Read Goan Konkani Lk 9 Bible Online

Lk 9 - Goan Konkani bible

Lk 9

¹Jezun bara zannank ektthãi apoun haddle ani soglle devchar kaddunk, toxench pidda-rôg boro korunk, tankam podvi ani odhikar dilo,

²ani Devachem Raj porgott korchê khatir ani vaittakarank borim korchê khatir, Tannem tankam daddle.

³Tannem tankam oxem sangun dhaddle: “Vattek danddo, poti, khann-jevonn, duddu, kãich vhoronakat; ani don angavlim tumchê kodde aschim nhoi.

⁴Khõichea-i eka ghorant bhitôr sorxeat, tê svatê vele bhair soro porian, thõich ravat.

⁵Konn tumkam ghena zatit zalear, tea nograntle bhair sortana, tancher add govaiki diunchê khatir tumcheam pãianchi dhull porian zhaddun uddoiat.”

⁶Mhonntôch te bhair sorle ani veta thõi xubhvhortoman porgottit ani piddevontank borim korit ganvan-ganv bhonvle.

⁷Herod upraza ghòddtalem titlem-i aikun ghuspolo; kiteak kãi zannam Juanv mel’leantlo jivont zala, oxem mhonnot;

⁸dusrim konn Elija novean dixtti poddla mhonnot; tori her konn-konn adleantlo konn-êk provadi jivo zala, oxem mhonnot.

⁹Punn Herod mhonnunk laglo: “Juanv? Tachem xins hanvem tôr kaplem! Zachê vixim heô khobrô hanv aikotam, to konn tôr?” Ani Taka khaxa polleunk to axetalo.

¹⁰Apostlamnim porot ieun, apnnem kel’lem titlem-i Jezuk sanglem; magir, ekvodde aschê khatir, Bethsaida mhonnlelea eka zagear To tankam gheun gelo.

¹¹Tem aikun lôk Tachê pattlean gelo ani Tannem tankam ievkar dilo. Devachea Rajea vixim To tanchê lagim uloilo ani jeam konnank borim zaunchi goroz asli, tankam Tannem borim kelim.

¹²Dis poddcho vêll zal’lo ani bara xisamnim lagim ieun Taka sanglem : “Lokak dhaddun di. Ami hanga eksurê svater asanv. Mhonntôch tankam bhonvtonncheam nogramnim ani gramamnim vochun biradd sodum-di ani apnnanchea jevnna-khannachem polleum-di.”

¹³Ani Tannem portipall kelo: “Tankam khaunk-jevunk tuminch diat.” Punn tãnnim oxem mhonn’lem : “Panch undde ani don maslleô kaddun, amchê lagim anink kãich na; ami vochun hea sogllea lokak puro-xem jevonn viktem ghetlear bi zait!”

¹⁴Kiteak sumar panch hozar dadle asle. Punn Tannem Apleam xisank sanglem: “Sumar pon’nas-pon’nasancheam zomeam-zomeamnim tankam jevnnak bosoiat.”

¹⁵Tãnnim toxem kelem ani soglleank bosoilim.

¹⁶Tedna Tannem, panch undde ani don maslleô hatant gheun ani sorgar dolle ubarun, Tannem Devak dhinvaslo ani tanche kuddke kele ani lokak vanttunk, Tannem te xisam kodde dile.

¹⁷Sogllim jevlim ani dhadoxi zalim ani urlele kuddke-tukdde ektthãi korun tãnnim bara panttleô bhorleô.

¹⁸Apleam xisam mukhar êk dis Jezu ekloch magnnem korun aslo. Tedna Tannem tankam vicharlem : “Lôk Mhaka konn-so dhôrta?”

¹⁹Ani tãnnim oxi zap dili: “Kãi zann Juanv Batist, dusrim konn Elija ani her konn-konn jivont zal’lo konn-êk adleantlo provadi.”

²⁰Tannem vicharlem: “Punn tumi Mhaka konn mhonn dhôrtat?” Zobab diun Pedrun mhonn’lem: “Devacho Krist Tunch!”

