Read Goan Konkani Lk 22 Bible Online

Lk 22 - Goan Konkani bible

Lk 22

¹Pask mhonntat ti, Fug-nasloleam Unddeanchi Porob lagim pavtali;

²ani mukhel iadnik ani dhormxastri Jezuk koso dhorun jivexim marcho tem polletale, punn tankam porjechi bhirant asli.

³Judas, add-nanvan Iskariot, barantlo eklo, hachea kallzant Soitan riglo.

⁴Jezuk koxê bhaxen tanchea hatant dhorun diuncho tê vixim tannem vochun mukhel iadnikam ani Devmondirancheam sordaram kodde gozal-mat keli.

⁵Te khuxal zale ani taka duddu diunk te kobul zale.

⁶Hannem utor dilem; ani lokak kollonastana Taka dhorun diunk boro soêg to polleun aslo.

⁷Xekim Paskacho menddro marun bhettouncho to, Fug-nasloleam Unddeancho dis pavlo.

⁸Pedruk ani Juanvak Jezun oxem sangun dhaddle: “Ami Pask-Jevonn korchê khatir, tumi vochun tem toiar korat.”

⁹Tãnnim vicharlem: “Khõi toiar korchem? Tuji khuxi kitem?”

¹⁰Tannem tankam sanglem: “Aikat: tumi Xarant bhitôr sortana udkacho kollso gheun veto konn-êk monis tumkam melltolo; to bhitôr sorta tea ghora porian tachê pattlean vochat,

¹¹ani tea ghorachea dhoniak oxem mhonnat: ‘Guruji tujê lagim vicharta: Mhojeam xisam borabôr Hanvem Pask-Jevonn korunk soireancho vosro khõi asa?’

¹²Ani to tumkam mall’ier êk vhoddlo borê bhaxen jevnnak manddlolo vosro dakhoitolo; thõi toiar korat.”

¹³Te gele ani Tannem sanglelem toxem tankam mell’lem; ani tãnnim Pask toiar kelem.

¹⁴Vêll zatôch Jezu jevnnak boslo ani Tachê sangatim Tache apostl.

¹⁵Tannem tankam sanglem: “Koxtt sõschê adim tumchê sangatim hem Pask-Jevonn korunk Hanv otrekun otrektalom.

¹⁶Khorench tumkam sangtam: hea Paskachi Devachea Rajeant sompadnni zai-sôr, Hanv hem Pask-Jevonn novean korcho na.”

¹⁷Ani Tannem patr ghetlem ani Devak dhin’vasun mhonn’lem: “Hem gheiat ani tumchê bhitôr vanttat.

¹⁸Khorench tumkam sangtam: Devachem Raj ie-sôr dakancheam follanchem hea fuddem Hanv anink pieuncho na.”

¹⁹Ani Tannem unddo ghetlo, Devak dhin’vasun to môddlo, ani to tankam dilo ani mhonn’lem: “Hi mhoji kudd: Hanvem ti tumchê pasot somorpilea. Mhozo ugddas korun hem tumi korat.”

²⁰Têch porim, jevonn zatôch, Tannem patr gheun mhonn’lem: “Hem patr Mhojea rogtan xik’ko marlolo Devacho novo korar: hem Mhojem rogot tumchê pasot Hanvem varoilam.

²¹Tori astana, Mhaka dhorun diteleacho hat Mhojê borabôr hea mezar asa.

²²Devan tharailam tea pormannem, Mon’xacho Put veta khoro, punn zo monis Tacho ghat gheunk veta, tea mon’xachem kotta!”

²³Tanchê modlo oxem konn korit kai mhonn te ekamekak vicharunk lagle.

²⁴Tanchê bhitôr konnak soglleam poros vhôdd mhonn lêkhcho, hê vixim tanchê modem êk vivad-ui zalo.

²⁵Tedna Tannem tankam sanglem: “Raxttranche raza aplea lokacher apli podvi choloitat, ani lokacher odhikar asa tankam ‘borem-dekhto’ mhonntat.

