Read Goan Konkani Ju 18 Bible Online

Ju 18 - Goan Konkani bible

Ju 18

¹Oxem uloitôch, Jezu Apleam xisam sangatim Kedron gallachê poltoddi gelo. Thõi êk bag asli; tantum To Apleam xisam borabôr bhitôr sorlo.

²Ghatki Judas-ui hea zageachi khobor zanna aslo, kiteak sobar pavtti Jezu thõi Apleam xisam borabôr vocho.

³Soinikancho êk zomo ani mukhel iadnikamnim ani Farizevamnim dhaddleleam chovkidarank gheun, Judas ailo: lampianv ani chuddô ani ostram-xostram gheun te thõi pavle.

⁴Tedna Jezu, Apnnak kitem ghòddto aslem tem sogllem zanno zaun, fuddem sorlo; Tannem tankam mhonn’lem: “Konnak sodunk aileat tumi?”

⁵Tãnnim Taka zobab dilo: “Nazaretkara Jezuk.” Jezun tankam mhonn’lem: “Hanv To.” Ani ghatki Judas tanchê borabôr ubo aslo.

⁶“Hanv To.” Jezun mhonn’lem tedna, te pattim sorle ani zomnir xevttole.

⁷Novean Tannem tanchê kodde vicharlem: “Konnak sodunk aileat tumi?” Ani tãnnim mhonn’lem: ‘Nazaretkara Jezuk. ’

⁸Jezun portipall kelo: “Nazaretkar Jezu”, “To Hanv.” mhonn Hanvem tumkam sanglem; “Mhonntôch, tumi Mhaka sodunk aileat zalear, hankam vochum-di.”

⁹“Tunvem Mhaka dileai tanchê bhitorlea ekleak legun Hanvem ibadd zaunk diunk na.”, oxem Tannem mhonnlelem tem utor ghoddon ieunk zai aslem.

¹⁰Simanv Pedru kodde êk torsad asli, ti tannem bhair kaddli, ani porom’-iadnikachea chakracher marun tacho uzvo kanuch katorlo. Tea chakrachem nanv Malku.

¹¹Jezun Pedruk mhonn’lem: “Tuji torsad poteant ghal; Bapan Mhaka dilam tem patr pieunchem nhoi Hanvem?”

¹²Soinikanchea sordara soit, tanchea zomean, ani Zudevancheam chovki-daramnim Jezuk dhôrlo ani bandlo.

¹³Tãnnim Taka poilo An’nasager vhelo, tea vorsachea porom’-iadnika, Kaifasacho to sasro aslo.

¹⁴Porjê khatir eklo monis melear odik faideachem mhonn Zudevank budh dil’li to hoch to Kaifas.

¹⁵Simanv Pedru ani dusro eklo xis Jezu pattlean gele. Ho xis, porom’-iadnikachê ollkhicho aslo dekhun, Jezu borabôr porom’-iadnikachea angnnant bhitôr sorlo,

¹⁶punn Pedru dara bhair ravlo. Porom’-iadnikachê ollkhicho aslo tea dusrea xisan dar-rakhnnê kodde utor ghalem ani tinnem Pedruk bhitôr vochunk dilem,

¹⁷punn teach dar-rakhnnê cheddvan Pedruk mhonn’lem: “Tum-i hea mon’xacheam xisantlo nhoi?” Tannem mhonn’lem: “Hanv nhoi.”

¹⁸Itlea mhonnosôr, hinv khatalem dekhun, kollxeancho dhogtto kel’lo tachê bhonvtim ravun chovkidar ani chakram xektalim; Pedru-i tanchê borabôr ubo aslo ani xektalo.

¹⁹Porom’-iadnik, Jezuk kãi vichar ghalun, Tacheam xisam ani xikovnnê vixim Tachi chovkoxi korunk laglo.

²⁰Jezun taka zobab dilo: “Hanv sobhêmazar spoxtt uloilam; sodanch Hanvem devsthanant ani Devmondirant, sogllo Judêv lôk ektthãi zata thõi, xikovnn dilea; guptim Hanv kitench ulounk na.

