Read Goan Konkani Ju 15 Bible Online

Ju 15 - Goan Konkani bible

Ju 15

¹“Hanv khori Dak-Vêl ani Mhozo Bap kullvaddi,

²Mhojê sovem riglolo na zaun follam dina to dôr-êk fantto To katrun uddoita; ani follam dita to dôr-êk fantto, tannem odik follam diunchê khatir, To bhênddta.

³Hanv tumchê lagim uloilam tea utra vorvim tumi nitoll zaleat.

⁴Mhojê sovem rigun ravat ani Hanv-ui tumchê sovem rigun ravtam. Zoxem êk fantto dak-velint rigun ravlea xivai, tachean apnnachêch osttongim follam diunk zainant, toxench tumi Mhojê sovem rigun ravlea xiva, tumchean-ui follam diunk zainant.

⁵Hanv Dak-Vêl, tumi fantte. Jim konn Mhojê sovem rigun ravtat ani zanchê sovem Hanv rigun ravtam, tim subham’ follam ditat; kiteak Mhojê virêt tumchean kãich korunk zaina.

⁶Mhojê sovem rigun ravonant tim eka katrun uddoil’lea fanttea sarkim suktat; osle fantte zoma kortat ani ujeant uddoitat, ani te lastat.

⁷Tumi Mhojê sovem rigun ravxeat ani Mhojim utram tumchê sovem rigun ravtit zalear, tumkam zai tem magat ani tumkam tem ghòddtelem.

⁸Tumi subham’ follam diunchim, ani Mhoje xis tumi zaunche, hantum Mhojea Bapak mhoima mellta.

⁹Zoso Bapan Mhozo môg kela, toso Hanvem-i tumcho kela: Mhojea mogant ravat.

¹⁰Zoxem Hanvem Mhojea Bapacheô adnea samball’leat ani oso Tachea mogant Hanv asam, toxench tumi-i, Mhojeô adnea tumi samballxeat zalear, Mhojea mogant ravtelet.

¹¹Mhoji khuxalkai tumchê sovem aschê khatir ani tumchi khuxalkai purnn zaunchê pasot Hanvem tumkam heô vostu sangleat.

¹²Mhoji adnea hi: zoso Hanvem tumcho môg kela, tosoch tumi-i ekamekacho korat.

¹³Konnem zôr apleam ixttam pasot aplo jiv dilo, hachê poros vhôdd môg konnak na!

¹⁴Mhojê adnea pormannem tumi cholxeat zalear, tumi Mhoje ixtt.

¹⁵Hea fuddem Hanv tumkam chakor mhonncho na, kiteak aplo dhoni kitem korta tem chakôr nokllo; punn Hanv tumkam ixtt mhonntam, kiteak Mhojea Bapa koddchem Hanvem aikolam titlem-i Hanvem tumkam kolloilam.

¹⁶Tumi Mhaka vinchun kaddunk na: Hanvem ki tumkam vinchun kaddleat. Ani hea pasot tumkam nemleat ki tumi vechem ani follam diunchim, togtat toslim follam. Oxem Mhojê nanvim Bapa kodde tumi magtat titlem-i To tumkam ditolo.

¹⁷Hi Mhoji adnea tumkam: ekamekacho môg korat.

¹⁸Sonvsar tumkam zollta zalear, tumkam zollchê adim to Mhaka zoll’la mhonn zanno zaiat.

¹⁹Tumi sonvsarache asleat tôr, sonvsar tumkam aple mhonn manun tumcho môg korto aslo. Punn tumi sonvsarache nhoi mhonn ani Hanvem tumkam sonvsarantle vinchun kaddleat dekhun, sonvsar tumkam zollta.

²⁰Chakôr aplea dhonia poros vhôdd nhoi: oxem Hanvem tumkam sanglam tea utracho ugddas dhôrat. Tãnnim Mhaka dhumallo dila zalear, tim tumkam-i dhumallo ditelim; tãnnim Mhojem utor samball’lam zalear, tumchem-i samballtelim.

²¹Punn hem sogllem Mhojea nanva pasot tim tumkam kortelim, kiteak Mhaka pattoila Tachi tankam ollokh na.

²²Hanv ieunk naslom ani tankam Mhozo sondêx Hanvem diunk naslo zalear, tankam patok aschem naslem; punn atam tanchem patok tancher thapina zaunk tankam nimituch na.

²³Mhaka zolltat tim Mhojea Bapak-ui zolltat.

²⁴Dusrea khõicheach mon’xan korunk nant tosleô kornneô Hanvem tanchê modem korunk nasleô zalear, tankam patok aschem naslem; punn atam tãnnim hem sogllem pollelam, tori astam tim Mhaka ani Mhojea Bapak-ui zolltat.

²⁵‘Karonn nastana Mhozo dvês kelo’, hem tanchea xastrant boroil’lem utor ghoddonk zai mhonn oxem zalem.

²⁶Hanv Bapa koddsun tumchê-xim êk Xerati pattoitolom; To Bapa-sun nipzota ani Deva sombondim sot ugddapem korta to Atmo: To ietolo tedna, To Mhojê vixim sakxi ditolo;

²⁷ani survatek thaun tumi Mhojê sangatim asat dekhun, tumi-i Mhoje sakxi zatelet.