Read Goan Konkani Lk 24 Bible Online

Lk 24 - Goan Konkani bible

Lk 24

¹Ani Sabbath zatôch poilea disa, bhov sokallim, apnnem toiar kel’le pormoll gheun teô bailô somadhi-xim aileô;

²ani somadhi veli fatôr pelean dhukol’leli tãnnim dekhli.

³Punn bhitôr voch zalear, Somia Jezuchi kudd tankam mellunk na.

⁴Ani hê vixim mottea gondhollak sampoddleleô astana, ovchituch loklokit vostram nheslele dog dadle tanchê kuxik ube zale.

⁵Tãnnim bhieun khala man bagaili tedna, hãnnim tankam mhonn’lem: “Jivo asa Taka tumi mel’leam modem kiteak mhonn sôdtat?

⁶To hanga na; Taka Devan punorjivont kela! Galileiant astana To tumchê lagim kitem uloil’lo tacho ugddas korat;

⁷Tannem oxem sanglelem: ‘Mon’xachea Putak Dev patki mon’xanchê adhin kortolo, Taka khursar morunk pavoitolo, ani tisrea disa Taka punorjivont kortolo. Hem sogott Tachê vixim Devachi khuxi.’ ”

⁸Tedna tankam Tacheam utrancho ugddas ailo.

⁹Ani somadhi sorxileô porot vochun, tãnnim team ikra zannank ani heram somestank hem sogllem kollit kelem.

¹⁰Hi khobor apostlank sangli teô bailô heô: Mari Magdalen, Juana, Jakobachi avoi Maria ani tanchea sangata asleô teô her bailô.

¹¹Tankam him utram naka zal’li kanni koxi disli ani tãnnim tanchem sotmanunk na. [12 Punn Pedru utthun somadhi-xim dhanvun gelo ani voddôv ghalun tannem oli mat kuxin dovorleleô dekhleô, ani kitem zalem kai mhonn apnnach bhitôr ojap zaun to porot gelo.][13]

¹²

¹³Teach disa oxem ghòddlem: tanchê bhitorle dog zann Jeruzalea thaun sumar ikra kilometr pois aslelea Emaus nanvachea gramant vetale;

¹⁴ani heam soglleam ghodditanchi gozal ekameka lagim te korit asle.

¹⁵Ani oxem zalem: te ekameka lagim uloun bhasabhas kortastana, khud Jezu lagim sorun tanchê borabôr cholunk laglo.

¹⁶Punn tãnnim Taka ollkhona zaunk tancheam dolleancher sai koxi ail’li.

¹⁷Tannem tankam mhonn’lem: “Vatter choltana ekameka lagim tumi kortat teô gozali kosleô?” Te thamble; tanchem tondd chintest-dukhest aslem.

¹⁸Kleopas nanvachea tantlea eklean zap diun mhonn’lem: “Jeruzaleant heam disamnim ghòddlam tachi khobor naslolo tum ekloch hanga iatrekar kitem?”

¹⁹Hea utrak Tannem mhonn’lem: “Kitem ghòddlam?” Tãnnim Taka mhonn’lem: “Nazaretkara Jezu vixim ghòddlam tem: Deva ani akhê porjê mukhar kornneamnim toso utramnim podven bhòrlolo provadi To aslo.

²⁰Amcheam mukhel iadnikamnim ani vhoddilamnim Tacher mornnachem formonn marunk Taka dhorun dilo ani khursar marlo.

²¹Tôr Israelak soddoitolo to Hoch mhonn ami ravtaleanv. Titlench nhoi: heô soglleô vostu ghòddlear az tisro dis.

²²Tea bhair, amchê bhitorleam kãi bailamnim amkam ghabrailim: uzvaddchê adim Tachê somadhi-xim teô geleô,

²³punn Tachi kudd tankam mellunk na; thõi apnnank devdut-ui dixtti poddle ani To jivo asa, oxem te sangtat mhonn porot ieun tãnnim amkam khobor dili.

²⁴Hea pasot amchê boraborchê kãi zann somadhi-xim gele ani bailamnim sanglelem toxench tankam mell’lem, To mat dixtti poddunk na.”

²⁵Tedna Tannem tankam mhonn’lem: “Kitle mhonn gollie tumi! Provade-amnim sanglelem titlem-i sotmanunk kitle mhonn zodd monache monis tumi!

