Read Goan Konkani Ju 1 Bible Online

Ju 1 - Goan Konkani bible

Ju 1

¹Orombak sogllê rochnnê adim, Sôbd aslo, ani Sôbd Deva sovem aslo ani Sôbd Dev aslo.

²Orombak To Deva sovem aslo;

³Tachê vorvim sorv vostu rochleat ani rochleleam vostum modem Tachê vinnem rochun ail’lem kãich na.

⁴Tachê sovem jivit aslem, ani tem jivit zaun aslem mon’xancho uzvadd.

⁵Uzvadd kallokant porzollta, ani kallokan uzvaddak jikunk zaunk na.

⁶Devan dhaddlolo êk monis dixtti poddlo: tachem nanv Juanv.

⁷Tachê vorvim soglleamnim bhavart dhôrchê khatir uzvadda vixim govaiki diunk mhonn, to govai koso ailo.

⁸To apunnuch uzvadd nhoi aslo, punn Uzvadda vixim govaiki diunk to ail’lo.

⁹Zo soglleam mon’xancher prokas ghalta to khoro Uzvadd sonvsarant ietalo.

¹⁰To sonvsarant aslo, ani sonvsar Tannench rochlolo, tori sonvsaran Taka ollkhun gheunk na.

¹¹Apleanch modem To ailo, ani jim Tachim aslim, tãnnim Taka mandun ghetlo na.

¹²Punn Taka mandun ghetleleank, Tacher bhavart tthevteleank, Devachim bhurgim zaunchem Tannem dennem kelem.

¹³Hankam mon’xasoimbachê vondovnnen nhoi, mon’xachê khuxen-ui nhoi, punn Devan zolm dila.

¹⁴Sôbd monis zaun dixtti poddlo: ani oxem Tannem amchê modem tthikann kelem. Tachi mhoima ami dekhlea: hi Bapachea ekleach Putachi khaxa mhoima, doiallaien ani sotan bhòrlolo To dixtti poddlo.

¹⁵Tachê vixim govai diun, Juanvan arddun mhonn’lem: “To mhojê uprant ieta khorem, tori, mhojê adim aslo dekhun, To mhojê-von vhôdd, oxi hanvem tumkam zachi khobor sanglea to Hoch.”

¹⁶Ani Tachê doiallaieche bhortentlem ami soglleamnim ghetla, axirvadacher axirvad.

¹⁷Kiteak Somurt Devan Moizesa vorvim dil’li, doiallai ani sot Jezu Krista vorvim aileant.

¹⁸Devak konnem kodinch polleunk na; punn Zo Bapachea gopant asa tea ekleach Putan Tachi ollokh dilea.

¹⁹Juanvachi govaiki hi: tum konn kai mhonn tachê lagim vicharunk jedna Judevamnim iadnikank ani Levitank Jeruzalea thaun pattoile,

²⁰tedna tannem ugteponnim sanglem: “Hanv Krist nhoi.”

²¹Ani tãnnim taka mhonn’lem: “Kitem tôr? Tum Elija?” Tannem tankam mhonn’lem: “Hanv Elija nhoi.” “Tum ami ravtanv to Provadi bi?” Ani tannem mhonn’lem: “Na.”

²²Tedna tãnnim taka mhonn’lem:”Tum konn tôr? Amkam pattoileat tankam ami kitem sangchem? Tujêch vixim tum kitem mhonntai?”

²³Juanvan mhonn’lem: “Izaias provadean sangun dovorlam: ‘Sorvesporachi vatt nitt korat, oso oronneant êk tallo bob marta’, ho tallo hanv.”

²⁴Tankam Farizevamnim pattoil’le.

²⁵Tãnnim tachê lagim anink-ui vicharlem: “Tum Krist nhoi, Elija nhoi ani Provadi-i nhoi zalear, batism koso ditai?”

²⁶Juanvan portipall kelo: “Hanv udkan batism ditam, hem khorem; punn tumi ollkhonaslolo Eklo tumchê modem asa.

²⁷To mhojê uprant ietolo, ani Tacheam vhannanchi vadi soddunk mhaka favo na.”

²⁸Hem Betanient, Jordanachê poltoddi, Juanv batism ditalo thõi, ghòddlem.

²⁹Dusrea disa, Juanvan Jezuk apnna-xim ieta to dekhlo ani mhonn’lem: “Polleiat, ho Devacho Menddro, sonvsarachem pap kaddta to!