²⁶Tumchê modem oxem zaum noiê! Portench zalear, tumchê modem konn vhoddlo asot to soglleam poros dhaktto zal’lê porim zauncho; ani konn odhikari asot to chakôr zal’lê porim zauncho.

²⁷Tôr konn vhoddlo, jevnnak bosta to, vô tachi chakri korta to? Jevnnak bosta to ki na? Hanv tôr chakri kortelea sarko tumchê modem asam.

²⁸Mhojeam upodreamnim visvaxi-ponnim Mhojea sangata ravleat te tumich;

²⁹hea pasot Mhojea Bapan zoxem Mhaka Raj nemun dilam, toxench Hanv tumchê sorim kortam;

³⁰tumi Mhojea Rajeant Mhojea mezar khaun-pieun astelet ani Israelacheam bara kullanchi mon’subi korunk xinvaso-nancher bostelet.

³¹Simanv, Simanv, polle, gonva porim tumam soglleank challunk Soitanan sot’tea magun ghetlea;

³²punn tuzo bhavart ddonvddollna zaunk Hanvem tujê pasot magnnem kelam, ani tum Mhojê thãi porot ietôch tujeam bhavank ghott kôr.”

³³Tannem mhonn’lem: “Somia, Tujê borabôr bondkhonnintuch vochunk nhoi, punn morunk-ui hanv toiar.”

³⁴Punn Tannem mhonn’lem: “Pedru, Hanv tuka sangtam: az, kombean sad ghalchê adim, Mhaka ollkhoch nãi mhonn tin pavttim tum negar vetoloi.”

³⁵Ani Tannem tankam mhonn’lem: “Tumkam bhokxem, bhuti ani vhannô nastana Hanvem dhaddle tedna tumkam kitem-punn unnem zalem?” Tãnnim zap dili: “Kãich unnem zaunk na.”

³⁶Tannem sanglem: ‘Tôr atam, bhokxem asa tannem tem hatant gheunchem, bhuti asa tannem toxench korchem; torvar na tannem aplem avoronn vikun êk torvar vikti gheunchi.

³⁷‘Khotteam modem taka lêkhlo’, oxem jem Povitr Pustokar boroil’lem asa, tem Mhojê sorim sompadon ieunchem mhonn Devachi khuxi. Hôi, Mhojê vixim jem kitem boroil’lem asa, tem pallon ieta.”

³⁸Tãnnim mhonn’lem: “Somia, heô polle don torvari asat.” Ani Tannem mhonn’lem: “Puro.”

³⁹Ani bhair sorun, Jezu Aplê sonvoiê pormannem Olivet Dongrar vochunk laglo; Tache xis Tachê pattlean vetale.

⁴⁰Tê svater pavtôch, Tannem tankam sanglem: “Tallnnent poddona zaunk tumi magnnem korit ravat.”

⁴¹Ani fatrachê oddi itlo Apunn tanchê-sun pois gelo ani dimbier poddun oxem magnnem korunk laglo:

⁴²“Bapa, Tuji khuxi zalear, Mhojê velem hem patr pois kadd. Toripunn Mhoji khuxi nhoi, Tujich khuxi zaum-di.” [

⁴³Tedna Taka dhir diunk sorgar thaun êk devdut Taka dixtti poddlo.

⁴⁴Ani soglloch kollvollon, odik utsuktaien To magnnem korit aslo. Ani dhornnir gollto rogtacheam datt thembeam vori zalo Tacho gham’.][10]

⁴⁵Ani magnnem kortôch, dhuki-khontin thokon, xisam sorxem utthun ie zalear, te khontin nidlele Taka mell’le.

⁴⁶Ani Tannem tankam mhonn’lem: “Tumi nidtat kiteak? Tallnnent poddona zaunk utthun magnnem korat.”

⁴⁷Oxem uloita thõich astanam, ovchit khup lôk dixtti poddlo ani barantlo eklo, Judas nanvacho, tanchê fuddem ietalo; to Jezucho umo gheunk lagim sorlo.

