Read Goan Konkani Ju 19 Bible Online

Ju 19 - Goan Konkani bible

Ju 19

¹Tedna Pilatan Jezuk dhorun Tacher jerbond marunk laile.

²Soinikamnim kantteancho êk mukutt vinnlo ani Tachea mathear bosoilo, ani Tacheam bhuzancher ek zambllem avoronn uddoilem.

³Te Tachê-xim ieun mhonntale: “Noman, Judevanchea raza!” ani Tacher thapttam martale.

⁴Novean bhair ieun, Pilatan tankam mhonn’lem: “Polleiat, tacho mhaka kosloch guneanv mellonam mhonn tumkam kollon ieunchê pasot hanv taka bhair haddtam.”

⁵To kantteancho mukutt ani tem zambllem anglem ghalun Jezu bhair ailo. Pilatan tankam mhonn’lem: “Polleiat, ho asa to monis!”

⁶Taka pollena fuddem, mukhel iadnikamnim ani chovkidaramnim oxi bob marli: “Taka khursar mar! khursar mar Taka!” Pilatan tankam mhonn’lem: “Tumich taka vhorat ani khursar marat; mhaka tacho kosloch guneanv mellona.”

⁷Judevamnim taka portipall kelo: “Amkam xastr asa, ani amchea xastra pormannem taka moronn favo, karonn to apnnakuch Devacho Put korta.”

⁸Him utram aikolim tedna, Pilat odik bhielo.

⁹Porot nitixallent vochun, tannem Jezuk vicharlem: “Tum khõicho ga?” Punn Jezun taka zabab diunk na.

¹⁰Tea pasot Pilatan Taka mhonn’lem: “Tum mhojê kodde uloinãi? Tuka soddunk ani tuka khursar marunk mhaka odhikar asa mhonn tum noklloi?”

¹¹Jezun taka portipall kelo: “To tuka voir sorgar thaun diunk naslo zalear, Mhojer tuka kosloch odhikar ascho naslo; hea pasot zannem Mhaka tujea hatant dila, taka odik vhôdd guneanv asa.”

¹²Hê ghoddiê meren Pilat Taka soddunk kosli-i tori vatt sôdtalo, punn Zudevamnim bob marli: “Hea mon’xak sôddxi zalear, tum Somrazacho ixtt nhoi; apnnakuch raza korta to monis Somrazacho virodhi zata!”

¹³Pilatan him utram aikolim tedna, tannem Jezuk bhair haddlo ani Chirebondi mhonntat tê svater (Aramaik bhaxen Gab’bata) apunn nitisodrer boslo.

¹⁴To dis Paskachê toiarecho dis aslo; sumar don’par zal’lo. Pilatan Zudevank mhonn’lem: “Ho polleiat tumcho raza!”

¹⁵Tim arddunk laglim: “Taka nanch kôr! Taka nanch kôr! Taka khursar mar!” Pilatan tankam mhonn’lem: “Tumchea razak hanv khursar marum?” Mukhel iadnikamnim zobab dilo: “Somraza bogor amkam dusro raza na!”

¹⁶Tedna Taka khursar marunk Pilatan Jezuk tanchê adhin kelo. Tednam tãnnim Jezuk aplea tabeant ghetlo.

¹⁷Ani to Aplo khuris gheun Kortt’to mhonnlelea zagear vochunk bhair sorlo: hea zageachem nanv Aramaik bhaxen Golgota.

¹⁸Thõi Taka ani Tachê borabôr anink dogank tãnnim khursar marle: Jezuk modem ani team dogank Tachê êk-êkê kuxik.

¹⁹Pilatan êk namlêkh boroilo ani to khursa voir ghalo; tacher oxem boroil’lem aslem: “Nazaretkar Jezu, Judevancho Raza Ho.”

²⁰Jezuk khursar marlo ti svat xara lagim asli dekhun, zaiteam Judeikaramnim to namlêkh vachlo; to Aramaik, Latin ani Grik bhasamnim boroil’lo.[5]

²¹Tedna Judevancheam mukhel iadnikamnim Pilatak mhonn’lem: “Judevancho Raza mhonn boroinaka. Punn ho monis apunn Judevancho Raza mhonntalo mhonn boroi.”

