Read Goan Konkani Ju 12 Bible Online

Ju 12 - Goan Konkani bible

Ju 12

¹Paskachê Porbek sô dis asat mhonn’lear, Jezu Betaniek ailo; Tannem mel’leantlo jivont kel’lo to Lazar hanga ravtalo.

²Thõi Taka ek jevonn kelem; Marta poramôs kortali ani Tachê borabôr jevnnak bosleleam modem Lazar aslo.

³Osôl zottamanxechem chodd molachem êk rat-bhôr pormollit tel gheun, Marien Jezuche pãi makhle ani apleam kensamnim te pusle, ani telachea domdomit pormollan ghor bhòrlem.

⁴Tedna Tacheam xisam modlo eklo, Tacho ghat gheuncho aslo to, Judas Iskariot, hannem mhonn’lem:

⁵“Kiteak mhonn hem pormollit tel tin’xim dinarank vikunk na ani tache poixe kiteak mhonn goribank diunk nant?”

⁶Taka goribanchem poddlelem mhonn nhoi, punn to chôr aslo dekhun tannem toxem mhonn’lem; tachê lagim pongtichi gantt astali ani tantum lôk ghaltalo tem to apnnak kaddi.

⁷Jezun mhonn’lem: “Asum-di tika! Mhojea nikhipinneachea disak tika ho pormôll samballum-di.

⁸Dubllim sodanch tumchê modem asat, punn Hanv tumchê modem sodanch na.”

⁹Jezu thõi asa mhonn Judei-karantleam zaiteam zannank koll’lem. Mhonntôch tim thõi ailim Jezuchêch pasot mhonn nhoi, punn Tannem mel’leantlo novean jivont kel’lea Lazarak-ui polleunk.

¹⁰Mhonn’toch mukhel iadnikamnim Lazarak-ui jivexim marunk tharailem,

¹¹kiteak, taka lagun, zaitim Judeikaram tankam soddun Jezucher bhavart tthevtalim.

¹²Dusrea disa, Porbek ail’lea zaitea lokan Jezu Jeruzaleak ieta mhonn aikolem.

¹³Hea pasot, maddancheô chuddtiô gheun Taka mellunk to lôk bhair sorlo ani oso arddunk laglo: “Zôi! Zôi! Sorvesporachea nanvan ieta Taka zôi! Israelachea Raiak zôi!”

¹⁴Ani Jezuk ek lhan — xem gaddum mell’lem ani tacher To boslo; kiteak oxem boroil’lem aslem:

¹⁵“Zionachê porjê, bhieum naka; ho polle tuzo Raza ieta, gaddvachea poracher bosun ieta!”

¹⁶Tache xis poilim heô vostu somzunk nant, punn jedna Devan Jezuk mhoimevont kelo, tedna Tachê vixim oxem boroil’lem aslem mhonn ani Taka oxem kel’lem mhonn tankam ugddas ailo.

¹⁷Lazarak somadhintlo bhair apoilo ani taka mel’leantlo utthoilo tedna Jezu borabôr aslo to lôk hê ghòddnê vixim govai ditalo.

¹⁸Heach pasot lokachi urpônz Taka mellunk bhair sorli: Jezun hi khunna kel’li mhonn tãnnim aikol’lem.

¹⁹Tedna Farizevamnim ekamekak mhonn’lem: “Pollelem mum? Amchem kãich cholona: akho sonvsar tachê pattlean chol’lo!”

²⁰Porbechea somoiar, Devak bhozunk Jeruzaleak choddun ail’leam modem thoddo Grik lôk aslo.

²¹Galileiantlê Bethsaidechea Filipa sorxim ieun, tãnnim oxi magnni keli: “Saiba, ami Jezuk polleunk sôdtanv.”

²²Filipan vochun Andrek sanglem; Andren ani Filipan borabôr Jezuk sanglem.

²³Jezun tankam portipall kelo: “Devan Mon’xachea Putak mhoimevont korcho vêll pavlo.

²⁴Hanv tumkam khoreponnim sot sangtam: gonvacho konno zomnir poddun moronam zalear, to tosoch urta; punn morot zalear, zaitem pik dita.

²⁵Jim konn aplea jivacho môg kortat, tim aplo jiv ibaddtat; ani jim konn hea sonvsarant aplea jivacho dvês kortat tim aplo jiv sasnnik jivitak samballtat.

²⁶Konn-ui Mhoji seva kortat zalear, tãnnim Mhozo pattlav korunk zai; ani zõi Hanv asam, thõi Mhojim sevok-ui astelim. Konn-ui Mhoji seva kortat zalear, Mhozo Bap tankam man ditolo.”

