Read Goan Konkani Ju 13 Bible Online

Ju 13 - Goan Konkani bible

Ju 13

¹Paskache Porbe adim, Jezu hea sonvsarantlo bhair sorun Bapa-xim vecho Aplo vêll pavlo mhonn zanno aslo. Sonvsarant asleleam Apleancho Tannem sodanch môg kel’lo, punn hea vellar Tannem sopurnnaien tancho môg korun dakhoilo.

²Tanchem rat-jevonn choltalem. Jezucho ghat gheuncho mhonn devcharan Simanvachea puta, Judas Iskariotachea monant ghal’lem.

³Sogllem Aplea hatant Bapan dilam, Apunn Deva thaun aila ani Deva-xim veta mhonn zanno zaun,

⁴Jezu jevnna velo utthlo, Tannem Aplem avoronn kaddlem ani êk rumal gheun to Aplea penkttak bandlo.

⁵Uprant, eka tostant udok otun, To xisanche pãi dhuvunk laglo, ani Apnnak bandlolo tea rumalak te pusunk laglo.

⁶To Simanv Pedru sorxem gelo; Pedrun Taka mhonn’lem: “Somia, Tum mhoje pãi dhutai?!”

⁷Jezun Taka portipall kelo: “Hanv kortam tem tuka atam somzona, punn magir somzotelem.”

⁸Pedrun Taka mhonn’lem: “Mhoje pãi dhuvunk hanv Tuka kodinch diuncho na!” Jezun taka portun mhonn’lem: “Hanv tuka dhuinam zalear, Mhojea vangdda tuka kãich aschem na.”

⁹Simanv Pedrun portipall kelo: “Toxem zalear, Somia, mhoje pãich nhoi, bogor mhoje hat ani mhoji tokli-i dhu.”

¹⁰Jezun taka mhonn’lem: “Nhala tannem fokot pãi dhulear puro: to soglloch nitôll asa; tumi tôr nitoll asat, punn soglle nitoll nant.”

¹¹Apnnacho ghat konn gheto aslo tem To zanno aslo; tea pasot Tannem mhonn’lem: “soglle tumi nitoll nant.”

¹²Tanche pãi dhuun zatôch, Aplim vostram ghalun, Jezu Aplê svater portun ailo. Tannem mhonn’lem: “Hanvem tumkam kitem kelam tem tumi somzoleat mum?

¹³Tumi Mhaka Guru ani Somi mhonntat; ani tumi sarkem uloitat, kiteak Hanv khorench Guru ani Somi.

¹⁴Mhonntôch, tumcho Somi ani Guru zaun-ui, Hanvem tumche pãi dhule zalear, tumi-i ekamekache pãi dhuunk zai.

¹⁵Hanvem tumkam dêkh dilea: Hanvem tumkam kelam toxench tumi-i korat.

¹⁶Hanv tumkam sot sangtam: aplea dhonia-vôn gulam’ vhôdd nhoi; toxench pattoil’lo konn apnnak pattoila tachê-vôn vhôdd nhoi.

¹⁷Hem zanno zaun, tumi toxench korxeat zalear, tumi subhagi!

¹⁸Hanv tumchi soglleanchi khobor korinam; konnank Hanvem vinchun kaddleat te Hanv zannom; punn Povitr Pustokantlem hem utor pallon ieunk zai: ‘Zo mhojê borabôr jevnnak boslolo asa, tannench Mhojer khôntt ubarli. ’

¹⁹Hem ghoddon ietelem tedna, Hanvuch to mhonn tumi bhavart dhôrchê khatir, hem ghòddchê adinch Hanv tumkam sangun dovortam.

²⁰Hanv tumkam sot sangtam: Hanv dhaddtam tankam mandun ghetat tim Mhaka manun ghetat, ani Mhaka manun ghetat tim Mhaka pattoila Taka manun ghetat.”

²¹Oxem uloun zatôch, Jezu soglloch thorthorlo ani ugteponnim Tannem mhonn’lem: “Hanv tumkam sot sangtam: tumchê bhitorlo eklo Mhozo ghat ghetolo.”

²²To konnachi khobor kortalo kai mhonn dubhavun, xis ekamakak polleunk lagle.

²³Tacheam xisam modlo eklo, Jezu môg kori to, Jezuchê kuxik jevnnak bosun aslo;

²⁴Khunna korun, Simanv Pedrun hea xisak mhonn’lem: “To konnachi khobor korta?”

²⁵Tannem Jezuchea horddear bagavon Taka mhonn’lem: “Somia, to konn?”

²⁶Jezun portipall kelo: “Zaka Hanv unddeacho kuddko buddoun ditolom, toch to.” Ani Tannem unddeacho kuddko ghetlo ani to buddoun, Simanv Iskariotachea puta, Judasak, dilo.

²⁷Unddeacho kuddko ghetlea uprant, tachê bhitôr Soitan riglo. Jezun taka mhonn’lem: “Tum korunk vetai tem veginch kôr.”

²⁸Kitea pasot Tannem oxem taka mhonn’lem, hem jevnnak boslelea dusrea konnakuch somzonk na.

²⁹Judasa lagim pongtichi gantt asli dekhun, Jezu taka oxem mhonnta mhonn kãi zannank dislem: “Porbek amkam gorjechem tem ghe” vô “goribank kitem-i ghal.”

³⁰Mhonntôch, unddeacho kuddko ghetlea uprant, to rokddoch bhair sorun gelo. Rat zal’li.

³¹To bhair vetôch, Jezun mhonn’lem: “Atam Mon’xachea Putak mhoima mell’lea ani Tachê sovem Devak mhoima mell’lea.

³²Devak Tachê sovem mhoima mell’lea zalear, Dev-ui Taka Apnna sovem mhoima ditolo, ani rokddoch Taka mhoimevont kortolo.

³³Mhojeam supurleam bhurgeamnô, anink thoddoch vêll Hanv tumchê sangatim asam. Tumi Mhaka sôdtelet; ani zoxem Hanvem Judeikarank mhonn’lam, toxem Hanv atam tumkam-i sangtam: Zõi Hanv vetam thõi tumchean ieunk zaina.

³⁴Êk novi adnea tumkam ditam; ekamekacho môg korat; Hanvem tumcho môg kela, tosoch tumi-i ekamekacho môg korat.

³⁵Ekamekacho môg korxeat zalear, tumi Mhoje xis mhonn soglleam mon’xank kolltelem.”

³⁶Simanv Pedrun Taka vicharlem: “Somia, Tum khõi vetai?” Jezun portipall kelo: “Hanv vetam thõi tujean atam Mhojê pattlean ieunk zaina, punn magir, Mhojê pattlean ietoloi.”

³⁷Pedrun Taka vicharlem: “Somia, kitea pasot mhojean atam Tujê pattlean ieunk zaina? Tujê pasot hanv mhozo jiv diunk toiar!”

³⁸Jezun zobab dilo: “Hôi? Mhojê pasot tum jiv diunk toiar asai? Hanv tuka sot sangtam, kombean sad ghalchê adim, tin pavtti tum Mhaka ollkhonãi mhonn sangtoloi.”