⁴⁸Tedna Jezun taka mhonn’lem: “Judas, umo gheun Mon’xachea Putak poradhin kortai mum tum?”

⁴⁹Tachê bhonvtim asleleamnim, kitem zata tem polleun, Taka vicharlem: “Somia, torvar ubarchi?”

⁵⁰Ani tanchê bhitorlea eklean porom’-iadnikachea chakracher apli torsad marun tacho uzvo kanuch katorlo.

⁵¹Jezun uloun mhonn’lem: “Itlean puro.” Ani tachea kanak hat lavun taka boro kelo.

⁵²Apnnak dhorunk ail’leam mukhel iadnikank, Devmondiracheam sordarank ani zannteank Jezun mhonn’lem: “Tumi torsadi ani tonnke gheun ieunk, Hanv konn pundd kitem?

⁵³Hanv dispotto tumchê modem Devmondirant aslom tedna, tumi Mhojer hat ghalunk na! Punn ho tumcho vêll ani kallokachi podvi.”

⁵⁴Jezuk dhorun vhelo ani porom’-iadnikager pavoilo. Pedru pois-pois ravun Tachê pattlean vetalo.

⁵⁵Razangnnant modekot dhogtto korun bhonvtim bosleleam modem Pedru vochun boslo.

⁵⁶Konn-eklê chakornnin taka dhogtteak boslolo dekhlo ani boro korun taka polleun mhonn’lem: “Ho-i tachê borabôr aslo.”

⁵⁷Punn tannem na mhonn bhasun portipall kelo: “Agô, hanv taka ollkhoch nam!”

⁵⁸Ani matso vêll uprant, eklean taka polleun mhonn’lem: “Tum-vui team mon’xantloch.” Ani Pedrun mhonn’lem: “Arê mon’xa, hanv nhoi!”

⁵⁹Ani sumar êk hor uprant, anink eklo bhasunk laglo: “Ho-i tachê borabôr aslo mhonn dubhav na; ho-i Galileiacho mum rê!”

⁶⁰Ani Pedrun mhonn’lem: “Arê, tum kitem mhonntai tem hanv nokllom.” Ani rokddoch, to uloita astananch, kombean sad ghalo.

⁶¹Ani porton, Jezun Pedrucher dixtt ghali. Tedna “kombean sad ghalchê adim tin pavttim tum Mhaka ollkhonãi mhonn sangtoloi”, oxem jem Somian sanglelem, tacho Pedruk ugddas ailo,

⁶²ani bhair sorun Pedru dukamnim roddlo.

⁶³Jezuk dhorun asle te Taka marun Tacheô chesttaiô-moskoreô korunk lagle.

⁶⁴Tannim Tache dolle bandle ani Tachea tonddar thapttam marun, Tachê lagim vichartale: “Arê provadea! konnem marlo rê tuka? sang, polleum-ia!”

⁶⁵Ani ninda korun, zaitem Tacher add uloit asle.

⁶⁶Dis uzvaddtôch, lokache vhoddil, mukhel iadnik ani xastri ektthãi zale; Taka aplê neaisobhent vhorun,

⁶⁷tãnnim mhonn’lem: “Tum Krist zalear sang amkam.” Ani Tannem tankam mhonn’lem: “Hanv tumkam sangin zalear, tumi Mhaka sotman’cheak nant;

⁶⁸Hanv tumkam êk vichar korin zalear, tumi kãi Mhaka zap diunche nant.

⁶⁹Hea fuddem Mon’xacho Put Dev-podvechea uzveak bosun astolo.”

⁷⁰Tãnnim soglleamnim vicharlem: “Toxem zalear, tum Devacho Put?” Tannem zap dili: “Tumcheach tonddantlem bhair sorlem utor: Hanv Devacho Put!”

⁷¹Punn tãnnim mhonn’lem: “Anink govai kiteak zai amkam? Tacheach tonddantlem ami tôr aikolem.”