²⁶Devachê khuxê pormannem, Kristan hem sogllem sõschem ani oxem Aplê mhoiment provês korcho, mhonn nokllo asleat tumi?”

²⁷Magir Moizesa ani soglleam provadeam meren Apnnak lagtat titleam-i xastrancho ôrth To tankam sangunk laglo.

²⁸Itlea mhonnosôr, apunn vetale tea grama lagim te pavle, ani Jezun Apunn fuddem veta-xem korun dakhoilem.

²⁹Punn tãnnim poratun mhonn’lem: “Amchê-xim rav, tôr sanz zait aili ani dis dharir poddcho zalo.” Ani To tanchê sangatim ravunk bhitôr gelo.

³⁰Tanchea sangata jevnnak boslolo astana, Tannem unddo ghetlo, Devak dhin’vaslo ani to moddun tankam dilo.

³¹Tedna tanche dolle ugòddle ani tãnnim Taka ollkholo, punn To tancheam dolleam mukhavelo nanch zalo.

³²Tedna tãnnim ekamekak mhonn’lem: “To vatter amchê kodde uloitalo ani Povitr Pustokancho ôrth amkam ditalo tedna, amchem kalliz bhitorlê-bhitôr hulpotalem nhoi?”

³³Ani teach vellar utthun te Jeruzaleak porot gele ani ikra zann ani tanchea sangata ektthovlolim aslim tim tankam mell’lim.

³⁴Hãnnim team dogank sanglem: “Somi khoroch punorjivont zala ani Simanvak dixtti poddla.”

³⁵Ani team dogamnim vatter ghòddleleachi khobor dili ani koxê bhaxen unddo môddta astana apnnem Taka ollkholo, tem sanglem.

³⁶Oxem uloita thõich astana, khud Jezu tanchê modekot ubo zalo; Tannem tankam mhonn’lem: “Xanti tumkam!”

³⁷Ghabrun ani bhieun, apunn polletat to êk bhut mhonn tim somzolim.

³⁸Punn Tannem tankam mhonn’lem: “Tumi ghaborleat kiteak? ani osle dubhav tumchea monant uprastat te kiteak?

³⁹Mhoje hat-pãi polleiat; tôr Hanvuch to. Sanspun polleiat: Mhaka mas ani haddam asat mhonn tumi dekhtat toxem bhutak asonant.”

⁴⁰Oxem uloun Tannem Aple hat ani pãi tankam dakhoile.

⁴¹Khuxalkaien bhoron, tim ozun dubhavtalim ani itlim thottaklelim dekhun, Tannem vicharlem: “Tumchê kodde hanga kitem tori khaunk asa?”

⁴²Tãnnim Taka bhazlelê masllecho kuddko dilo;

⁴³to Tannem tanchê hujir khelo.

⁴⁴Ani Tannem tankam sanglem: “Tumchê sangatim Hanv ozun aslom tedna, Hanvem tumkam sanglelem tem hench: Moizesachi Somurt, Provadi ani Stotram, hantum Mhojê vixim jem boroil’lem asa tem sogllem, Devachê khuxê pormannem, sompadon ieunchem aslem.”

⁴⁵Magir xastrancho ôrth somzunk Tannem tanchi môt ugti keli

⁴⁶ani tankam mhonn’lem: “Boroil’lem asa tem oxem: Krist koxtt-moronn sõstolo, tisrea disa To mel’leantlo punorjivont zatolo,

⁴⁷ani Jeruzalea thaun suru korun Tachea nanvan jivit-mon bodlop ani patkanchem bhogsonnem soglleam porzank porgott zatelem.

⁴⁸Tumi heam ghòddnneanchi sakxi diunk zai.

⁴⁹Polleiat, Mhojea Bapan bhasailam tem Hanv tumcher dhaddcho asam; mhonntôch sorga velê xoktin tumi bhoro-sôr xarant ravat.”

⁵⁰Magir Jezu tankam bhair Betaniê porian gheun gelo. Ani hat uklun tancher Tannem axirvad ghalo.

⁵¹Ani oxem ghòddlem: Tancher axirvad ghalta astana Jezu tanchê sorxilo koddsorlo ani Devan Taka sorgar ubarun vhelo.

⁵²Ani saxttangim poddun tãnnim Jezuk nomoskar kelea uprant, vhoddê khuxalkaien tim Jeruzaleak porot gelim

⁵³ani thambonastanam Devmondirant Devachi tust ani vhoddvik korit aslim.