Read Goan Konkani Ju 16 Bible Online

Ju 16 - Goan Konkani bible

Ju 16

¹Tumcho bhavart ddonvddollna zaunk hem Hanvem tumkam sanglam.

²Tim tumkam devsthanantle bhairaitelim; khorem mhollear oslo vêll pavot ailo, ki jim konn tumkam jivexim martat, tim apunn Devachi bhokti kortat mhonn somzotelim.

³Ani tãnnim Bapak ani Mhaka-i ollkhunk na dekhun, tim oxem kortelim.

⁴Tancho vêll pavtôch Hanvem tumkam heô vostu sangleleô mhonn tumkam ugddas zaunchê khatir, Hanvem teô tumkam sangleat. Hanv tumchea sangata aslom dekhun, survatek thaun Hanvem tumkam heô vostu sangunk nant.

⁵Punn atam Hanv Mhaka pattoila Tachê- xim vetam; tori Tum khõi vetai kai mhonn tumchê bhitorlo eklo-i Mhaka vicharina.

⁶Punn Hanvem tumkam heô vostu sangleat dekhun, tumchim kallzam khontin bhòrleant.

⁷Tori astam, Hanv tumkam sot sangtam: Hanv gelom zalear, tumkam adavachem; Hanv vochona zain zalear, Xerati tumchê thãi ieuncho na; punn Hanv gelom zalear, Taka tumchê thãi dhaddtolom.

⁸Ani To ietolo tedna, patka vixim, Devak manonvto goti vixim, ani Devachea nirnnoia vixim, hem sogott dakhoun To sonvsaracho guneanv-sid’d kortolo.

⁹Monxank tanchem patok To Povitr Atmo dakhoitolo, kiteak tim Mhojer bhavart dovrinant;

¹⁰Devak manovto goti vixim To mon’xank dakhoitolo, kiteak Hanv Bapa-xim vetam ani tumi Mhaka anink polleunchim nant;

¹¹Devacho nirnnoi konn to, Toch Povitr Atmo dakhoitolo, kiteak hea sonvsarachea odhikariacher Devan khastichem formonn marlem.

¹²Ozun zaiteô vostu Hanvem tumkam sangcheô asat, punn teô tumchean atam monant gheunk zainant.

¹³Deva sombondim sot ugddapem korta to Atmo ietolo tedna, To tumkam purnn sotachê vatten choloitolo, kiteak To Aplea podorchem ulouncho na, punn jem kitem To aikota tem To sangtolo, ani ghòddchem asa tem sogllem tumkam kolloitolo.

¹⁴To Mhaka mhoima ditolo, kiteak jem To tumkam kolloitolo, tem To Mhojê koddsun ghetolo.

¹⁵Jem Bapachem tem sogllem Mhojem; hea pasot Hanvem oxem mhonn’lam: jem To tumkam kolloitolo, tem To Mhojê koddsun ghetolo.

¹⁶Thoddeach vellan tumi Mhaka polleunche nant; ani uprant thoddea vellan tumi Mhaka novean polletelet.”

¹⁷Tacheam xisantleam kãi zannamnim ekamekak mhonn’lem: “To sangta: ‘thoddeach vellan tumi Mhaka polleunche nant, ani uprant thoddea vellan tumi Mhaka novean polletelet, ani ‘Hanv Bapa-xim vetam’—hem To amkam mhonnta tem kitem?”

¹⁸Tôr te mhonntale: “To ‘ thoddo vêll’ mhonnta tem kitem? To sangta tem amkam somzonam.”

¹⁹Te Apnna kodde vicharunk kortale mhonn zanno zaun, Jezun mhonn’lem: “ ‘Thoddeach vellan tumi Mhaka polleunche nant ani uprant thoddea vellan tumi Mhaka novean polletelet’, oxem Hanvem mhonn’lem tacho ôrth tumi ekameka kodde vichartat?

²⁰Hanv tumkam sot sangtam: tumi roddtelet ani pinrgotelet, punn sonvsar khuxalbhorit zatolo; tumi khontibhorit zatelet, punn khontichê bodlek tumkam melltolo sontôs.

²¹Êk bail, porsutt zaunchea vellar, aplo vogôt pavlo mhonn khontibhorit zata, punn bhurgeak zolm ditôch sonvsarant êk monis zolmola mhonn sontosun, tika anink khonticho ugddas zaina.

²²Toxench tumkam atam khônt zalea, punn Hanv tumkam novean polletolom, ani tumchem kalliz khuxalborit zatelem, ani tumchi khuxalkai konnuch tumchê thaun kaddun vhorcho na.

²³To dis ietolo tedna, tumi Mhaka kãi vicharche nant. Hanv tumkam sot sangtam: Mhojea nanvan Bapa lagim tumi kitem-i magxeat zalear, To tumkam ditolo.

²⁴Ozun porian tumi Mhojê nanvim kitench magunk na. Magat ani tumkam melltelem, ani oso tumcho anond purnn zatolo.”

²⁵“Hem sogllem Hanvem tumkam voparimnim sanglam; punn oslo vêll pavot ailo, ki Hanv anink tumchê kodde voparimnim ulouncho na, punn Bapa vixim ugddapim uloitolom.

²⁶Tea disa tumi Mhojê nanvim magtelet; ani tumchê khatir Hanv Bapa lagim magtolom mhonn Hanv tumkam sangina;

²⁷karonn Bap khaxa tumcho môg korta, kiteak tumi Mhozo môg kela ani Hanv Tachech-sun upzolam mhonn tumi bhavart dhôrla.

²⁸Hanv Bapa-sun upzolam ani sonvsarant ailam; atam Hanv sonvsar sôddtam ani Bapa-xim vetam.”

²⁹Tacheam xisamnim mhonn’lem: “Atam ki Tum ugddapim uloitai, ani koslich vopar vaprinãi.

³⁰Tum sogllem zannoi mhonn atam amkam koll’lem ani konnem kitench vicharchi Tuka goroz na; hea pasot Tum Deva thaun ailai mhonn ami bhavart dhôrtanv.”

³¹Jezun tankam portipall kelo: “Atam tori tumi bhavart dhôrtat?

³²Oslo vêll pavot ailo, khoreponnim to pavlo, ki tumi soglle ap-aplê vatten ximpoddtelet ani Mhaka ekloch sanddtelet. Khorench mhollear, Hanv eklo na, kiteak Mhojea sangata Bap asa.

³³Mhojê sovem tumkam xanti mellchê khatir Hanv tumchê kodde heô vostu uloilam. Sonvsarant tumkam khônt astelich; punn kalljidar zaiat! Hanvem sonvsaracher zoit vhelem!”