²¹Punn hem konnankuch sanginakat mhonn Jezun khoraien tankam adnea keli.

²²Tannem mhonn’lem: “Mon’xachea Putan zaitem sõsunk zai: zannte, mukhel iadnik ani dhormxastri Taka bhairaitele ani jivexim martele, ani Dev Taka tisrea disa punorjivont kortolo. Hem sogott Tachê vixim Devachi khuxi.”

²³Magir Tannem soglleam lagim uloun mhonn’lem: “Konnank Mhozo pattlav korchi khuxi asa zait, tãnnim apnnanchêch khuxechi vatt sôddchi, dôr-disa aplo khuris ukôlcho ani Mhojê pattlean ieunchem.

²⁴Kiteak aplo jiv samballun dhorunk sôdtat tim aplo jiv hogddaitelim, punn Mhojê khatir aplo jiv hogddaitat tim aplo jiv samballun dhôrtelim.

²⁵Mhonntôch akho sonvsar zôddit ani apnnachoch ibadd vô apnnachench ghorttann korit zalear, mon’xak koslo adav?

²⁶Tôr Mhoji ani Mhojeam utranchi konnank loz disot zalear, Aplê ani Bapachê ani bhagevont dutanchê mhoimen Apunn ietolo tedna, Mon’xachea Putak-ui tanchi loz disteli.

²⁷Hanv tumkam khorench sangtam, Devachem Raj dekhlea bogor morchim nant toslim kãi zannam hanga asat.”

²⁸Hem uloun sumar atth dis zatôch, Pedruk, Juanvak ani Jakobak gheun Jezu magnnem korunk eka dongrar choddun gelo.

²⁹Magnnem korta astana, Tachea mukhamollachem rup bodòl’lem ani Tachi nhesônn loklokit, dhovi-ful zali.

³⁰Ovchituch dog dadle thõi hajir zale: te Tachê lagim uloitale. Te mhonn’lear Moizes ani Elija.

³¹Te mhoimen bhòrlele dixtti poddle ani koxê bhaxen Jezu Jeruzalea Aplem jivit sompadun vecho aslo tê vixim te gozal kortale.

³²Pedru ani tache sangati jemen zodd zal’le, punn te zagech ravle ani Tachi mhoima tãnnim polleli ani Tachê borabôr ube aslele team dogank-ui dekhle.

³³He Jezu sorxile koddsorun vetale tedna, Pedrun Taka mhonn’lem : “Guruji, ami hangasoruch ravlear borem ! Mhonntôch tin tombu tãnnum-ia: êk Tuka, êk Moizesak ani êk Elijak.” Apunn kitem mhonnta tem toch nokllo aslo.

³⁴Oxem to uloita thõich astana, ek kup ailem ani kupan tancher savlli ghali, ani tea kupant rigtôch xis bhiele.

³⁵Ani kupantlo oso ho tallo aikunk ailo: “Ho Mhozo Put, Hanvem vinchun kaddlolo; Tachem aikat!”

³⁶Ani ho tallo gaztôch, Jezu ekvoddo tankam dixtti poddlo. Team disamnim, apnnem dekhlelem tê vixim, xis ogech ravle ani tãnnim tem konnakuch kãi sangunk na.

³⁷Dusrea disa te dongra vele denvtastana khup lôk tankam mellunk ailo.

³⁸Ovchit lokachea zomeantlea eka mon’xan vhoddlean uloun mhonn’lem: “Guruji, doia korun mhojea putak polle mhonn magtam: to mhozo ekloch put.

³⁹Ani, polle, devchar taka ghôtt dhôrta, okosmat killônch marta ani tonddantlean fenno kaddi-sôr taka foddfoddaita; ani bhurgeak boroch koxttainastana to sompeponnim bhair sorona.

⁴⁰Taka kaddun uddoiat mhonn hanvem Tujeam xisam kodde maglem, punn tanchean nozo zalem.”

