Read Goan Konkani Lk 23 Bible Online

Lk 23 - Goan Konkani bible

Lk 23

¹Tedna zomloli soglli sobha utthli ani Jezuk gheun Pilata-xim geli.

²Ani te Jezucher oxim garamnim korunk lagle: “Amchea lokak bonddai korunk fuloitanam, Somrazak dôndd farik korunk mona kortana, ani apunn Krist, êk rai mhonn sangtana ami taka dhôrla.”

³Pilatan Tachê lagim vicharlem: “Tum Judevancho raza, hôi?” Tannem zap dili: “Oi tum sangtai toxench tem.”

⁴Pilatan mukhel iadnikank ani lokachê zhunddik mhonn’lem: “Hea mon’xacho kosloch guneanv mhaka mellona.”

⁵Punn tãnnim tench zhoroun mhonn’lem: “Ak’khea Judeiant, Galileia meren hangasôr porian, aplê xikovnnen lokak to unchambollaita.”

⁶Oxem mhonnlelem aikotôch, To Galileikar kai mhonn Pilatan vicharlem;

⁷ani, Herodichea odhikara khal To poddta mhonn gomlea uprant, tannem Taka Herodi-xim dhaddlo, Herodi-i team disamnim Jeruzaleak aslo.

⁸Jezuk polleun Herod zobôr khuxi zalo, kiteak Taka polleunk zaito kall-sun to axetalo, karonn Tachi khobor tannem aikol’li, ani Tachea hatantlem koslem-i ek vismit apnnak polleunk melltelem mhonn to ravtalo.

⁹Sobar bhasamnim tannem Jezuk vichar kele, punn Jezu taka kãich zapuch kaddina zalo.

¹⁰Mukhel iadnik ani dhormxastri Tacher thambo-nastanam guneanv ghalit ravle.

¹¹Tedna Herodin apleam soinikam borabôr Taka beman kelo, Taka kenddlo ani sobit dhovem anglem nesoun Taka Pilata-xim porot dhaddlo.

¹²Ani Herod ani Pilat, hachê adim ekamekache dusman asle te, teach disa ixtt zale.

¹³Mukhel iadnikank, vhoddilank ani lokak ektthãi korun

¹⁴Pilatan mhonn’lem: “Lokak bonddai korunk fuloita mhonnun tumi hea mon’xak mhojê-xim haddla; ani, polleiat, tumchê hujir hanvem tachi chovkoxi keli ani tumi tacher firiad ditat tê vixim mhaka hea mon’xacho êk legun guneanv mell’lo na.

¹⁵Ani Herodik-ui mell’lo na. Tannem tôr taka amchê-xim porot dhaddla. Ani, tumi zannont, moronn favo toslem kãi-ek tannem korunk na.

¹⁶Hea pasot taka khast laitam ani sôddtam.” [17 Porbe somoim Pilatan lokachê khuxê pormannem eka koideak soddun diunk zai aslo.][11]

¹⁷

¹⁸Lokachea akhea zomean huiêl marun mhonn’lem: “Haka kadd ani amkam Barab’basak soddun di.”

¹⁹Xarant razbhông ani prannghat tannem kel’lo dekhun, Barab’basak bondkhonnint ghal’lo.

²⁰Jezuk suttka diunk sôdtalo dekhun, Pilat novean tanchê lagim uloilo,

²¹punn tim odikuch arddunk laglim: “Taka khursar mar! Khursar mar taka!”

²²Tannem tisrê pavtti tankam mhonn’lem: “Punn tannem kitem vaitt kelam? Moronn favo toslo guneanv tachê sovem mhaka melloch na. Tea pasot khast lavun taka soddun ditam.”

²³Punn vhoddlean boball korun, Taka khursar marcho mhonn tim thambonastana magtalim; ani tanche talle choddot vetale.

²⁴Xekim tim magtat toxem korchem mhonn Pilatan tharailem.

²⁵Mhonntôch bonddai ani khun kel’lê khatir bondkhonnint ghal’lea mon’xak, tim magtalim toxem, tannem suttka dili ani tankam zai toxem korunk Jezuk tanchê adhin kelo.

²⁶Taka gheun vetastana, konn-eklo Siren’kar, Simanv, gramantlo ietalo; tãnnim taka dhôrlo ani Jezu pattlean khuris gheun vochunk tachea khandar to dilo.

²⁷Tachê pattlean lokachi ani toxench Tachê pasot roddun unch tallean vilap korteleam bailanchi vhoddli urpônz choltali.

