Read Goan Konkani Lk 6 Bible Online

Lk 6 - Goan Konkani bible

Lk 6

¹Eka Sabbatha disa Jezu xetantlean veta astana Tache xis konnsam toddun ani tim talltar murddun khatale.

²Kãi Farizevamnim tankam mhonn’lem: “Sabbathachem korum nozo tem kam’ tumi kiteak kortat?”

³Ani Jezun zap diun tankam sanglem: “Davidak ani tachea sangata asleleank bhuk lagli tedna tannem kitem kelem tem tumi vachunk na kitem? To Devachea ghorant bhitôr sorlo ani iadnikam bhair konnacheanuch khaum nozo asle te Deva mukhar dovorlele undde tannem kaddun khele ani apleam sangateank-ui dile — hem tumi vachunk na?”

⁴

⁵Ani Tannem tankam mhonn’lem: “Tôr Mon’xachea Putak Sabbathacher-ui odhikar asa.”

⁶Dusrea eka Sabbatha disa To devsthanant vochun xikovnn ditalo. Ani uzvea hatak ar zal’lo êk monis thõi aslo.

⁷Jezucho guneanv korchê khatir Sabbatha disa tea mon’xak boro korit kai mhonn dhormxastri ani Farizev Jezuk tellun polletale.

⁸Tanchim chintnam ollkhun, hatak ar zal’leak Tannem mhonn’lem: “Utth ani modekot ieun ubo rav.” To utthlo ani ubo ravlo.

⁹Ani Jezun tanchekodde vicharlem: “Sabbatha disa kitem korum-ieta: borem ki vaitt ? Jiv vanchoum-iet vô kaddum-iet ?”

¹⁰Tedna tancher soglleancher nodor bhonvddaun Tannem tea mon’xak mhonn’lem: “Tuzo hat sôdd.” Tannem toxem kelem ani adlê bhaxen tacho hat sarko zalo.

¹¹Punn tancho rag ekdom’ choddlo ani Jezuk kitem korchem tem te ekameka lagim vicharunk lagle.

¹²Magir oxem zalem: magnnem korunk Jezu eka dongrar gelo ani Devak magnnem korun Tannem akhi rat sarli.

¹³Uzvaddtôch Tannem Apleam xisank apoile, tantleam bara zannank vinchun kaddle ani tankam apostl oxem nanv-ui dilem.

¹⁴Te he: Simanv — taka Pedru mhonn Tannem nanv dilem — ani tacho bhav Andre, Jakob, Juanv, Filip, Bartolomêv,

¹⁵Matêv, Tomas, Alfevacho put Jakob, ani Krantikar mhonnlolo Simanv,

¹⁶Jakobacho put Judas ani ghatki utorlo to Judas Iskariot.

¹⁷Tanchê borabôr sokla ieun Jezu eka mollar ravlo; thõi Tacheam xisancho vhôdd zomo ektthãi zalo, ani Judeia thaun, Jeruzalea thaun, ani doria-degecheam Tir ani Sidon nogram thaun,

¹⁸Tachem utor aikunk vô aplea piddê-rogantlo boro zaunk ail’lo puskôll lôk zomlo; ani mhelle atme tras ditale toslim mon’xam borim zatalim.

¹⁹Tachê koddsun êk gunn bhair sorun tankam borim kortalo dekhun, sogllo lôk Taka hat lavunk sôdtalo.

²⁰Dolle ubarun ani Apleam xisank polleun Jezun sanglem: .3“Gorib tim tumi subhagi, kiteak Devachem Raj tumchem.

²¹Atam bhukeleant tim tumi subhagi, kiteak tumkam Dev dhadoxi kortolo. Atam rudon kortat tim tumi subhagi, kiteak tumi hansunk pavtelet.

²²Mon’xachea Putak lagun tumcho dvês kortit ani tumkam sobhentlim bhairaitit tedna, tumkam opman’tit ani vaitt mhonnun tumchea nanvacher xirap ghaltit tedna, tumi subhagi.

²³Tea disa tumi khuxal zaun uddiô marat, kiteak motti vhoddli mozuri tumkam sorgar mellteli. Tôr tancheam purvo-zamnim provadeank toxench kelem.

²⁴Punn tumi girest mon’xamnô, tumchem kotta, kiteak tumchem sukh tumkam atanch mell’lem!

²⁵Atam dhadoxi asat tim tumi, tumchem kotta, kiteak tumi upaxi astelet! Atam hanstat tim tumi, tumchem kotta, kiteak tumi roddtelet ani rudon kortelet!

²⁶Sogllo lôk tumchem borem uloita tedna kottakotta tumchem, kiteak tanche purvoz fotting provadeank toxench kortale!

