Read Goan Konkani Lk 7 Bible Online

Lk 7 - Goan Konkani bible

Lk 7

¹Hi soglli Apli xikovnn aikotelea lokak dilea uprant, Jezu Kapernauma gelo.

²Konn-eklea xotpoticho chakôr, tachê kherit opurbaiecho, piddent poddun mornnachê tonnir pavlolo.

³Jezuchi khobor aikotôch, tannem Judevancheam vhoddilank Tachê-xim dhaddle ani ieun aplea chakrak vattai mhonn maglem.

⁴Ani Jezu-xim ieun, te Tachê lagim prarthun oxem magtale: “Tunvem tachê khatir hem korunk favo;

⁵tôr to amchea lokacho môg korta ani tannench amkam devsthan bandun dilam.”

⁶Ani Jezu tanchê borabôr vochunk laglo. Ani To tachea ghora-xim pavunk zobôr pois naslo tedna, xotpotin apleam ixttank Jezuk oxem sangunk Tachê-xim dhaddle: “Saiba, tras ghenaka; tunvem mhojea ghora ieunk mhaka favona;

⁷teach pasot hanv-ui khaxa Tujê-xim ieunk purto nhoi mhonn mhaka dislem. Ek utor mat sang ani mhozo chakôr boro zaum.

⁸Tôr hanv-ui dusreachea hata khal aslolo monis ani mhojê khal soinik asat; ani tantlea ekak hanv ‘voch’ mhonnon zalear, to veta; ani dusreak ‘ie’ mhonnon zalear, to ieta; ani mhojea chakrak ‘omkem kôr’ mhonnon zalear to korta.”

⁹Hem aikun Jezuk tachem ojap dislem ani porton Apnna pattlean ieto lokak Tannem mhonn’lem: “Hanv tumkam sangtam: hedo vhoddlo bhavart Hanvem Israelant porian polleunk na.”

¹⁰Ani dhaddlele monis ghora porot ie zalear, to chakôr boro zal’lo tankam mell’lo.

¹¹Tachê magir oxem zalem: Jezu Nain mhonnlelea eka nogrant gelo ani Tachê borabôr Tache xis ani khup lôk vetalo.

¹²Nograchea darvonttea lagim pavtana, ovchit eka mel’leak purunk vhortalim; to aplê avoicho ekloch put aslo ani ti êk vidva; tichê sangatim nograntlo zaito lôk aslo.

¹³Tika polletôch, tiche churchure korun Jezun tika mhonn’lem: “Roddonaka.”

¹⁴Ani fuddem vochun Tannem tirddek hat lailo. Tirddi vhorpi thamble, ani Tannem mhonn’lem: “Tornnattea, Hanv tuka sangtam, utth!”

¹⁵Ani mel’lo to boslo ani ulounk laglo. Ani Jezun taka tachê avoichê adhin kelo.

¹⁶Sogllim thottaklim ani Devachi tust korun mhonntalim: “Êk vhôdd provadi amchê modem upzola ani Dev Aplê porjek bhett diunk aila.”

¹⁷Ani hi Tachi khobor akhê Judeia sobhonvtim ganv-bhôr gazli.

¹⁸Juanvancheam xisamnim hem sogllem taka sanglem ani Juanvan apleam xisantleam dogank apoun haddle

¹⁹ani oxem vicharunk Somia-xim dhaddle: “Ieuncho asa to tunch, vô ami dusrea konnachi vatt polleunchi?”

²⁰Team mon’xamnim ieun mhonn’lem: “ ‘Ieuncho asa to tunch, vô ami dusrea konnachi vatt polleunchi?’ oxem vicharunk Juanv Batistan amkam tujê-xim dhaddleat.”

²¹Teach vellar Tannem sobar zannank piddê-rogantlim, upodreantlim ani vaitt atmeancheam hatantlim soddoilim ani zaiteam kurddeank-ui nodor dili.

²²Ani zap diun Tannem mhonn’lem: “Tumi pollelam ani aikolam tem vochun Juanvak sangat: kurddim novean polleunk lagtat, thonttim cholunk lagtat, koddkaram nitoll zatat, bherim novean aikotat, mel’lim mon’xam jivont zatat, goribank xubhvhortoman porgott zata.

²³Ani Mhojê vixim zancho bhavart halona tim mon’xam bhagi.”

²⁴Ani Juanvache niropi gelea uprant, Jezu lokak Juanva vixim mhonnunk laglo: “Tumi kitem mhonn oronneant polleunk gel’leat? Varean halta-dolta tosli êk bet?

²⁵Na tôr, kitem mhonn tumi polleunk gel’leat? Nazuk-mov vostram nheslolo monis? Na. Vhodd molachim vostram nhestat ani dobajean jietat tim razvaddeamnim astat mhonn tumi zannont.

