Read Goan Konkani Ju 11 Bible Online

Ju 11 - Goan Konkani bible

Ju 11

¹Betaniecho, Lazar nanvacho konn-eklo monis piddent aslo. Taka dog bhoinni asleô: Maria ani Marta.

²Somiak pormollit telan makhlo ani Tache pãi apleam kensamnim pusle ti Maria hi. Ticho bhav Lazar boro naslo.

³Hea pasot bhoinnimnim Jezuk sangun dhaddlem: “Somia, Tuzo ixtt boro na.”

⁴Hi khobor aikun, Jezun mhonn’lem: “Hê pidden to morcho na; ti Devachê mhoimê khatir ailea; tichê vorvim Devachea Putak-ui mhoima mellteli!”

⁵Marta, tichi bhoinn Maria ani Lazar, hancho Jezu môg kori.

⁶Toripunn to boro na mhonn Taka khobor pavli tedna, aslo têch svater Jezu anink don dis ravlo.

⁷Tea uprant, Tannem xisank mhonn’lem: “Anink êk pavtt Judeiant vochum-ia.”

⁸Xisamnim zobab dilo: “Guruji, niktech porian Judev Tuka fatraunk kortale, ani Tum porot thõi vetai?”

⁹Jezun portipall kelo: “Eka disak bara horam asat ki na? Disachim choltat tanche pãi adollnant, kiteak tim hea sonvsaracho uzvadd polletat.

¹⁰Punn konn ratchim choltat zalear, tanche pãi adolltat, kiteak tankam uzvadd na!”

¹¹Oxem uloun zatôch, Tannem tankam mhonn’lem: “Amcho ixtt Lazar nhidla, punn Hanv taka utthounk vetam.”

¹²Xisamnim Taka sanglem: “Somia, to nhidla zalear, boro zatolo.”

¹³Jezun tachea mornnachi khobor kel’li, punn To nhidechea visovachi khobor sangtalo mhonn tankam dislem.

¹⁴Tedna Jezun tankam spoxtt sanglem: “Lazar melo;

¹⁵ani Hanv thõi naslom mhonn, tumchê pasot khuxal zatam, kiteak atam tumcho bhavart ghôtt zatolo. Punn chol-ia, tachê-xim vochum-ia.”

¹⁶Zonvllo mhonnlelea Tomasan apleam vangddeam xisank mhonn’lem: “Ami-i vochum-ia, Tachê borabor ami-i morum-ia.”

¹⁷Jezu pavlo tedna, Lazarak somadhint ghalear char dis zale mhonn Taka koll’lem.

¹⁸Betania Jeruzaleak laginch asli, sumar tin kilometranchi vatt.

¹⁹Ani zaitim Judeikar Martak ani Mariek, tanchea bhava pasot, pacharunk ail’lim.

²⁰Jezu ieta mhonn aikun, Marta Taka mellunk geli, punn Maria ghorant bosun ravli.

²¹Martan Jezuk mhonn’lem: “Somia, Tum hangasôr asloi zalear, mhozo bhav morcho naslo.

²²Ani ozun porian Tum Deva lagim magxi titlem-i Dev Tuka ditolo mhonn hanv zannom.”

²³Jezun tika mhonn’lem: “Tuzo bhav novean jivo zatolo.”

²⁴Martan Taka mhonn’lem: “To nimannea disa, punorjivontponnachea somoiar, novean jivont zatolo mhonn hanv zannom.”

²⁵Jezun tika portipall kelo: “Punorjivontponn ani Jivit Hanvuch. Jim konn Mhojer bhavart dovortat, tim melim zalear-ui jivim astelim;

²⁶ani jim konn jivim asat ani Mhojer bhavart dovortat tim sasnnak morchim nant. Ho bhavart asa mum tuka?”

²⁷Tinnem taka mhonn’lem: “Hôi, Somia, sonvsarant ieuncho aslo to Krist Devacho Put to Tunch mhonn mhaka bhavart asa.”

²⁸Oxem mhonntôch, ti aplê bhoinni Mariek apounk geli, ani tika kuxin vhorun mhonn’lem: “Guruji hanga asa ani tuka apoita.”

²⁹Hem aikun, ti rokddich utthli ani Tachê sorxem geli.

³⁰Jezu ozun gramant pavunk naslo, punn Marta Taka mell’leli thõich aslo.

³¹Tika ghorant buzvônn ditalim tim Judeikaram, Maria veginch utthta ani bhair veta tem polleun, ti somadhi sorxem roddunk veta mhonn chintun, tichê pattlean gelim.

