Read Goan Konkani Lk 4 Bible Online

Lk 4 - Goan Konkani bible

Lk 4

¹Povitr Atmean bhòrlolo Jezu, Jordana thaun koddsorlo. Taka oronneant vhorun, thõisor challis dis Povitr Atmo Taka hanga-thõi bhonvddaitalo ani Devchar Taka naddit aslo. Team disamnim Tannem kãich khelem na, ani te dis zatôch Taka bhuk lagli.

³Devcharan taka mhonn’lem: “Tum Devacho Put zalear, hea fatrak unddo zaunk adnea kôr.”

⁴Punn Jezun taka oso portipall kelo: “Povitr Pustokar oxem boroil’lem asa: ‘Unddeanuch monis jiena.’ ”

⁵Magir Devcharan Taka eka unch zagear vhelo ani êkêch ghoddiê bhitôr sonvsarantlim sogllim rajeam Taka dakhoun

⁶mhonn’lem: “Heam soglleancher podvi ani tanchi mhoima hanv tuka ditolom, kiteak mhojê svadhin hem kel’lem asa ani mhaka khuxi asa taka hanv tem ditam;

⁷mhonntôch mhojeam pãiam poddun tum mhaka nomoskar korxi zalear, hem sogllem tujem zatelem.”

⁸Tedna Jezun portipall korun taka mhonn’lem: “Povitr Pustokar oxem boroil’lem asa: ‘Tujea Sorvespora Devak tum bhôztoloi ani Tachi ekleachich seva kortoloi.’ ”

⁹Magir Devcharan Taka Jeruzaleak vhelo ani Devmondirachea kollsar ubo korun Taka mhonn’lem: “Tum Devacho Put zalear, hanga thaun sokla uddki mar,

¹⁰kiteak Povitr Pustokar oxem boroilelem asa: ‘Tuzo samball korunk To Apleam dutank Tujê vixim adnea ditolo;’

¹¹ani anink êkê svater: ‘Tuzo pãi fatrak adollna zaunk, te tuka apleam hatamnim uklun dhôrtele.’ ”

¹²Punn portipall korun Jezun mhonn’lem: “Povitr Pustokar oxem boroil’lem asa: ‘Sorvespora tujea Devachi tunvem porikxa korum noiê.’ ”

¹³Heam soglleam bhasamnim Taka tall’neant ghalea uprant, Devchar thoddea vellak Tachê sorxilo koddsorun gelo.

¹⁴Jezu Povitr Atmeachea bollan Galileiak porot gelo ani Tachi kirti akhea prantant gazli.

¹⁵To tancheam devsthanamnim xikovnn ditalo ani sogllim Tachi vhoddvik sangtalim.

¹⁶To Nazaretak ailo; thõi To lhan-vhôdd zal’lo. Aplê sonvoiê pormannem Sabbatha disa To devsthanant gelo ani vachunk ubo ravlo.

¹⁷Izaias provadeachem pustok Taka kaddun dilem ani pustokacho kovllo usoitana oxem boroil’em asa ti svat Taka mell’li:

¹⁸“Sorvesporacho Atmo mhojer asa, kiteak goribank bori khobor diunk, Tannem mhaka Obhixêk kela. Koidiank suttka porgottunk, ani kurddeank portun nodor diunk, zulumak sampoddleleank soddounk,

¹⁹ani Sorvesporacheam upkaranchem voros porgott korunk Tannem mhaka dhaddla.”

²⁰Ani pustokacho kovllo revddun ani to sevoka kodde porot diun To boslo. Devsthanant asleleam somestanche dolle Tacher lailele asle.

²¹Tedna Tannem tankam sangunk suru kelem: “Hem xastr-likhit az tumchea kanar poddtanch pallon ailem.”

²²Ani sogllim Taka xabaski ditalim ani Tachea tonddantlim bhair sortalim tim mannkulim utram aikun ojap zatalim. Tim mhonnunk laglim: “Juzecho put nhoi rê ho ?!”

