Read Goan Konkani Lk 3 Bible Online

Lk 3 - Goan Konkani bible

Lk 3

¹Tiberius Somrazachê razvottkechea pondravea vorsa [3] Pons Pilat Zudeiacho razpal, Herod Galileiacho upraza, ani Lizania Abilenecho upraza astana,

²An’nas ani Kaifas porom’-iadnik asle tedna, Zakariasachea puta, Juanvak, oronneant Sorvesporachem utor pavlem.

³Patkanchem bhogsonnem mellun gheunchê khatir jivit-mon bodlun batism gheiat mhonn to Jordanachea akhea vattarant porgottit bhonvtalo.

⁴Izaias provadeachea pustokar boroil’lem asa tea pormannem hem zalem. Tem oxem : “Oronneant arddoto ekleacho tallo to: Sorvesporacho marôg toiar korat; Tacheô vattô nitt korat:

⁵dôr-êk gall bhoron ietolo dôr-êk dongôr ani porvôt sokol poddtolo; vankdde-tinkdde marog nitt zatele, ani gunddeam-fatranche asat te sullsullit zatele,

⁶ani akhem mon’xakull Devachem taronn polletelem”

⁷Apnna koddcho batism gheunk bhair sorun ieto lokachê urponjik Juanv mhonntalo: “Furxeanchi zat tumi! Ieuncho asa to krôdh vattaiat mhonn konnem tumkam xiddkaileant?

⁸Punn tumchem jivit-mon bodòl’lam zalear, tem purteam follamnim dakhoiat, ani ‘amcho bapui Abraham’, oxem tumchê modem mhonnonakat. Tôr hanv tumkam sangtam: heam fatrantli Abrahamak sonsôt utpon korunk Devak tank asa.

⁹Atam legun zhaddanchea mullak kuradd ghal’li asa. Mhonntôch jem-jem zhadd borem foll dinam, tem-tem Dev katortolo ani ujeant ghaltolo.”

¹⁰Ani puskôll lokan taka vicharlem: “Tôr ami kitem korchem?”

¹¹Ani zap diun tannem mhonn’lem: “Don angavlim asat tannem kãich na taka ek diunchem; ani jevunk-khaunk asa tannem toxench korchem.”

¹²Dônddvosuldar-ui batism gheunk aile ani tãnnim taka mhonn’lem: “Guruji, ami kitem korchem?”

¹³Tannem tankam sanglem: “Tumkam tharailam tachê-kui anink kãich ogllem gheum nakat.”

¹⁴Ani soinikamnim-i taka vicharlem: “Ami mhonn kitem korchem?” Ani tannem tankam oxi zap dili: “Konnak zobordosti korinakat, nhoi mhonn konnacher boglantt ghalinakat, ani tumkam kitem mozuri mellta ti gheun dhadoxi zaiat.”

¹⁵“Hoch bi Krist nhoi mum?” oso Juanva vixim lôk khup dubhav kaddun ani zonn-eklo aplea monant odmas korun aslo dekhun,

¹⁶Juanvan tankam somestank zap diun mhonn’lem: “Hanv tumkam udkacho batism ditam khoro, punn mhojê-vôn bollvont konn eklo ieta, ani tacheam vhannanchi vadi soddunk hanv upkarona. Toch Povitr Atmean ani ujean tumkam batism ditolo;

¹⁷Aplem kholl nitoll korunk ani gonv aplea koddeant bhorunk To Aplea hatant sup gheun asa, punn pol zalear palovna toslea ujeant To lastolo.”

¹⁸Heô ani dusreô-i zaiteô budhi diun to lokak xubhvhortoman porgôtt’talo.

¹⁹Herod uprazan aplea bhavachê baile, Herodiasik, apli bail kel’li dekhun, ani tacheam soglleam noxtteam kortubam pasot, Juanv Herodik bexttaitalo;

²⁰tedna upraza odik paxtt vost kortub korunk pavlo ti hi: tannem Juanvak bondkhonnint ghalo.

²¹Magir oxem ghòddlem: sogllea lokan batism gheun somptôch, Jezun-ui batism ghetlo; uprant To magnnem korta astana, sôrg ugto zalo

²²ani Povitr Atmo parveachem rup gheun Tacher denvlo; ani sorgar thaun oso êk tallo gazlo: “Tum Mhozo vhôdd opurbaiecho Put; Tujer Mhojem dhadosponn asa.”

²³Aplo vavr suru kelo tedna Jezu sumar tis vorsancho aslo ani lôk To Juzecho put mhonn somzotalo. Juzecho bapui Heli;

²⁴hacho Mat’that; hacho Levi; hacho Melki; hacho Jan’nai; hacho Juze;

²⁵hacho Matatias; hacho Amos; hacho Nahum’; hacho Esli; hacho Nag’gai;

²⁶hacho Maat; hacho Matatias; hacho Semein; hacho Joxek; hacho Joda;

²⁷hacho Joanan; hacho Resa; hacho Zorobabel; hacho bapui Xalatiel; hacho Neri;

²⁸hacho Melki; hacho Ad’di; hacho Kosam’; hacho Elmadam’; hacho Er;

²⁹hacho Joxua; hacho Eliejer; hacho Jorim’; hacho Mat’that; hacho Levi;

³⁰hacho Simeion; hacho Judas; hacho Juze; hacho Jonam’; hacho Eliakim’;

³¹hacho Meleia; hacho Men’na; hacho Mat’tatha; hacho Natham’; hacho bapui David;

³²hacho Jes’se; hacho Obed; hacho Boaz; hacho Sala; hacho Naxon;

³³hacho Aminadab; hacho Admin; hacho Arni; hacho Hesrom’; hacho Fares; hacho Juda;

³⁴hacho Jakob; hacho Izak; hacho bapui Abraam’; hacho Thara; hacho Nahor;

³⁵hacho Seruk; hacho Reu; hacho Peleg; hacho Eber; hacho Xela;

³⁶hacho Kainam’; hacho Arfaxad; hacho Xem’; hacho bapui Noa; hacho Lamek;

³⁷hacho Matusala; hacho Enok; hacho Jared; hacho Maleleel; hacho Kainam’;

³⁸hacho Enos; hacho Set; hacho Adanv; hacho bapui Dev.