²⁸Tedna tanchê vatten vollon Jezun mhonn’lem: “Jeruzaleacheam dhuvamnô, Mhojê khatir roddonakat, punn tumchê khatir ani tumcheam bhurgeam-ballam khatir roddat.

²⁹Tôr, chotrai dhôrat, oxem mhonnpache dis ietele: ‘Bhagi teô vanztteô bailô, bhagi te zolm diunk naslele kusve, bhagi tim dud diunk naslelim hordd’dim!’

³⁰Tedna porvotank ‘Amcher poddat!’ ani dongrank ‘Amkam dhampat!’ oxem mhonnunk lagtelim.

³¹Olea lankddak oxem kortat zalear, sukea lankddachem kitem zaunchem na?”

³²Anink dogam guneanvkarank Tachê borabôr jivexim marunk vhortale.

³³Ani Kortto mhonntat tea zagear pavtôch, Taka ani team dogam guneanvkarank-ui thõi khursar marle, ekak Tachê uzvê kuxik ani dusreak davê kuxik. [34 Jezun mhonn’lem: “Bapa, tankam bhogôs; apunn kitem kortat tem te nokllot.”][12] Magir tãnnim sorti ghalun Tachim vostram vanttlim.

³⁴

³⁵Ani lôk ubo ravun polletalo, punn vhoddil Tacheô kenddnneô korun mhonntale: “Hannem dusreank soddoilim; ho Devanuch vinchum kaddlolo Devacho Krist zalear, hannem apnnakuch soddouncho.”

³⁶Soinik-ui Tacheô kexttaiô kortale ani lagim ieun ani Taka xirko diun

³⁷mhonntale: “Tum Judevancho raza zalear, tukach suttka di!”

³⁸Ani Tachea mathea voir boroun marlolo lêkh oso aslo: “Judevancho raza To Hoch.”

³⁹Khursar umkollteleam guneanv-karantlea eklean Tachi ninda korun mhonn’lem: “Tum Krist nhoi? Tôr tuka ani amkam-i soddoi!”

⁴⁰Punn dusrean zap diun oxi taka bobatt keli: “Têch khastik tum sampoddlolo astana, tum Devak bhienãi?

⁴¹Amkam tori hem nitin favo zalam: amcheam kortubam pormannem ami bhôgtanv; punn hannem kãich vaitt korunk na.”

⁴²Ani tannem mhonn’lem: “Jezu, raiponnachi podvi gheun tum ietai tedna, mhozo ugddas kôr.”

⁴³Jezun taka zap dili: “Hanv tuka khorench sangtam, az tum Mhojea sangata voikunttant astoloi!”

⁴⁴Sumar donpar zal’lo ani tisrea para porian sogllea desacher kallôk poddlo. Suria palovlo;

⁴⁵ani Devmondirantlea Gabhareacho podd’do modekot doxim fanttlo.

⁴⁶Ani vhoddlean arddun Jezun mhonn’lem: “Bapa, Tujea hatant ghaltam Mhozo otmo.” Oxem mhonnun Tannem prann sôddlo.

⁴⁷Ghòddlam tem polleun, xotpotin Devak vakhann’nni diun mhonn’lem: “Khoreaninch ho boro monis aslo.”

⁴⁸Hea dekhaveak zomlolo sogllo lôk, zal’lim ghodditam polleun, hordd’dim boddoit porot vochunk laglo.

⁴⁹Tachê ollkhichim sogllim zannam pois ubim ravun hem polletalim, toxench Galileia thaun Tachê pattlean ail’leô teô bailô.

⁵⁰Ovchit thõi pavlo Juze nanvacho êk dadlo; to Mha-Dhormsobhecho vangddi aslo, êk boro ani nitivont monis.

⁵¹To Judeiachea Arimateia nograntlo aslo. Tanchê ieuzonnek ani kortubank to kobul zaunk na; ani Devachea Rajeachi vatt to polleun aslo.

⁵²Tannem Pilata-xim vochun Jezuchi kudd magli;

⁵³ani ti denvoun êkê olin guttlaili ani tethun-ver konnakuch dovrunk naslo toslê khoddop katrun kel’lê somadhint Taka dovorlo.

⁵⁴To dis Toiarecho Dis aslo ani Sabbath suru zauncho vêll pavlolo.

⁵⁵Galileia thaun Tachê borabôr ail’leam bailamnim, pattlean vochun, somadhi polleli ani koxê bhaxen Tachi kudd tantum dovorlea ti, hem-i chotraien polleun ghetlem.

⁵⁶Magir porot vochun pormollache ani makhnneche nog toiar kele. Sabbatha disa kaidea pormannem tãnnim visôv ghetlo.