²¹Mhojê lagim kiteak vichartai? Hanvem kitem mhonn’lam tem Mhaka aikolam tanchê lagim vichar; Hanvem sanglam tem tim borim zannont.”

²²Tannem oxem mhonnona fuddem, thõi ubo aslelea eka chovkidaran Jezucher thapott marlem ani mhonn’lem: “Porom’-iadnikak tum oso zobab ditai?”

²³Jezun oxi zap dili: “Hanv vankddem uloilam zalear, vankddem kitem tem dakhoi; punn zôr Hanv sarkem uloilam, zalear kiteak mhonn tum Mhaka martai?”

²⁴Tedna Anasan Taka bandun, porom’-iadnika, Kaifasager pattoilo.

²⁵Simanv Pedru ozun thõi ubo aslo ani xektalo. Tãnnim taka mhonn’lem: “Tum-i tacheam xisantlo nhoi?” Tannem na mhonn’lem: “Hanv nhoi.”

²⁶Porom’-iadnikachea eka chakran Pedruk mhollem: “Arê! hanvem tuka tachê borabôr bagent polleunk nam rê?” (Ho chakôr Pedrun kan katorlolo tacho soiro aslo).

²⁷Pedrun anink êk pavtt na mhonn’lem, ani tednanch kombean sad ghalo.

²⁸Sokall zatôch tãnnim Kaifasager thaun Jezuk nitixallent vhelo. Apunn battona zaunk, punn apnnank Pask-Jevonn korunk mellchê khatir, te nitixallent bhitôr vochunk nant.

²⁹Hea pasot, apunnuch tanchê-xim bhair ieun, Pilatan mhonn’lem: “Hea mon’xacher tumi koslo arôp gheun aileat?”

³⁰Tãnnim taka zobab dilo: “Ho monis noxtto nhoi aslo zalear, ami taka tujê adhin korche naslenv.”

³¹Pilatan tankam mhonn’lem: “Tumich taka vhorat ani tumchê Somurti pormannem tachi nit korat.” Judevamnim taka mhonn’lem: “Amchean konnachoch jiv kaddum nozo.”

³²Apunn koso mortolo aslo, hachê vixim jem Jezun sangun dovorlelem, tem khorem zaunchê khatir oxem ghòddlem.

³³Pilat novean nitixallent gelo ani Jezuk apoun tannem Taka vicharlem: “Judevancho raza tum?”

³⁴Jezun portipall kelo. “Hem tum tujêch osttongim mhonntai vô dusreamnim tuka Mhojê vixim oxem sanglam?”

³⁵Pilatan mhonn’lem: “Hanv Judêv tôr? Tujeach lokan ani mukhel iadnikamnim tuka mhojê adhin kela. Kitem kelãi tôr tunvem?”

³⁶Jezun portipall kelo: “Mhojem raj hea sonvsarantlem nhoi; Mhojem raj hea sonvsarantlem zal’lem zalear, Hanv Judevanchea hatant poddona zaunk Mhoje sevok zhuzto asle; punn Mhojem raj hangasorlem nhoi.”

³⁷Pilatan Taka mhonn’lem: “Mhonntôch, raza tum?” Jezun zobab dilo: “Hanv Raza mhonn tunvench sangli tem sarkem asa. Heach pasot Hanv zolmolam ani sotak govai diunk sonvsarant ailam. Jim konn sot mandun gheunk toiar asat, tim Mhozo tallo aikotat.”

³⁸Pilatan Taka vicharlem: “Sot mhonngê kitem?” Oxem uloun, novean Judevam sorxem bhair vochun, tankam mhonn’lem: “Mhaka tacho kosloch guneanv mellona.

³⁹Punn Paskachea somoiar, tumchi chal asa tea pormonnem tumche khatir hanvem sodanch eklea koideak suttka dil’lea dekhun Judevanchea patxaiak hanvem suttoil’lo tumkam zai?”

⁴⁰Tãnnim porot bob marun mhonn’lem: “Haka soddinaka, punn Barab’basak!” (Barab’bas mhollear êk pundd aslo.)