Read Goan Konkani Ju 10 Bible Online

Ju 10 - Goan Konkani bible

Ju 10

¹Hanv tumkam khoreponnim sot sangtam: zo menddranchea oddpant darantlean nhoi punn dusrê vatten choddun bhitôr sorta, to chôr ani nagovnno;

²punn zo darantlean bhitôr sorta, to menddrancho gonvlli.

³Taka dar-rakhnno dar ugôddta; menddram tacho tallo aikotat ani apleam menddrank to ap-aplea nanvan ulo korta ani tankam bhair vhorta.

⁴Apleam menddrank bhair haddtôch to tanchê fuddem cholta, ani tacho tallo ollkhotat dekhun, menddram tachê pattlean vetat.

⁵Porkea pattlean tim vochonant, punn tachê sorxilim tim pollun vetat, kiteak porkeancho tallo tim ollkhonant.”

⁶Jezun tankam hi vopar sangli, punn jem To tankam sangtalo, tacho ôrth tankam mell’lo na.

⁷Hea pasot Jezun anink êk pavtt tankam mhonn’lem: “Hanv tumkam khoreponnim sot sangtam: Hanv menddranchem dar.

⁸Mhojê adim aileat te soglle chor ani nagovnne, punn menddramnim tankam lekhunk na.

⁹Hanv dar; Mhojeantlean jim konn bhitôr sortat, tanchem taronn zatelem: tim bhair-bhitôr sortelim ani tankam chorôv melltolo.

¹⁰Chôr ieta to fokot chorunk, marun uddounk ani ibadd korunk ieta; Hanv ailam to tankam jivit mellchê khatir, poripunn jivit mellchê khatir ailam.

¹¹Hanv boro Gonvlli. Boro gonvlli menddram pasot aplo jiv dita.

¹²Êk muxarekar, to khoro gonvlli nhoi mhonn, ani menddram tachim khaxachim nhoi mhonn, landdgo ieta to polleta ani menddrank soddun dita ani apunn par kaddta; ani landdgo tankam ubarun vhorta ani duspottaita.

¹³To muxarekar ani taka menddranchem kãi poddunk na dekhun, to par kaddta.

¹⁴14 a Hanv boro Gonvlli; Zoso Bap Mhaka ollkhota ani Hanv Bapak ollkhotam, toso Hanv Mhojeank ollkhotam ani Mhojim tim Mhaka ollkhotat, ani Mhojeam menddram pasot Hanv Mhozo jiv ditam.

¹⁶Ani Mhaka anink-ui menddram asat; tim hea oddpantlim nhoi; tankam-i Hanvem haddunk zai. Tim-i Mhozo tallo aikotelim. Ani oso êkuch hindd zatolo ani êkuch Gonvlli.

¹⁷Hanv Mhozo jiv ditam ani uprant to portun ghetam dekhun, Bap Mhozo môg korta.

¹⁸Konn Mhozo jiv zhombun kaddina, punn ap-khuxen Hanv Mhozo jiv ditam. Mhozo jiv diunk Mhaka podvi asa ani to portun gheunk-ui Mhaka podvi asa; hi adnia Mhojea Bapa koddli Hanvem ghetlea.”

¹⁹Heam utrank lagun anink êk pavtt Judevam modem veg-vegllim motam zalim.

²⁰Tanchê modleam zaiteamnim mhonn’lem: “Tacher devchar bosla, tachi môt firlea; tachem kiteak aikotat tumi?”

²¹Dusreamnim mhonn’lem: “Devchar laglolo monis oso uloina. Devchar kurddeanche dolle ugte korunk xokta?”

²²Hinvalleachea somoiar Jeruzaleant Bhettovnnechi Porob choltali;

²³Jezu Devmondirant Solomanvachea Tarangnnant bhonvtalo.

²⁴Tedna Tachê bhonvtonnim ektthãi zaun, Judevamnim Taka mhonn’lem: “Kedna porian Tum amkam dubhavant dovortoloi? Tum Krist zalear, amkam sarkem sang.”

²⁵Jezun tankam portipall kelo: “Tumkam Hanvem sanglam, tori tumi bhavart dhorinant. Mhojea Bapachê nanvim Hanv kortam tim kamam Mhojê vixim govai ditat;

²⁶punn tumi bhavart dhorinant, kiteak tumi Mhojeam menddrantlim nhoi.

²⁷Mhojim menddram tim Mhozo tallo aikotat ani Hanv tankam ollkhotam, ani tim Mhozo pattlav kortat;

²⁸ani tankam Hanv sasnnik jivit ditam, ani tim sasnnak ibadd zaunchim nant, ani tankam Mhojeam hatantlim konn zhombun vhorcho na.

²⁹Tankam Mhojea Bapan Mhaka dileant, To soglleam-vôn vhôdd, ani Mhojea Bapachea hatantlim tankam konnacheanuch zhombun vhorunk zaina.

³⁰Hanv ani Bap êk.”

³¹Tedna Jezuk fatraunk Judevamnim novean fator ukôl’le.

³²Jezun tankam sanglem: “Bapachê podven zaiteô boreô kornneô Hanvem tumcheam dolleam mukhar korun dakhoileat; tantlê khõichê kornnê pasot tumi Mhaka fatraunk sôdtat?”

³³Judevamnim Taka zobab dilo: “Borê kornnek lagun ami tuka fatraunk sodinanv, punn tujê devnindê pasot: kiteak tum monis zaun apnnakuch Dev kortai.”

³⁴Jezun tankam zap dili: “ ‘Tumi dèv mhonn Hanvem sanglam’, oxem tumchea Xastrant boroil’lem asa ki na?

³⁵Mhonntôch, zankam Devachem utor pavlam, tankam tumchem Xastr ‘dèv’ mhonnta — ani Povitr Pustok moddum nozo.

³⁶Ani atam, Bapan Mhaka sonvskarla ani sonvsarant dhaddla mhonn, ‘Hanv Devacho Put’ oxem Mhojean mhonnunk zaina? Tôr tumchean Mhaka ‘tum devninda kortai’, oxem koxem mhonnum-ieta?

³⁷Hanv Mhojea Bapacheô kornneô korina zalear, tumi Mhojer bhavart dovrinakat;

³⁸punn Hanv teô kortam zalear, tumi Mhojer bhavart dovrinant zalearui, team kornneancher tori bhavart dovrat; ani, oxem, Bap Mhojê sovem asa ani Hanv Bapa sovem asam mhonn tumkam khatren kollon ietelem.”

³⁹Tea vellar Taka te novean dhorunk sôdtale, punn To tancheam hatantlo sutton gelo.

⁴⁰Juanv poilim Jordana poltoddi batism ditalo thõi Jezu porot vochun ravlo.

⁴¹Zaiteam zannamnim Tachê-xim ieun mhonn’lem: “Juanvan koslich khunna korunk na, punn hea mon’xa vixim tannem sanglam titlem-i khorem zalem.”

⁴²Ani thõi zaiteam zannamnim Jezucher bhavart tthevlo.