²³Ani Tannem tankam zap dili: “ ‘Voiza, tukach tum boro kôr’, hi mhonn’nni dubhavavinn tumi Mhaka laitelet, ani mhonntelet: ‘Kapernauma tunvem zaitem kelãi mhonn ami aikolam, tem hanga-i tujea khaxa ganv-ghora kôr.’ ”

²⁴Tea fuddem Tannem mhonn’lem: “Hanv tumkam khorench sangtam, khõicheach provadeak aplea khaxa ganvant man mell’lo-so na.

²⁵Anink ek sot tumkam sangtam: Elijachea kallar, tin vorsam ani sov mhoine Devan sôrg dhampun dovorlolo ani akhea ganvant vhôdd bhuk poddleli tedna, Israelant zaiteô vidva asleô,

²⁶punn Sidon mulkantlea Sarepta nograntlê vidvek kaddun, tantlê eklê-i sorxim Devan Elijak dhaddunk na.

²⁷Toxench Elizêv provadeachea kallar zaitim koddkar aslim, punn Siriechea Naamanak kaddun, tantlea ekleak-ui Devan nitôll kkorunk na.”

²⁸Ani hem aikun devsthanant aslim titlim-i ekdom’ ragar zalim;

²⁹ani utthun tãnnim Taka nogra bhair ghalo. Tanchem nogor bandlelem asa tea dongrachea mathear thaun Taka sokla xevttun uddounk, thõi porian tim Taka gheun gelim,

³⁰punn sarko tanchê modlean cholun To Aplê vatten gelo.

³¹Ani Galileiantlea Kapernaum’ nogrant To denvun gelo ani Sabbatha disa tankam xikovnn diunk laglo.

³²To odhikar aslelê porim uloitalo dekhun, Tachê xikovnnê vixim tim bharim ojap zatalim.

³³Mhello devchar boslolo êk monis devsthanant aslo ani tannem vhoddlean arddun mhonn’lem:

³⁴“Ai Saiba! Nazaretkara Jezu, amchê kodde Tuka koslem kam’ asa? Amcho bhosm korunk ailai kitem? Tum konn to hanv zannom: Devacho sonvskarlolo sondexkar Tum!”

³⁵Punn Jezun taka dhomkaun mhonn’lem: “Ogo rav ani hea mon’xa velo bhair sor!” Ani soglleam modekot taka dhornnir apttun punn mat-ui dukhoinastana, devchar tachê velo bhair sorun gelo.

³⁶Sogllim ojap zalim ani ekamekak mhonnunk laglim: “Koslem mhonn utor hem! Odhikaran ani podven To mhelleam atmeank adnea korta ani te bhair sorun vetat!”

³⁷Ani Tachi khobor ganvam-ganvamnim akhea prantant gazli.

³⁸Devsthanantlo bhair sorun Jezu Simanvachea ghora gelo. Simanvachi sasu mottea zoran foddfoddtali ani tãnnim tichê pasot Taka vinoti keli,

³⁹Ticher oddôv ghalun Tannem zorak hukum’ ghalo ani ticho zôr poddlo; ani rokddich utthun ti tancho poramôs korunk lagli.

⁴⁰Dis dharir poddlea uprant jin’sam-bhasancheam boll’llikarank Tachê sorxem haddlim. Ani ek-ekleacher hat dovrun Tannem tankam borim kelim;

⁴¹zaiteam zannam vele devchar-ui kaddle ani te bob marun mhonntale: “Tum Devacho Put!” Ani Apunn Krist mhonn te zanno asle dekhun To tankam bobatt korun ulounk dinaslo.

⁴²Uzvaddtôch bhair sorun, To eka eksurea zagear gelo. Lôk Taka sodit-sodit To aslo thõi pavlo ani apnnank Tannem soddun vochona zaunk tim proitn kortalim.

⁴³Punn Tannem tankam mhonn’lem: “Devachea Rajeachem xubhvhortoman heram-i ganvamnim Hanvem porgottunk zai, tôr heach pasot Devan Mhaka dhaddla.”

⁴⁴Ani Judeiacheam devsthanamnim To provochon korit aslo.