³⁰Hachich khobor sangun hanvem tumkam oxem mhonn’lem: Mhojê uprant konn-eklo ieta, punn, mhojê adim To aslo dekhun, To mhojê-von vhôdd.

³¹Hanvuch Taka ollkhonaslom, punn Tachi ollokh Israelak diunchê khatir, hanv udkan batism diit ailam.”

³²Ani Juanvan oxi-i govai dili: “Parvea sarko sorgar thaun Atmo denvlo ani Tacher tharlo To hanvem dekhlo.

³³Hanvuch Taka ollkhonaslom, punn Zannem mhaka udkan batism diunk dhaddla, Tannem mhaka mhonn’lem: ‘Zacher tum Atmo denvlolo ani tharlolo dekhxi, Toch Povitr Atmean batism ditolo. ’

³⁴Hem hanvem dekhlem, ani ho Devacho Put mhonn hanv govai ditam[1]

³⁵Dusrea disa Juanv apleam dogam xisam sangatim novean thõi aslo;

³⁶ani Jezuk cholun vetalo to tannem dekhlo ani mhonn’lem: “Ho polleiat, Devacho Menddro!”

³⁷Him tachim utram aikun, te dog xis Jezu pattlean gele.

³⁸Tedna, Apnna pattlean ieteleank vollon polleun, Jezun tankam mhonn’lem: “Tumkam kitem zai?” Tãnnim Taka zobab dilo: “Rab’bi (mhonngê ‘Guruji’), Tum khõi ravtai?”

³⁹Tannem tankam mhonn’lem: “Ieiat ani polleiat.” Te gele ani To ravtalo ti svat tãnnim dekhli; ani to dis te Tachê-xim ravle. Sanjechim sumar char zal’lim.

⁴⁰Juanvachim utram aikun, Jezu pattlean gel’le team dogam bhitorlo eklo, Andre nanvacho, Simanv Pedrucho bhav aslo.

⁴¹Rokddoch Andre aplea bhava Simanvak mellunk gelo; tannem taka mhonn’lem: “Amkam Mesias (mhonngê Krist) mell’la.”

⁴²Ani tannem Simanvak Jezu-xim vhelo. Tacher barik nodor ghalun Jezun mhonn’lem: “Juanvacho put, tum Simanv; tujem nanv atam, Kefas (mhonngê Khoddop) zatelem.”

⁴³Dusrea disa, Jezun Galileiak vochunk ievjilem; tedna Taka Filip mell’lo; ani Jezun taka mhonn’lem: “Mhojê pattlean ie.”

⁴⁴Filip Bethsaidecho aslo; Andre ani Pedru he-i teach nograntle asle.

⁴⁵Filipak Natanael mell’lo, ani tannem haka mhonn’lem: “Moizesachê Somurtint ani Prova-deanchea Pustokamnim zachi khobor asa, to amkam mell’la: to Nazaretcho Jezu, Juzecho put.”

⁴⁶Natanaelan taka mhonn’lem: “Nazaretantlem kitem-i tori borem ieunk xokta?” Filipan Taka mhonn’lem: “Ie ani polle.”

⁴⁷Apnna-xim ieto Natanaelak polleun, Jezun tachê vixim mhonn’lem: “Polleiat, koslench baskollponn-naslolo khoro Israelkar ho!

⁴⁸Natanaelan Taka mhonn’lem: “Tum mhaka khõi ollkhotai?” Jezun taka zobab dilo: “Filipan tuka apounchê adim, tum anjirachea zhadda tolla asloi tedna, Hanvem tuka dekhlo.”

⁴⁹Natanaelan Taka portipall kelo: “Rab’bi (mhonngê ‘Guruji’), Devacho Put To, Tum; Israelacho Raza To, Tum!”

⁵⁰Jezun taka mhonn’lem: “Tuka anjirachea zhadda tolla Hanvem dekhlo, itlench tuka Hanvem mhonn’lem dekhun, tum bhavart dhôrtai? Heam-vôn odik vhoddleô vostu tum dekhtoloi.”

⁵¹Ani taka mhonn’lem: “Khorench Hanv tumkam sangtam, sôrg ugto zal’lo tumi dekhtelet, ani Devache dut Mon’xachea Putacher choddtana ani denvtana tumi polletelet.”