²⁷Punn tumkam, Mhaka kan diteleank, sangtam: tumcheam dusmanancho môg korat, tumkam zolltat tankam borem korat,

²⁸tumcher xirap ghaltat tankam axirvad diat, tumkam vaitt kortat tanchê pasot magat.

²⁹Konn tuka eka polear marit zalear, dusro-i polo taka dakhoi; tujem angavlem kaddun gheit taka tuzo jubo-i vhorunk addainaka.

³⁰Tujê lagim magit taka di, ani tuji vôst kaddun vhelea tachê koddchi ti portun maginaka.

³¹Heramnim tumchê sorim kel’lem tumkam zai, toxench tumi-i tanchê sorim korat.

³²Tumcho môg korteleanchoch tumi môg korxeat zalear, tantum tumchem punnem koslem? Tôr patki porian apnnancho môg korteleancho môg kortat.

³³Ani tumkam borem korteleank tumi borem korxeat zalear, tantum tumchem punnem koslem? Patki porian toxench kortat.

³⁴Zanchê lagchem porot ghetelet mhonn tumi ravtat, tankam tumi kitem-i uxnnem dixeat zalear, tantum tumchem punnem koslem? Dilam titlem-i porot gheunchea monan patki-i patkeank uxnnem ditat.

³⁵Punn tumi tumcheam dusma-nancho môg korat, tankam borem korat, ani porot gheunchi axa dhorinastana herank uxnnem diat. Tedna tumkam vhoddli mozuri mellteli ani Bhov Vortea Devachim bhurgim tumi zatelet; tôr onupkari ani khotteam mon’xam sorim To konnvallo.

³⁶Zoso tumcho Bap doiall, toxinch tumi-i doiall zaiat.

³⁷Konnachich nit korinakat ani tumchi-i Dev nit korcho na. Konnakuch guneanvkar korinakat ani tumkam-i Dev guneanvkar korcho na. Dusreank bhôgsat ani tumkam-i Dev bhôgxitolo.

³⁸Diat ani tumkam-i Dev ditolo; borem-chikar map, damun-chepun, haloun ani oto-sôr suien bhôrlelem, Dev tumchê unttient ghaltolo; kiteak jea mapan tumi dusreank ditat, teach mapan Dev tumkam-i ditolo.”

³⁹Jezun hi-i vopar tankam sangli : “Eka kurdd’deachean dusrea kurdd’deak vatt dakhounk zata? Dog-ui fonddant poddche nant?

⁴⁰Xis aplea guru poros vorto nhoi; xikun purnn zal’lo xis, to ki aplea guru sarko utortolo.

⁴¹Tujea peleachea dolleant asa tem kisor tum kiteak polletai, ani tujeach dolleant asa ti patti tuka dixtti poddona?

⁴²Tujea dolleantli patti tuka disonam, tori tujea peleak mhonntai : ‘Ixtta mhojea, rav; tujea dolleantlem kisor mhaka kaddum-di.’ — oxem tujea peleak mhonnunk koxem tankot tuka? Arê ddhongia, tujea dolleantli patti poili kadd ani magir tujea peleachea dolleantlem kisor kaddunk tuka nivoll dixtti poddtelem.

⁴³Borem zhadd vaitt foll diit-xem na; nhoi mhonn vaitt zhadd borem foll diit-xem na.

⁴⁴Tachea folla pormannem dor-ek zhadd ollkhunk mellta. Kantteanchim konnem anjiram kaddleant mhonn na, nhoi mhonn sorantteancheô konnench dakô kaddunk nant.

⁴⁵Boro monis aplea kallzachea borea bhanddarantlem borem kaddun dakhoita; vaitt monis aplea vaitt bhanddarantlem vaitt kaddun dakhoita. Tôr kallzantlem bhoron òt’ta tench tonddantleam utramnim vhanvta.

⁴⁶Mhaka tumi ‘Somia! Somia!’ mhonntat ani Hanv sangtam tem korinant kiteak?

⁴⁷Jim konn Mhojê-xim ietat, Mhojem utor aikotat ani tea pormannem choltat, tim sogllim konna sarkim tem sangtam:

⁴⁸Ghor bandtelea eka mon’xa sarkim tim; tannem khôl khonnun khoddpacher buniad marli. Anvr ailem tedna, tea ghoracher udkacho lôtt boslo, punn tem halounk zaunk na; kiteak tem ghott bandlelem.

⁴⁹Ani jim konn aikotat, punn kãich korinant, tim buniad marinastana aplem ghor dhortorê borabôr bandtelea mon’xa sarkim; anvr ieun tacher udkacho lôtt bosonam fuddem tem rokddench mòddlem ani tachem sarkem ghorttann zalem!”