Read Goan Konkani Ju 17 Bible Online

Ju 17 - Goan Konkani bible

Ju 17

¹Oxem uloilea uprant, Aple dolle sorgak lavun Jezun mhonn’lem: “Bapa, vêll pavlo: Putan Tuka mhoima diunchê pasot, Tujea Putak mhoimevont kôr.

²Tunvem Taka dil’leam somestank Tannem sasnnik jivit diunchê khatir, akhea mon’xakullacher Tunvem Taka odhikar dilai.

³Tuka, ekleach khorea Devak, ani Zaka Tunvem pattoilai tea Jezu Kristak ollkhun ghevop,” hench tem sasnnik jivit.

⁴Hanvem Tuka prithumecher mhoima dili; Tunvem Mhaka korunk dil’lem kam’ Hanvem sompadlem.

⁵Atam, Bapa, sonvsar aschê adim ji Mhaka Tujea sangata mhoima asli, têch mhoimen Mhaka bhôr.

⁶Sonvsarantle kaddun Tunvem Mhaka dileai team mon’xank Hanvem Tuka ollkhunk pavoile; te Tuje asle, ani Tunvem te Mhaka dilei, ani tãnnim Tujem utor samball’lam.

⁷Jem sogllem Tunvem Mhaka dilãi tem Tujê koddsun ieta mhonn atam tankam koll’lem.

⁸Ji xikovnn Tunvem Mhaka dileai ti Hanvem tankam dilea, ani tãnnim ti mandun ghetlea, ani Hanv Tujê-sun ailam mhonn tãnnim khoreponnim ollkhun ghetlam; ani Tunvench Mhaka pattoilai mhonn tãnnim bhavart dhôrla.

⁹Tanchê pasot Hanv magtam; sonvsara pasot magina, punn Tunvem Mhaka dileai tanchê pasot magtam, kiteak te Tuje.

¹⁰Jem Mhojem tem sogllem Tujem, ani jem Tujem tem sogllem Mhojem; ani tanchê vorvim Mhaka mhoima mell’lea.

¹¹Ani atam Hanv anink sonvsarant na, punn te sonvsarant asat, ani Hanv Tujê-xim ietam. Povitr Bapa, Tunvem Mhaka dileai te Amchê vori êk zaunchê khatir, tankam Tujê Nanvim samball.

¹²Tanchê sangatim astana, Tunvem Mhaka dileai tancho Tujê Nanvim Hanvem samball kelo. Hanvem tankam rakhle, ani Povitr Pustokantlem utor khorem zaunchê khatir, zachem nisontton zaunk zai aslem taka ekleakuch bhairaun, tanchê bhitorlo konnuch ibadd zalo na.

¹³Punn atam Hanv Tujê sorxim ietam, ani Mhozo sontôs tankam sopurnnaien mellchê pasot, Ozun sonvsarant astana heô vostu uloitam.

¹⁴Hanvem Tujem utor tankam dilam; ani zoso Hanv sonvsaracho nhoi, toxe te-i sonvsarache nhoi dekhun, sonvsar tancho dvês korta.

¹⁵Tum tankam sonvsarantle kadd mhonn Hanv magina, punn Noxtteachea hatantle tankam rakh mhonn magtam.

¹⁶Zoso Hanv sonvsaracho nhoi, toxe te-i sonvsarache nhoi.

¹⁷Sota vorvim tankam sonvskarlole kô: Tujem utor-uch tem sot.

¹⁸Zoxem Tunvem Mhaka sonvsarant pattoilai, toxench Hanvem-i tankam sonvsarant pattoileat.

¹⁹Ani te sota vorvim sonvskarlole zaunchê khatir, tanchê pasot Hanv Mhakach sonvskartam.

²⁰Hanv magnnem kortam tem hanchêch pasot nhoi, tôr jim konn tanchea utra vorvim Mhojer bhavart dovortelim, team-i mon’xam pasot.

²¹Tim sogllim êk zaum. Zoxem Tum, Bapa, Mhojê sovem asai ani Hanv Tujê sovem asam, toxench tim-i Amchê sovem êk zaum, ani, hê porim, Tunvem Mhaka pattoilai mhonn sonvsar bhavart dhorum.

²²Zoxem Ami Êk, toxim tim êk zaunchê khatir, Tunvem Mhaka dileai ti mhoima Hanvem tankam dilea.

²³Hanv tanchê sovem ani Tum Mhojê sovem asun tim sopurnnaien êk zaum; oxem, Tunvem Mhaka pattoilai mhonn, ani zoso Tunvem Mhozo môg kelai, tosoch Tunvem tancho môg kelai mhonn sonvsar ollkhun gheum.

²⁴Bapa, zõi Hanv asam, thõi Tunvem Mhaka dileãi tim-i aschim mhonn Mhoji khuxi, ani oxem Tunvem Mhaka dileai ti mhoima tãnnim polleunchi, kiteak sonvsar rochchê adim Tunvem Mhozo môg keloi.

²⁵Nitivont Bapa, sonvsaran Tuka ollkhun gheunk na, punn Hanv Tuka ollkhotam ani Tunvem Mhaka pattoilai mhonn hãnnim ollkhun ghetlam.

²⁶Hanvem tankam Tuji ollokh dilea ani ozun ditolom; hê porim, jea mogan Tunvem Mhozo môg kelai toch môg tanchê sovem astolo; ani Hanv-ui tanchê sovem astolom.”