Read Goan Konkani Ju 14 Bible Online

Ju 14 - Goan Konkani bible

Ju 14

¹“Tumchim kallzam uchamboll zaunk dium nakat. Devacher visvas dovrat, tosoch Mhojer-ui dovrat.

²Mhojea Bapachea ghorant ravunk puskoll svatô asat; oxem nhoi aslem zalear, Hanv tumkam svat toiar korunk vetam mhonn tumkam sangto aslom?

³Ani vochun tumkam svat toiar kelea uprant, Hanv novean ietolom ani tumkam Mhojê-xim vhortolom; oxem, zõi Hanv asam, thõi tumi-i astelet.

⁴Ani Hanv vetam, ti vatt tumi zannont.”

⁵Tomasan Taka mhonn’lem: “Somia, Tum khõi vetai tem ami nokllonv, tôr vatt koxi zanno zatelenv?”

⁶Jezun taka oxi zap dili: “Vatt, Sot ani Jivit Hanvuch; Konnuch Bapa-xim vochona bogor Mhojê-vorvim.

⁷Tumkam Mhoji ollokh asli zalear, Mhojea Bapachi-i ollokh tumkam asto asli; atanchean tumi Taka ollkhotat ani tumi Taka dekhla.”

⁸Filipan Taka mhonn’lem: “Somia, amkam Bap dakhoi: itlench amkam puro!”

⁹Jezun taka portipall kelo: “Filip, itlo vêll tumchê sangatim asam, ani ozun tumi Mhaka ollkhunk na? Jim konn Mhaka polletat, tim Mhojea Bapak polletat; tôr ‘amkam Bap dakhoi’, oxem tujean koxem mhonnum-ieta?

¹⁰Hanv Bapa sovem asam ani Bap Mhojê sovem asa mhonn tuka bhavart na? J em kitem Hanv tumkam sangtam, tem Hanv Mhojêch osttongim uloina; punn Mhojê sovem asa to Bap Aplim kortutvam korit asa.

¹¹Mhojer bhavart dovrat: Hanv Bapa sovem asam, ani Bap Mhojê sovem asa; kortutvank lagun tori bhavart dhôrat.

¹²Khorench Hanv tumkam sot tem sangtam: jim konn Mhojer bhavart dovortat, tim Hanv kortam tim kortutvam apunn-ui kortelim, ani tanchê poros xrextt kortutvam kortelim, kiteak Hanv Bapa-xim vetam.

¹³Tumi Mhojea nanvan magxeat titlem-i Hanv kortolom, ani oxi Puta sovem Bapak mhoima mellteli;

¹⁴tumi kitem-i Mhojê nanvim magxeat zalear, Hanv tem kortolom.

¹⁵Tumi Mhozo môg kortat zalear, Mhojeô adnea samballtelet.

¹⁶Ani Hanv Bapa kodde magtolom ani To tumkam anink êk Xerati ditolo ani Ho tumchê sovem sodankal astolo.

¹⁷Toch to Deva sombondim sot ugddapem korta to Atmo. Sonvsar Taka gheunk xokona, kiteak sonvsarak To dixtti poddona ani sonvsar Taka ollkho-i na; Punn tumi Taka ollkhotat, kiteak To tumchê sangatim asa, ani To tumchê bhitôr ravtolo.

¹⁸Hanv tumkam onath koxe sanddcho nam; punn tumchê-xim ietolom.

¹⁹Anink thoddoch vêll, sonvsar Mhaka anink polleuncho na, punn tumi Mhaka polletelet, kiteak Hanv jivo asam dekhun, tumi-i jive astelet.

²⁰Hanv Mhojea Bapa sovem asam mhonn, toxench tumi Mhojê sovem asat ani Hanv tumchê sovem asam mhonn tea disa tumkam kollon ietelem.

²¹Mhojeô adnea ghetat ani palltat tinch Mhozo môg kortat; ani Mhozo môg kortat tancho Mhozo Bap môg kortolo, ani Hanv-ui tancho môg kortolom ani tankam Mhoji ollokh ditolom.”

²²Judasan (ho Iskariot nhoi, punn dusro) Taka mhonn’lem: “Somia, Tum sonvsarak Tuji ollokh diuncho nãi punn amkam ditoloi, hem oxem kitem?”

²³Jezun taka portipall kelo: “Mhozo môg kortat tim Mhojem utor samballtelim, ani Mhozo Bap tancho môg kortolo, ani Ami tanchê thãi ietelenv ani tanchê sovem tthikann kortelenv.

²⁴Mhozo môg korinant tim Mhojim utram samballinant; ani tumi aikotat tem utor Mhojem nhoi, punn Mhaka pattoila tea Bapachem.

²⁵Tumchê modem astana, Hanvem tumkam heô vostu sangleat.

²⁶Punn Bap Mhojê nanvim tumkam dhaddtolo to Xaroti, mhonngê Povitr Atmo, tumkam sogllem xikoitolo ani Hanvem tumkam sanglam tem sogott tumchea monant haddtolo.

²⁷Xanti tumkam dovortam, Mhoji xanti tumkam ditam; sonvsar dita toxi Hanv ti tumkam dinam. Tumchem kalliz uchamboll zaunk dium nakat, soglli bhirant sôddat.

²⁸Hanv vetam ani Hanv tumchê-xim ietam, oxem Hanvem tumkam sanglam mhonn tumi aikolam. Tumi Mhozo môg kel’lo zalear, Hanv Bapa-xim vetam mhonn tumi sontosbhorit zato aslet; kiteak Bap Mhojê-vôn vhôdd.

²⁹Hem ghoddon ailea uprant tumi bhavart dhôrchê khatir, atam hem ghòddchê adim Hanvem tumkam sanglam.

³⁰Anink tumchê lagim chodd Hanv ulouncho nam. Hea sonvsaracho odhikari ieuncho zalo; Mhojê voir taka koslich podvi na;

³¹punn Hanv Bapacho môg kortam mhonn ani Bapan Mhaka dilea ti adnea Hanv sarki palltam mhonn sonvsarak kollon ieunk zai. Utthat tôr! hangasorle vochum-ia!”