Read Goan Konkani Lk 5 Bible Online

Lk 5 - Goan Konkani bible

Lk 5

¹Uprant ghòddlem tem hem: Devachem utor aikunk lôk Jezu bhonvtim chenchon aslo ani To Genesaret Tolleachê dodder ubo aslo.

²Tedna thõi tolleachê deger Tannem don hoddim pollelim; kharvi denvun rampnni dhutale.

³Tantlem ek hoddem Simanvachem aslem; tacher To choddlo ani tem toddik thaun matxem pois vhorunk Tannem maglem; ani hoddear bosun, thõi thaun To lokak xikovnn ditalo.

⁴Uloun zatôch, Tannem Simanvak sanglem: “Khol udkant hoddem bhair vhor ani maslli dhorunk tumcheô rampnni ghalat.”

⁵Taka zap diun Simanvan mhonn’lem: “Guruji, rat-bhôr ami koxtt kele, punn amkam kãich sampoddo naslam; toripunn Tujea utrak hanv rampônn ghaltam.”

⁶Oxem kelea uprant tankam itli khup maslli poddli ki tancheô rampnni pinzunk pavleleô;

⁷ani ieun apnnank adar diunk dusrea hoddeant asleleam bhagidarank tãnnim khunna korun apoile. Te aile ani buddunk pavo-sôr don-ui hoddim bhòrlim.

⁸Tem pollena fuddem Simanv Pedrun Jezucheam pãiam poddon mhonn’lem: “Mhojê sorxilo pelean sor, Saiba: hanv êk patki monis!”

⁹To ani tachê borabôr aslele title-i, poddleli maslli polleun, sarkech thotthakle;

¹⁰têch porim Simanvache bhagidar aslele te, Zebedevache put, Jakob ani Juanv. Ani Jezun Simanvak mhonn’lem: “Bhienaka, hea fuddem tum mon’xank dhôrtoloi.”

¹¹Ani hoddim toddik kaddun, sogllem sanddun, te Tachê pattlean gele.

¹²Jezu nogrant astana, ovchituch koddan bhòrlolo êk monis ailo ani Taka pollena fuddem dhornnir omto poddlo ani Tachê kodde oxem magunk laglo: “Saiba, Tuka zai zalear, Tujean mhaka nitôll korunk zata.”

¹³Ani Jezun Aplo hat soddun taka lailo ani mhonn’lem: “Hôi, Mhaka zai, tum nitôll za!” Têch ghoddier tachem kodd nanch zalem.

¹⁴Ani Jezun taka adnea keli: “Konnakuch sanginaka, punn voch ani tujem ang iadnikak dakhoi; ani porjek tuji pekovnni ruzu korchê khatir, tum nitôll zalai mhonn Moizesan formail’lem dan bhettoi.”

¹⁵Punn Tachi khobor odikuch gazot vetali ani Tachem utor aikunk ani aplea piddê-rogantlo boro zaunk urponjimnim lôk ietalo.

¹⁶Punn To khõi-khõi eksurê svater vochun magnnem kortalo.

¹⁷Ani êk dis oxem zalem: To xikovnn ditalo ani Galileiacheam ani Judeiacheam ganv-ganvantle ani Jeruzaleantle Farizev ani dhormxastri ieun thõi boslele. Ani lokak boro korunk, Sorvesporachi xokti Tachê sovem asli.

¹⁸Ovchituch ar zal’lea eka mon’xak antrunna soit gheun kãi dadle aile; ani taka bhitôr haddun Tachea fuddeant dovrunk sôdtale.

¹⁹Punn lokak lagun khõichêch vatten taka bhitôr haddunk mellonaslem dekhun, te patt’sacher choddle ani, nolle kaddun, antrunna soit tãnnim taka modekot Jezu mukhar denvoilo.

²⁰Tancho bhavart polleun Tannem mhonn’lem: “Ixtta, tujim patkam tuka bhògsolim.”

²¹Ani dhormxastri ani Farizev aplea monant mhonnunk lagle. “Ho anink konn rê?! To sangta tem sarkich devninda! Devak ekleakuch soddun, konnachean patkam bhogsunk zatat?”

²²Tanchem chintop zanno zaun Jezun portipall kelo: “Oslim chintnam tumchea monant kiteak gholloitat tumi?

²³Heam donantlem khõichem mhonnunk odik sompem: ‘tujim patkam tuka bhògsolim!’, oxem mhonnunk, vô ‘utth ani chol!’, oxem mhonnunk?

²⁴Punn Mon’xachea Putak sonvsarant patkam bhogsunk podvi asa mhonn tumi zanno zaunchê khatir,” (Tannem arkarak mhonn’lem:) “Hanv tuka hukum’ ghaltam, utth, ani tujem antrunn uklun tujea ghora voch!.”

²⁵Ani rokddoch soglleam hujir utthun, apunn aslolo tem antrunn uklun, Devachi tust korit to aplea ghora gelo.

²⁶Ani sogllim ekdom’ thottaklim ani Devak vakhanntalim ani bhirantin bhoron mhonntalim: “Vichitr vostu ami az dekhleô.”

²⁷Hachê uprant Jezu bhair sorun gelo ani Levi nanvachea eka dônddvosuldarak manddvir boslolo Tannem dekhlo ani taka mhonn’lem: “Mhojê pattlean ie.”

²⁸Ani sogllem sanddun to utthlo ani Tachê pattlean gelo.

²⁹Ani Levin aplea ghorant Taka ek vhoddlem jevonn kelem ani dônddvosuldaranchi ani tanchê sangatim jevnnak bosleleam heranchi vhôdd khêtt asli.

³⁰Tedna Farizevamnim ani tancheam dhormxastreamnim gunn-gunnun Tacheam xisank mhonn’lem: “Dônddvosuldaram ani patkeam borabôr tumi kiteak khata-pietat?”

³¹Portipall korun Jezun tankam mhonn’lem: “Borim asleleank nhoi, punn vaittakarank ki voizachi goroz.

³²Tumi promannik mhonn dhôrtat tankam apounk Hanv ie naslam, punn tumi patki mhonn lêkhtat tãnnim aplem jivit-mon bodôlchê khatir, osleank ki Hanv apounk ailam.”

³³Tedna tãnnim Jezuk mhonn’lem: “Juanvache xis, ani toxech Farizevanche, bhonvn-bhonvn upas ani magnnim kortat, punn tuje xis khaun-pieun khuxal asat tem koxem?”

³⁴Ani Jezun tankam mhonn’lem: “Novro pavnneam borabôr astana tumchean tankam upas korunk lavum-iet?

³⁵Novreak tanchê modlo kaddun vhorche dis ietele; magir, te dis ietôch, te upas kortele.”

³⁶Oxi êk vopar ghalun Tannem tankam sanglem: “Konnuch pornnea vostrak kopo marunk novea vostracho kuddko pinzun kaddina; toxem kelear, novem vostr pinzlem tem pinzlem, tea bhair tacho kaddlolo kuddko pornnea vostrak sori zauncho na.

³⁷Ani konnuch novo soro pornneam chambddea-potiamnim bhôrina; bhôrlo zalear, novo soro chambddea-potio foddun uddoitolo ani oton vetolo, ani chambddea-potiancho ibadd zatolo.

³⁸Punn novo soro noveam chambddea-potiamnim bhorunk zai.

³⁹Ani pornno soro pieun ail’leam konnankuch novo soro rokddoch boro lagona. ‘Pornno soro odik boro’, oxem tim mhonntat.”