Read Goan Konkani Lk 8 Bible Online

Lk 8 - Goan Konkani bible

Lk 8

¹Hachê uprant provochon korit ani Devachea Rajeachem xubh-vhortoman porgottit Jezu eka-eka nograntlean ani ganvantlean vetalo. Tachê sangatim te bara zann asle,

²ani zanchê voile Tannem devchar kaddlele ani zankam piddê-rogantleô Tannem boreô kel’leô kãi bailô; jichê vele sat devchar bhair sorlele Magdalen mhonntat ti Maria;

³ani Herodichea karbharea, Kusachi potinn Juana, ani Suzana, ani sobar dusreô bailô. Teô khud’ aplo duddu-addko moddun Tachi seva-chakri kortaleô .

⁴Dor-eka nogrant thaun lôk Jezu sorxem ietalo; oxem êk urpônz ektthãi zali tedna, Tannem vopar ghalun mhonn’lem:

⁵“Konn-eklo vomp’pi aplem bim vompunk gelo. Vomptana thoddem bim vatter poddlem ani lokan tem maddoilem ani mollba veleam suknneamnim ieun tem khelem.

⁶Ani dusrem khoddpacher poddlem; tem kirlolem, punn xêll nasli dekhun suklem.

⁷Her kantteam modem poddlem, ani kantte borabôr vaddle ani tãnnim tem damun dhôrlem.

⁸Her borê zomnir poddlem; ani kirlon xembhôr-pott taka pik zalem.” Ani vhoddlean arddun Tannem mhonn’lem: “Aikunk kan asleleamnim hem aikunchem.”

⁹Tacheam xisamnim hê voparicho ôrth Tachê kodde vicharlo;

¹⁰ani Tannem mhonn’lem: “Devachea Rajeache gutt ollkhunk tumkam dil’lem asa; punn herank te voparimninch sangpache, kiteak tim’dolleamnim polletat, punn tankam disona, kanamnim aikotat, punn tankam somzona.’

¹¹Tôr voparichi somzonni hi: bim Devachem Utor.

¹²Vatter asat tim, tem aikotat tim; punn magir, bhavart dhorina zaun tankam soddvônn mellona zaunk, devchar ieta ani tanchea kallzantlem Utor kaddun vhorta.

¹³Khoddpacher asat tim, Utor aikun tem khuxalkaien manun ghetat tim; punn tankam pallam nant. Tim thoddoch vêll bhavart dhôrtat ani porikxecho vogôt pavtôch, tim pattim sortat.

¹⁴Kantteam modem poddlam tem, Utor aikotat tim; punn vetam-vetam jivacheam dhastink ani girestkaiank ani mouzank lagun tim damon urtat ani pik diunk pavonant.

¹⁵Borê zomnir poddlam tem, borea ani udar kallzan Utor aikun tem samballtat ani aplê thiraiek lagun pik ditat tim.

¹⁶Ponntti pettoun konnuch ti êkê pailê pondak lipoina, vô bajê tolla dovrina, punn bhitôr ietat titleamnim uzvadd polleunchê khatir ti eka peddar dovortat.

¹⁷Kiteak xekim ugtem zaunchem na toslem atam kãich na liplelem; nhoi mhonn kollchem na vô uzvadda ieunchem nam toslem atam kãich na gupit.

¹⁸Mhonntôch tumi koxem aikotat tê vixim chotrai dhôrat; kiteak asa tankam Dev odik-ui ditolo, ani na tanchê lagchem, jem asa mhonn tim somzotat, tem-i Dev kaddun ghetolo.”

¹⁹Jezuk mellunk Tachi avoi ani Tache bhav pavun sorlim. Lokachi khêtt asli dekhun, Tachê sorxem tankam lagim ieunk zainaslem.

²⁰Konnem Taka oxem sanglem: “Tuji avoi ani Tuje bhav bhair ravleant ani Tuka polleunk sôdtat.”

²¹Punn Tannem zap diun mhonn’lem: “Devachem utor aikotat ani palltat tim Mhoji avoi ani Mhoje bhav.”

²²Êk dis Jezu ani Tache xis eka hoddear choddle ani Tannem tankam sanglem: “Poltoddi ia.” Ani te vochunk lagle;

²³ani te tanddun vetana Jezuk nhid poddli. Tedna doriant ek vadoll-modd upraslem ani udok bhoron te sonkoxttant poddle.

²⁴Tea vellar Tachê sorxem ieun tãnnim Taka zago kelo ani mhonn’lem: “Guruji, Guruji, ami mortanv!” Ani utthun, vareak ani uchamboll lharank Tannem bexttailim; ani tim thamblim ani thonnddai zali.

²⁵Ani Tannem tankam mhonn’lem: “Khõi pavlo tumcho bhavart?” Bhieun ani ojap zaun te eka-mekak mhonntale: “Ho konn zait tôr?! Kiteak vareak ani doriak To hukum’ ghalta ani te Tachem aikotat!”

²⁶Ani Galileia-Tollea samkar asto Gerasenanchea mulkant te khaddik pavle.

²⁷Jezu dodder denvlo tedna, tea nograntlo, devchar boslolo konn-êklo monis Taka mellunk ailo; zaito kall to angak kãich ghalinaslo, ani ghorant nhoi, punn somadhim modem biradd korun astalo.

²⁸Jezuk pollena fuddem tannem killônch marli ani, Tacheam pãiam poddun, mottea tallean mhonn’lem: “Jezu, Bhov Vortea Devachea Puta, mhojê kodde Tuka koslem kam’ asa? Mhaka dogdainaka mhonn Tujê lagim poratun magtam.”

