Read Goan Konkani Ju 2 Bible Online

Ju 2 - Goan Konkani bible

Ju 2

¹Tisrea disa, Galileiachea Kana ganvant ek logn aslem, ani Jezuchi avoi thõi asli;

²tea lognak Jezuk-ui ani Tacheam xisank apovnnem aslem.

³Soro somplo. Tedna Jezuchê avoin Taka mhonn’lem: “Tanchê lagim soro na.”

⁴Jezun tika mhonn’lem: “Ostorê, tuka ani Mhaka hem kiteak poddlam? Mhozo vêll ozun pavunk na.”

⁵Tachê avoin chakrank mhonn’lem: “To sangit titlem-i tumi korat.”

⁶Thõi, Judevanchê xud’dhi korpachê riti pormannem, fatrachim sô donnam aslim; dor-ekant char te sô kollxe zatale.

⁷Jezun tankam mhonn’lem: “Donnam udkan bhôrat.” Ani tãnnim tim oto-sôr bhôrlim.

⁸Tannem tankam mhonn’lem: “Tantlem ilem kaddun logna-porbechea karbhareak vhorun diat.” Tãnnim toxem kelem.

⁹Karbharean soro zal’lem udok chakun pollelem. To soro khõicho ailo tem to nokllo aslo, punn udok kaddlelem te chakor mat zanno asle. Hea pasot karbharean novreak apoun haddlo,

¹⁰ani taka mhonn’lem: “Soglleanger poilo boro soro ditat, ani lôk borench pietôch, holko to vantt’tat. Punn tunvem boro soro atam porian dovorlai.”

¹¹Hi apleam khunnam modli poili khunna Jezun Galileiachea Kana ganvant keli, ani Apli mhoima fankoili; ani Tacheam xisamnim Tacher bhavart tthevlo.

¹²Tea uprant, Aplê avoik, bhavank ani xisank sangatak gheun to Kapernauma denvun gelo; punn tim chodd-xe dis thõi ravunk nant.

¹³Judevanchem Pask lagim pavlelem; Jezu Jeruzaleak choddun gelo.

¹⁴Devmondirant boil, xelliô ani parve viktale te, ani aplea veparachea manddar boslele savkar Taka sampoddle.

¹⁵Tannem dorianchi êk soiti keli, ani tankam soglleank, xelliam-boilam soit, Devmondirantle dhanvddaile, savkarancheam nanneancheô raxi xevttun uddoileô ani tanche mandd omtile.

¹⁶Parve vikteleank Tannem mhonn’lem: “Hem sogllem hangasorlem kaddat; ani Mhojea Bapachem ghor tumi veparachem ghor korinakat.”

¹⁷“Tujea ghoracho man rakhchê axen lhasta mhojem kalliz”, oxem Povitr Pustokar boroil’lem asa mhonn Tacheam xisank tedna ugddas ieilo.

¹⁸Judevamnim Taka mhonn’lem: “Oxem korunk Tuka podvi asa mhonn kosli khunna Tujean amkam dakhounk zata?”

¹⁹Tankam portipall korun Jezun mhonn’lem: “Hem Devmondir tumi môddat, ani tin disamnim Hanv tem novean bandun ditam.”

²⁰Judevamnim Taka mhonn’lem: “Hem Devmondir bandunk sovêchallis vorsam laglim ani tin disamnim tem Tum novean bandtoloi?”

²¹Punn To Aplê kuddichea Devmondirachi khobor kortalo.

²²Jedna Devan Jezuk mel’leantlo punorjivont kelo, tedna Tannem oxem mhonnlelem mhonn Tacheam xisank ugddas ieilo; ani Povitr Pustokacher ani Jezun uloil’lea utracher tãnnim bhavart tthevlo.

²³Paska-Porbek To Jeruzaleant astana, Tannem kel’leô khunna polleun puskôll lokan Tacher bhavart dovorlo;

²⁴punn Jezun zalear Aplo visvas tancher tthevunk na,

²⁵kiteak To soglleam mon’xank pok’ko ollkhotalo, konnachêch vixim konnench Taka kitench sangchi goroz nasli; mon’xam bhitôr kitem cholta tem Taka tthavem aslem.