tachem aikoteleam somestank Tachea gineanachem ani Tacheam zobabanchem mottem ojap dislem.

⁴⁸Taka thõi polleun tim ojap zalim; ani Tachê avoin Taka mhonn’lem: “Puta, Tunvem amkam oxem kiteak mhonn kelvi? Polle, khonti-huske kaddun Tuzo bapui ani hanv Tuka sôdtaleanv.”

⁴⁹Ani Tannem tankam mhonn’lem: “Tumi kiteak mhonn mhaka sôdtaleat? Tôr Mhojea Bapachea ghorant Hanvem asunk zai mhonn tumi nokllo asleat?”

⁵⁰Punn To uloilo tem tankam somzunk na.

⁵¹Ani tanchê borabôr To gelo ani Nazaretak portun ailo; thõi To tankam khalto ravlo. Tachi avoi heô soglleô ghòddnneô aplea kallzant samballun dovortali.

⁵²Ani Jezu zannvaien, piraien ani kurpen Deva ani mon’xam mukhar vaddot vetalo.