⁴¹Jezun portipallun mhonn’lem: “Kosli mhonn bhavart-nasleli ani khotti pinddka hi! Anink kitlo mhonn vêll tumchê sorxem Hanvem aschem ani tumkam Hanvem sôschim? Tujea putak hangasôr hadd.”

⁴²Ani to bhurgo lagim ieta astanach, devcharan taka foddfoddaun dhornnir apttilo. Punn Jezun mhellea atmeak mottean hukum ghalun bhurgeak boro kelo ani tachea bapaichê adhin dilo.

⁴³Devachi thorai polleun sogllim thottaklim.

⁴⁴Jezu kortalo titlea-i vixim soglleank ojap distalem tedna, Tannem Apleam xisank mhonn’lem: “Chotraien tumi him utram ghott monant dhôrat : Mon’xacho Put mon’xanchea hatant poddcho asa.”

⁴⁵Punn Tannem sanglem tem, te somzunk nant, tôr tacho ôrth tankam mellcho nhoi mhonn tanchea gineanak tem lipon urlem; ani tea utra vixim Tachê lagim vicharunk-ui tankam bhem distalem.

⁴⁶Apnnam modem konn vhôdd zait tê vixim tanchê bhitôr êk vad upraslo.

⁴⁷Punn tanchea monant gholltalim tim chintna polleun, Jezun eka bhurgeak ghetlo ani, taka Aplê kuxik dovrun,

⁴⁸tankam mhonn’lem: “Jim konn hea bhurgeak Mhojea nanvan ghetat, tim Mhaka ghetat; ani Mhaka ghetat tim Mhaka dhaddla Taka ghetat. Kiteak tumam-somestam modem zo konn odik lhan toch soglleam poros vhôdd.”

⁴⁹Juanvan tondd ghalun mhonn’lem: “Guruji, amchê sangatim Tuzo pattlav korinaslelea konn-ekleak Tujea nanvan devchar kaddtastanam ami dekhlo ani taka ami mona kelo.”

⁵⁰Ani Jezun taka mhonn’lem: “Taka mona korinakat; kiteak tumcher add nant tim tumchea bhaga asat.”

⁵¹Jezuk sorgar ubarun vhorche dis bhoron ietale tedna, Tannem Jeruzaleak vechem mhonn Aplem mon thir kelem;

⁵²ani Apnna fuddem Tannem niropi dhaddle. Tachê pasot toiari korchê khatir te vochun Samariekaranchea eka ganvant bhitôr sorle.

⁵³Punn Jeruzaleak vochunk Tannem tharail’lem dekhun, hãnnim Taka ievkar diunk na.

⁵⁴Tem polleun Tacheam xisam, Jakoban ani Juanvan, vicharlem: “Tankam lasun uddounk hukum’ ghalun sorga velo uzo ami denvoil’lo Tuka zai?”

⁵⁵Ani vollon Tannem tankam bobatt keli

⁵⁶ani te dusrea eka ganvant gele.

⁵⁷Tê vatten cholta astana konn-eklean Taka mhonn’lem: “Tum vexi thõisor Tujê pattlean hanv-ui ietolom.”

⁵⁸Jezun zap dili: “Koleank dholi ani varea veleam suknneank nhidunk zage asat, punn Mon’xachea Putak Apli tokli tenkounk khõisoruch zago na.”

⁵⁹Dusrea konn-ekleak Tannem mhonn’lem : “Mhojê pattlean ie.” Punn tea mon’xan oso zabab dilo: “Poilo vochun hanvem mhojea bapaik matiek lavunk mhaka rojia di.”

⁶⁰Punn Jezun taka zap dili: “Meleant tankam apleam mel’leank matiek lavum-di; punn tum voch ani Devachem Raj porgott kôr.”

⁶¹Anink eklean mhollem: “Saiba, hanv Tujê pattlean ietam, punn poilim mhaka mhojeam ghorcheank adêus korun ieum-di.”

⁶²Taka Jezun sanglem: “Konn-ui nangrak hat ghalea uprant pattlean vollon polletit, tim Devachea Rajeak purtim nhoi.”