²⁶Mhonntôch tumi kitem mhonn polleunk gel’leat? Eka provadeak? Hôi, ani to eka provadea poros vorto mhonn Hanv tumkam sangtam.

²⁷‘Ho polle, tujê mukhar Hanv Mhojea dutak dhaddtam ani to tuji vatt tujê fuddem toiar kortolo’, oxem zachê vixim Povitr Pustokar boroil’lem asa to hoch to.

²⁸Tumkam anink ek sangtam: bailank zal’leam soglleam bhurgeam bhitôr Juanv Batista poros vhôdd konn na. Toripunn Devachea Rajeant jim konn soglleam poros lhan, tim tachê-vôn vhodd.

²⁹Tachem aikol’lea sogllea lokan, toxench dônddvosuldaramnim, Juanvacho batism gheun, Devachi manddavôll manun ghetli;

³⁰punn Farizevamnim ani dhormxastreamnim batism gheunk na dekhun, apnnam vixim Devachi ievzônn tãnnim nirfôll keli.

³¹“Konnank mhonn hê pinddkecheam mon’xank Hanvem sôr korchi? Tim konnam sarkim?

³²Moidanar bosun ravto ani ap-aplea khella-pongddacheam vangddeank oso ulo korto bhurgeam sarkim tim: ‘Ami tumkam nachpachim songitam vennuncher vazoilim, punn tumi nachunk nant’; ‘Ami tumkam vilapachim gitam gailim, punn tumi roddunk nant.’

³³Tôr Juanv Batist jevonn-khann chakinastana ani soro pienastana ailo, ani tumi mhonntat: ‘Tacher devchar bosla.’

³⁴Mon’xacho Put jevun ani pieun ailo, ani tumi mhonntat: ‘Ho asa pottio ani bebdo, dônddvosuldarancho ani patkeancho ixtt.’

³⁵Tori Devachi zannvai ollkhun, tichim bhurgim tika sakxi ditat.”

³⁶Farizevantlea konn-eklean apnnager jevnnak ie mhonn Jezu lagim maglem; ani tea Farizevager vochun To jevnnak boslo.

³⁷Ani tea nogrant vaitt nanvachi êk bail asli; To Farizevager jevnnak bosla mhonn aikun, ovchit ti chondrokanti aidonant pormollit tel gheun aili.

³⁸Tacheam pãiam-xim ti pattlean ravli ani roddun-roddun apleam dukamnim Tache pãi bhizounk lagli; magir tinnem apleam kensamnim te pusun kaddle; ani tanche ume gheun-gheun, tankam ti tel lait asli.

³⁹Taka jevnnak apoil’lo to Farizêv hem polleun aplea monant oxem mhonnunk laglo: “Ho monis provadi zal’lo zalear, apnnak afuddta ti konn ani kosli bail ti, to zanno zato aslo; kiteak ti êk patkinn.”

⁴⁰Portipall korun Jezun taka mhonn’lem: “Simanv, Hanvem tuka kitem ek sangchem asa.” Ani tannem mhonn’lem: “Sang, Guruji.”

⁴¹“Eka savkarak dog rinnkari asle; eklo pãixim dinar devo aslo ani dusro pon’nas.

⁴²Farik korunk tankam tank nasli dekhun, tannem dogãik-ui rinn bhôgxilem. Mhonntôch dogantlea konnak tacho odik upkar astolo?”

⁴³Simanvan zap diun mhonn’lem: “Odik bhôgxilam taka, oxem mhaka dista.” Ani Tannem mhonn’lem: “Sarkem sangli tunvem.”

⁴⁴Ani bailê vatten vollon Tannem Simanvak mhonn’lem: “Tunvem hê bailek polleleai mum? Hanv tumger ailom, ani Mhoje pãi dhuunk tunvem udok diunk nãi; punn hinnem apleam dukamnim Mhoje pãi bhizoile ani te apleam kensamnim pusle.

⁴⁵Tunvem Mhozo umo gheunk nãi; punn hi, ailea tê meren, Mhojeam pãianche ume gheunuch asa.

⁴⁶Tunvem Mhojea matheak tel ghalunk nãi; hinnem domdomit telan Mhoje pãi makhle.

⁴⁷Hea pasot Hanv tuka sangtam: hinnem kel’leam zaiteam patkanchem bhogsonnem tika mell’lem, oxem mhonn hichea kallzacho vhôdd dhin’vas dakhoun dita. Zankam thoddem bhôgxilam tim thoddo dhin’vas dakhoitat.”

⁴⁸Ani Tannem tika mhonn’lem: “Tujim patkam tuka bhògsolim.”

⁴⁹Ani borabôr jevnnak boslele te apnnam bhitôr oxem mhonnunk lagle: “Patkam legit bhôgxita to konn ho?”

⁵⁰Punn Tannem bailek mhonn’lem: “Tujea bhavartan tuka taronn dilem. Xantin voch atam.”