²⁷“Atam Mhojea jivacher akant aila. Hanvem kitem mhonnchem? Bapa, hea vellantlo Mhaka nivar, oxem mhonnum? Na, heach pasot Hanv hea vellak pavlam.

²⁸Bapa, Tujea Nanvak mhoima zoddun ghe.” Tedna sorgar thaun êk tallo ailo: “Hanvem Mhojea Nanvak mhoima zoddun ghetlea ani novean mhoima zoddun ghetolom.”

²⁹Hem aikun, lagim aslelea lokan mhonn’lem: “Gôddgôdd marla.” Dusreamnim mhonn’lem: “Êk devdut Tachê kodde uloila.”

³⁰Jezun portipall kelo: “Ho tallo Mhojê pasot nhoi, tôr tumchê pasot aila.

³¹Atam hea sonvsarachi mon’subi zata; atam hea sonvsarachea odhikareak Dev bhair ghaltolo.

³²Ani jedna Mhaka zomni velo ubartit, tedna Hanv soglleam mon’xank Mhojê-xim oddun haddtolom.”

³³Oxem mhonnun, Apunn koslê torechem moronn bhôgcho aslo, tem Tannem khunnailem.

³⁴Lokan Taka zobab dilo: “Krist sodankal jivo astolo mhonn ami Xastrantlem aikolam. Mon’xachea Putak ubarunk zai mhonn tum koso sangtai tôr? Konn to Mon’xacho Put?”

³⁵Jezun tankam mhonn’lem: “Anink iloch vêll tumchê sovem uzvadd asa. Uzvadd astana cholot ravat, na tôr tumi kallokak sampoddtelet; kallokant choltat tim apunn khõi vetat tem nokllot.

³⁶Tumi uzvaddachim bhurgim zaunchê khatir tumkam uzvadd astana uzvaddacher bhavart dovrat.” Oxem sangun, Jezu tanchê sorxilo gelo ani liplo.

³⁷Zori Tannem itleô khunna tanchê hujir kel’leô, tori tãnnim Tacher bhavart tthevunk na;

³⁸Izaias provadean sangun dovorlelem tem ghoddon ieunchê khatir hem oxem zalem; tachim utram him asat: “Sorvespora, ami porgôttlea ti khobor konn sotmandit? Ani hê ghòddnnent Sorvesporacho bollixtt hat konnak tori dokhôl zala zait?”

³⁹Khorench tanchean sot-manunk zaunk na, kiteak mhonn’lear oxem-i Izaiasan sangun dovorlelem:

⁴⁰“Apleam dolleamnim tãnnim pollena zaunk, aplea monan tankam somzona zaunk ani Hanvem tankam borim korchê khatir tim Mhojê-xim portun iena zaunk, tanche dolle Tannem kurdde keleat ani tanchem kalliz datt nibor kelam.”

⁴¹Jezuchi mhoima dekhli tedna Tachê sombondim Izaias oso uloil’lo.

⁴²Tori astana, odhikareantleam zaiteam zannamnim Tacher bhavart dovorlo, punn te hem bhailean dakhoinasle, kiteak tankam Farizevanchi bhirant asli ani apnnank devsthanantle bhair ghaltit mhonn te bhietale;

⁴³karonn, Devachê mhoimê poros, mon’xam modem zôddlolê vhoddvikechi te odik porva kortale.

⁴⁴Jezun vhoddlean mhonn’lem: “Mhojer bhavart tthevtat tim Mhojeruch nhoi, bogor Mhaka pattoila Tacher bhavart tthevtat.

⁴⁵Ani Mhaka polletat tim Mhaka pattoila Taka polletat.

⁴⁶Hanv sonvsarant uzvadd koso ailam; dekhun Mhojer bhavart dovortat tim kallokant urchim nant.

⁴⁷Mhojim utram aikoleam astana konn- ui tim pallinant zalear, Hanv tanchi mon’subi korina, kiteak sonvsarachi mon’subi korunk Hanv ieunk na, punn sonvsarachem taronn korunk ailam.

⁴⁸Jim konn Mhoji beporva kortat ani Mhojim utram manun ghenant, tanchi mon’subi korunk asa konn: jem utor Hanv uloilam tench nimannea disa tanchi mon’subi kortelem.

⁴⁹Kiteak Mhojêch osttongim Hanv ulounk na; Bapan Mhaka pattoila ani Hanvem kitem sangchem ani kitem ulounchem, hachê vixim Tannench Mhaka adnea dilea.

⁵⁰Ani Tachê adnê pormannem Hanv uloitam tem sasnnik jivit haddta mhonn Hanv zannom. Mhonntôch jem kitem Hanv uloitam, tem Bapan Mhaka sanglam toxench uloitam.”