³²Jezu aslo thõi pavtôch, Taka polleun Maria Tacheam pãiam poddli; tinnem mhonn’lem: “Somia, Tum hanga asloi zalear, mhozo bhav morcho naslo.”

³³Maria roddtali ti ani tichê sangatim ail’lim tim Judeikaram roddtalim tim polleun, Jezu bhov kollvoll’lo ani soglloch thorthorlo.

³⁴Tannem vicharlem: “Taka tumi khõi ghala?” Tãnnim Taka sanglem: “Somia, ie ani polle.”

³⁵Jezuk roddlo.

³⁶Hea pasot Judeikaramnim mhonn’lem: “Polleiat, ho tacho kitlo môg kori!”

³⁷Punn tanchê bhitorleam thoddeamnim mhonn’lem: “Kurddeache dolle ugôddle te, Hannem nhoi rê te? tôr tachean haka mornnantlo nivarunk zainaslo?”

³⁸Tedna novean soglloch kollvollon, Jezu somadhi-xim ailo; ti êk dhôl asli ani tichea tonddar êk fatôr ôddleli.

³⁹Jezun mhonn’lem: “Fatôr kuxin kaddat.” Mel’leachê bhoinni, Martan, Taka mhonn’lem: “Somia, atam taka ghann marteli; taka char dis zale.”

⁴⁰Jezun tika sanglem: “Tum bhavart dhôrxi zalear, Devachi mhoima polleteli mhonn Hanvem tuka sangunk na?”

⁴¹Mhonntôch tãnnim fatôr kuxin kaddli. Tedna dolle ubarun Jezun mhonn’lem: “Bapa, Mhojem aikoli dekhun Hanv Tuka dhin’vastam.

⁴²Mhojem sodanch aikotai mhonn Hanv zannom aslom, punn bhonvtonnim aslelea loka pasot, Tunvem Mhaka dhaddlai mhonn tãnnim bhavart dhôrchê khatir Hanv oso uloilam.”

⁴³Hem mhonnlea uprant to vhoddlean oso arddolo: “Lazar, bhair sor!”

⁴⁴Mel’lo to bhair ailo, tache hat ani pãi falliamnim bandlele, ani tachem tondd rumalan dhamplelem. Jezun tankam sanglem: “Tache bandpas sôddat, taka vochum-di.”

⁴⁵Tannem kel’lem tem polleun, Mariê-xim ail’leam Judeikarantleam zaiteam zannamnim Tacher bhavart tthevlo.

⁴⁶Punn tanchê bhitorleam kãi zannamnim Farizevam-xim vochun, Jezun kel’lem tem tankam kolloilem.

⁴⁷Mhonntôch mukhel iadnikamnim ani Farizevamnim Mha-Dhormsobhechi boska apoili. Tãnnim mhonn’lem: “Ho monis zaiteô khunna korun dakhoita ani ami kitem kortanv?

⁴⁸Ami taka osoch sôddlo zalear, sogllo lôk tacher bhavart dovortolo, ani Romi odhikari ietele ani amchea Devmondiracho[4] ani amchea raxttracho bhosm kortele.”

⁴⁹Tanchê modlo eklo, Kaifas nanvacho, tea vorsacho porom’-iadnik aslo; tannem tankam mhonn’lem: “Tumi kãich somzonant.

⁵⁰Amchea ak’kea raxttracho bhosm zaunchê poros, porjê pasot eklo melear, tumkam odik faideachem: hem tumi somzoch nant.”

⁵¹Hem tannem apleach monantlem sangunk na; punn tea vorsacho porom’-iadnik koso tannem oxem bhakit kelem, ki Jezu porjê pasot morcho aslo,

⁵²ani nhoi fokot porjê pasot, punn Devacheam ais-pois ximpoddleleam bhurgeank zoma korun êk korchê pasot.

⁵³Tea disa thaun Taka jivexim marunk tãnnim tharav ghetlo.

⁵⁴Hea pasot Jezu Judeikaram modem ugteponnim bhonvona zalo, punn thõisorlo bhair sorun oronnea lagim aslelea prantant, Efraim’ nanvachea nogrant, gelo ani thõi Apleam xisam borabôr ravlo.

⁵⁵Judevanchem Pask lagim pavlelem. Paska adim apli xud’dhi korunk zaito lôk ganv-ganvam thaun Jeruzaleak choddun gel’lo.

⁵⁶Tim Jezuk sôdtalim ani Devmondirant ekamekak mhonntalim: “Tumkam kitem dista? To Porbek ietolo ki na?”

⁵⁷Jezuk dhorchê khatir to khõi asa ti konnak khobor asot zalear apnnank tem kollounchem mhonn mukhel ladnikamnim ani Farizevamnim hukum ghalo.