Read Goan Konkani Lk 21 Bible Online

Lk 21 - Goan Konkani bible

Lk 21

¹Dhormpettent aplem dan-dennem ghaltalim team astik mon’xank Jezun chotraien pollelim;

²ani konn-eklê gorib-dolldirê vidvek-ui don lepton[9] ghaltana Tannem dekhli

³ani mhonn’lem: “Hanv tumkam khorench sangtam, hê gorib vidven soglleam poros odik ghalem;

⁴tôr hãnnim somestamnim apnnank ogllem aslem tantlem kaddun Devak somorpil’leam danam modem ghalem, punn hinnem apnnak unnem aslem tantlem, aplea jevnna-khannak nibel zai aslem tem-i ghalem.”

⁵Devmondirachi gozal korun, tem kai-boream fatramnim ani Devak bhettoileam danamnim nettoilam, oxem mhonnteleank Jezun sanglem:

⁶“Tumi jem polletat, tacho fatrar fatôr ubo urcho na tosle dis ietele, tem samkem moddun uddoitele.”

⁷Tãnnim Tachê lagim vicharlem: “Guruji, hem kedna ghòddtelem ani heam ghòddnneancho vêll lagim pavla mhonn ollkhunk kosli khunna zateli?”

⁸Tannem mhonn’lem: “Tumkam konnem fottoina zaunk chotraien ravat; tôr zaite zann Mhojea nanvan ieun ‘Hanvuch to’ ani ‘kall lagim pavlo’, oxem mhonntele; tumi tanchê pattlean vochonakat.

⁹Tumi zhuzanchi ani bonddanchi khobor aikoxeat tedna, akantonakat; hem poilem ghoddonkuch zai khorem, punn xevôtt rokddoch ieuncho na.”

¹⁰Magir Tannem tankam sanglem: “Raxttracher raxttr ani rajeacher raj uprastelem;

¹¹hanga-thõi vhoddleô bhikampi zateleô, hanga-thõi dukôll poddtolo, ani voxeachi pidda posorteli; ontrallar bhirankull ghòddnneô ani vhoddleô khunna dixtti poddteleô.

¹²Punn hem sogllem zaunchê adim, Mhojea nanva khatir tumchea angar hat ghaltelim, tumkam devsthananchê adhin korun, bondkhonnint ghalun, razam ani razpalanchea fuddeant oddun vhorun, tumkam dhumallo ditelim.

¹³Mhojê vixim govai diunk ho tumkam soêg melltolo.

¹⁴Mhonntôch tumchi rakhônn koxi korchi ti adim-fuddench tumi chintchem nhoi mhonn ghott monan dhôrat.

¹⁵Tôr Hanv tumkam oxi jib ani zannvai ditolom, ki ti addaunk ani ticher portem ulounk tumcheam soglleam dusmanam kodde ghòddchem na.

¹⁶Tumcho avoibapui, bhavbhoinn, soirim-dhairim, ixtt-mitr tumkam dhorun ditelim ani tumchê bhitorleam kãi zannank jivexim martelim;

¹⁷ani Mhojea nanva pasot sogllim tumcho dvês kortelim;

¹⁸punn tumchea matheachea eka kensacho legun nas zauncho na.

¹⁹Thir ravat, ani Dev tumkam vattaitolo.

²⁰Jeruzaleak foujen veddho ghal’lo tumi polletelet tedna tachem ghorttann pavlem mhonn somzat.

²¹Tedna Judeiant asat tãnnim dongrancher pollun vechem ani Xarant asat tãnnim bhair sorun vechem, ani kheddeam-ganvamnim asat tãnnim Xara bhitôr vechem nhoi;

²²tôr sudd ghevpache dis he ani boroil’lem asa tem sogllem atam pallon ietelem.

²³Te dis ietôch gorbest bailanchem ani ballkank dud diteleanchem kotta! Desacher bhoinkor attevitte ietele ani hê pinddkecher krodhachi xirôntt poddteli

²⁴ani, videxeancho kall bhoro-sôr, tim torvarin moron poddtelim ani tankam koidi korun soglleam raxttram modem tanchi duspôtt zateli ani videxi Jeruzaleak pãiam tolla mostitele.

²⁵Suriacher, chondrimacher ani noketrancher khunna zateleô. Somdir gorozta to aikun ani lharam uchamboll zaleant tim polleun, sonvsarar raxttram sarkinch ghabortelim ani tollmolltelim.

²⁶Prithumecher ieunchem asa tachea huskean kampun mon’xancho jiv vetolo virghun, tôr ontrallacheô xokti kolkolteleô.

²⁷Tedna Mon’xacho Put podven ani vhoddlê mhoimen eka kupa modem ietana tim dekhtelim.

²⁸Hem ghoddonk suru zata tedna ghott ravat ani tumcheô tokleô uklun dhôrat, kiteak tumchi soddvonn lagim pavlea.”

²⁹Ani Tannem êk vopar sangli: “Anjirachea zhaddak ani heram soglleam zhaddank polleiat.

³⁰Tankam kombreo futt’tat tedna gim’ lagim pavla mhonn tumkam kollon ieta;

³¹toxench heô soglleô vostu ghòddleleô tumi polletôch, Devachem Raj lagim pavlam mhonn zanno zaiat.

³²Hanv tumkam khorench sangtam: hem sogllem ghòddlea bogor hi pinddka ontorchi na.

³³Ontrall ani prithum’ sortelim, punn Mhojim utram sorchim nant.

³⁴Tumi tumchi chotrai dhôrat; na tôr, kamcharak lobhdon, bebdikai korun, ani hea jivitache huske kaddun, tumchim kallzam zodd zatit ani to Dis tumcher okosmat pavot.

³⁵Akhê prithumer asleleam soglleam mon’xancher fas koso to ietolo.

³⁶Ieuncheô asat team ghòddnneam modlean surokxitponnim fuddem vochunk ani Mon’xachea Puta mukhar bhiranti vinnem ubim ravunk tumkam ghottai mellchê khatir, sogllea vellar magnnem korun zagrut ravat.”

³⁷Heam disamnim Jezu dis-bhôr Devmondirant xikovnn diit aslo, punn rati kaddtalo xara bhair, Olivet mhonnlelea Dongrar.

³⁸Tachem utor aikunchê axen fantearuch utthun sogllo lôk Tachê-xim Devmondirant ietalo.