²⁹Kiteak tea mon’xa velo bhair sor mhonn Jezu tea mhellea atmeak hukum’ ghaltalo. Tôr zaitê pavtti devchar taka zôpt kortalo; dekhun khoddeam-sankllimnim taka bandun dovortale; punn devchar, bandpas toddun, taka eksuream zageancher dhanvddaun vhortalo.

³⁰Jezun taka vicharlem: “Tujem nanv kitem?” Tannem zap dili: “Loskor!”, kiteak sobar devchar tachê bhitôr riglele.

³¹Ani apnnank patallant vochunk lainaka mhonn te Tachê lagim magtale.

³²Tedna thõi dongrar khup dukrancho êk hindd chortalo. Apnnank team dukramnim vochun rigum-di mhonn tãnnim Tachê kodde maglem ani Tannem tankam vochunk dilem.

³³Devchar mon’xantle bhair sorun dukramnim rigle; ani vhôdd nettan vochun kollsa velean doriant xevtton to hindd buddun melo.

³⁴Ghòddlelem polleun rakhnne pollun gele ani nogrant ani kheddeam-ganvamnim tãnnim hi khobor kollit keli.

³⁵Ani lôk kitem zalam tem polleunk bhair sorun Jezu-xim ie zalear, zachê vele devchar bhair sorlele to monis angavlim nheslolo, toklen sarko zal’lo, Jezucheam pãiam-xim boslolo tankam mell’lo; ani tim ghaborlim.

³⁶Devchar bosloleak Tannem koso boro kelo tem khaxa dekhleleamnim herank sanglem.

³⁷Tedna thõicho bhair sorun voch mhonn Gerasenanchea mulkantlo sogllo lôk Jezuk poratunk laglo, kiteak tankam motti bhirant lagleli. Hea pasot eka hoddear choddun To porot ailo.

³⁸Zachê vele devchar bhair sorlele, to monis apnnak Tachê borabôr ravum-di mhonn Jezu lagim magtalo; punn Jezun taka oxem sangun dhaddlo:

³⁹“Tujea ghora voch ani Devan tujê khatir kelam titlem-i herank sang.” Mhonntôch apnna khatir Jezun kel’lem titlem-i tannem vochun nogor-bhôr lokak kollit kelem.

⁴⁰Jezu porot ailo tedna, lokan Taka ievkar dilo kiteak sogllim Tachi vatt polleun aslim.

⁴¹Ani ovchit eka devsthanacho odhikari, Jairus nanvancho eklo monis ailo ani Jezucheam pãiam poddun apnnager ie mhonn Taka poratunk laglo,

⁴²kiteak bara vorsanchi tachi eklich dhuv mornnachê tonnir asli. Ani veta astana lôk Taka chênchtalo.

⁴³Tedna bara vorsam rogt-pat zal’li êk bail asli; sogllo aplo duddu voizank ghalun-ui konnacheach vokhtan ti bori zainasli.

⁴⁴Tea vellar Jezu pattlean ieun Tachea avoronnachê degek tinnem hat lailo ani tichem rogot vetalem tem rokddench thamblem.

⁴⁵Ani Jezun vicharlem: “Mhaka konnem hat lailo?” Apnnem lavunk na mhonn soglleamnim mhonnlea uprant, Pedrun mhonn’lem: “Guruji, Tujê bhonvtim kedi gordi, ani sogllo lôk Tuka chênchta!”

⁴⁶Ani Jezun mhonn’lem: “Konnem-i tori Mhaka hat laila, kiteak Mhojê bhitorlo êk gunn bhair sorla mhonn Mhaka koll’lam.”

⁴⁷Apunn atam sampoddlich mhonn polleun, ti bail kampun aili, ani Tacheam pãiam poddun apnnem kitea pasot Taka hat lailo ani koxi teach vellar apunn bori zali tem, sogllea loka hujir, tinnem sanglem.

⁴⁸Ani Tannem tika mhonn’lem: “Dhuvê, tujea bhavartan tuka bori keli. Xantin voch atam.”

⁴⁹To uloita thõich astana, konn-eklean devsthanachea odhikariager thaun ieun haka sanglem: “Tuji dhuv bhair poddli; Gurujik anink tras dinaka.”

⁵⁰Punn Jezun hem aikun cheddvachea bapaik mhonn’lem: “Bhienaka. Bhavart mat dhôr ani tem borem zatelem.”

⁵¹Ghora pavtôch, Pedru, Juanv ani Jakob ani cheddvacho avoibapui, hanchê bhair konnakuch Apnna borabôr bhitôr vochunk Tannem diunk na.

⁵²Sogllo lôk cheddva khatir roddtalo ani vilap kortalo; punn Jezun mhonn’lem: “Roddonakat; cheddum morunk na; tem nhidlam.”

⁵³Ani lôk tem melam mhonn zanno aslo dekhun, Tacheô moskoreô korunk laglo.

⁵⁴Punn cheddvachea hatak dhorun, Tannem mottea tallean mhonn’lem: “Cheddva, utth!”

⁵⁵Ani tacho jiv porot ailo ani tem rokddench utthlem. Tedna taka kitem-i khaunk diat mhonn Jezun sanglem.

⁵⁶Cheddvacho avoibapui thottaklo; punn ghòddlam tem konnank sanginakat mhonn Jezun tankam adnea keli.