²²Pilatan zobab dilo: “Hanvem boroilam tem boroun urlem.”

²³Jezuk khursar martôch, soini-kamnim Tachim vostram ghetlim ani tanche char vantte kele, dôr soinikak êk vantto. Toxench Tachem anglem ghetlem. Angleak xivônn nasli; tem voir-tem sokol eksarkem vinnlelem;

²⁴hea pasot tãnnim ekamekak mhonn’lem: “Ami tem pinzchem nhoi, punn sorti ghalun tem konnak poddta tem polleum-ia.” Hê porim Povitr Pustokantlim him utram ghoddon ailim: “Tãnnim mhojim vostram apnnam modem vanttlim ani mhojea angleacher sorti ghaleô.” Oxem soinikamnim kelem.

²⁵Jezuchea khursa sorxim Tachi avoi, Tachê avoichi bhoinn Kleofasachi potinn Maria, ani Magdalachi Maria, heô ubeô asleô.

²⁶Aplê avoik ani tichê kuxik ubo aslelea mogachea xisak polleun, Jezun avoik mhonn’lem: “Ostriê, ho tuzo put!”

²⁷Uprant xisak mhonn’lem: “Hi tuji avoi!” Ani tea vellar thaun tea xisan tika apnnager ravunk vheli.

²⁸Hea uprant, sogllem sompadlem mhonn zanno zaun, Povitr Pustok sopurnnaien pallon ieunchê khatir, Jezun mhonn’lem: “Mhaka tan laglea.”

²⁹Xirkean bhòrlelem donddul thõi aslem; tãnnim xirkeant buddoil’lem ek allombem boddiek lavun Tachea tondda-xim pavoilem.

³⁰Xirko chaklo tedna, Jezun mhonn’lem: “Sompadlem!” Ani, tokli bagaun, Tannem prann sôddlo.

³¹To Toiarecho dis aslo, ani kherit dobajeacho Sabbath lagim pavlolo. Sabbatha disa kuddi khursar uronk tankam naka aslem dekhun, tanche pãi môddche ani tancheô kuddi kaddun vhorcheô mhonn Judevamnim Pilata kodde maglem.

³²Soinik aile ani Jezu borabôr khursar marleleanche, poileache toxench dusreache-i, tãnnim pãi môddle;

³³punn Jezu-xim pavtôch, To melo mhonn polleun tãnnim Tache pãi môddle nant.

³⁴Punn eka soinikan êk bhalo gheun Tachi kus vidhli, ani rokddench rogot ani udok vhanvlim.

³⁵Zannem hem khaxa pollelem, tannench, tumi-i bhavart dhôrchê pasot, hi govaiki dilea: tachi govaiki khori ani apunn sot uloita mhonn to zanno.

³⁶Povitr Pustok oxem mhonnta: “Tachem ek-punn hadd môddchim nant.” Hem utor khorem zaunchê khatir heô vostu ghòddleô.

³⁷Povitr Pustok oxem-i mhonnta: “Tannim aspas vidhleleak tinch polletelim.”

³⁸Hachê uprant, Judevanchê bhirantin guptim ravlelea, Jezuchea xisa, Arimateiachea Juzen Jezuchi kudd kaddun vhorunk Pilata kodde maglem. Pilatan rojia dili. Tannem ieun Jezuchi kudd kaddun vheli.

³⁹Ani Nikodem’-ui (Jezu-xim poilim ratcho ail’lo to) sumar xembhôr rat gondhrosachi ani musambhorachi misollnni gheun ailo.

⁴⁰Tãnnim Jezuchi kudd ghetli, ani Judevanchê nikhipinneachê riti pormannem, pormoll lavun ti olimnim guttlaili.

⁴¹Taka khursar marlolo tê svater êk bag asli, ani tê bagent ozun konnak ghalunk naslo tosli ek novi somadhi asli.

⁴²To Judevancho Toiarecho dis aslo mhonnun ani ti somadhi laginch asli dekhun, tãnnim Jezuk thõi ghalo.