Read Goan Konkani Ju 20 Bible Online

Ju 20 - Goan Konkani bible

Ju 20

¹Satolleachea poilea disa, Mari Magdalen bhov sokallim, ozun kallôk astana, somadhi-xim aili. Tinnem somadhi veli fatôr kaddleli polleli.

²Mhonnun, Simanv Pedru ani Jezu môg kortalo to dusro xis asle thõi vochun, tinnem mhonn’lem: “Somiak soma-dhintlo kaddun vhelo ani Taka khõi ghala tem ami nokllonv.”

³Dekhun Pedru ani dusro xis borabôr bhair sorle ani somadhi-xim vochunk gele.

⁴Te dog-ui dhanvunk lagle, punn to dusro xis Pedru poros vegim dhanvlo ani somadhi-xim poilo pavlo;

⁵ani, voddôv ghalun, tannem zomnir asleleô oli polleleô, punn to bhitôr vochunk na.

⁶Tedna tachê pattlean Simanv Pedru-i pavlo ani somadhint bhitôr gelo; ani, polle zalear, thõi zomnir oli asleô teô tannem polleleô,

⁷ani Tachê tokler ghal’lo to rumal, olim sorxem dovorlolo nhoi, punn kuxin kovoll’lolo.

⁸Tedna somadhi-xim poilo pavlolo to-i xis bhitôr sorlo, ani tannem pollelem ani bhavart dhôrlo.

⁹Povitr Pustoka pormannem To mel’leantlo punorjivont zaunk zai aslo mhonn te ozun nokllo asle.

¹⁰Uprant xis ghora portole.

¹¹Punn Maria somadhi lagim bhair ubi ravun roddtali, ani roddtana voddôv ghalun somadhint polle zalear,

¹²dhovim angavlim nheslele dog devdut tinnem pollele: zõi Jezuchi kudd dovorleli, thõi te bosun asle, eklo toklê vattten ani dusro pãiam vatten.

¹³Hãnnim tika mhonn’lem: “Bai, tum kiteak roddtai?” Tinnem tankam mhonn’lem: “Kiteak mhojea Somiak kaddun vhelo ani Taka khõi ghala to hanv nokllom.”

¹⁴Oxem mhonnlea uprant, pattlean vollon polle zalear, tinnem Jezuk thõi ubo aslo to pollelo. Punn To Jezu mhonn tinnem Taka ollkhunk na.

¹⁵Jezun tika mhonn’lem: “Bai, tum kiteak roddtai? konnak sôdtai tum?” To mali mhonn chintun, tinnem Taka mhonn’lem: “Saiba, tunvem Taka kaddun vhelai zalear, Taka khõi ghalai to mhaka sang, ani hanv Taka kaddun vhortelim.”

¹⁶Jezun tika mhonn’lem: “Mariê!” Tinnem vollon Judeikaranchê bhaxen Taka mhonn’lem: “Rab’buni!” (mhonngê “Guruji!”).

¹⁷Jezun tika mhonn’lem: “Mhaka dhorun ravonaka! Hanv ozun Bapa sorxim choddunk na. Te bodlek mhojeam bhavam-xim vochun tankam oxem sang: ‘Mhojea Bapa ani tumchea Bapa-xim, Mhojea Deva ani tumchea Deva-xim, Hanv choddun vetam. ’ ”

¹⁸Mari Magdalen geli ani apnnem Somiak pollela ani Tannem apnnak oxem-oxem sanglam mhonn tinnem xisank kolloilem.

¹⁹Têch sanjê, mhonngê satolleachea poilea disa, xis zomlole asle thõichim daram Judevanchê bhirantin bond korun dovorlelim; Jezu bhitôr sorlo ani tanchê modem ubo ravlo. Tannem tankam mhonn’lem: “Xanti tumkam!”

²⁰Hem mhonnun, Tannem tankam Aple hat ani Apli kus dakhoilim. Somiak polleun, xis khuxal zale.

²¹Novean Jezun tankam mhonn’lem: “Xanti tumkam! Zoso Bapan Mhaka pattoila, tosoch Hanv tumkam pattoitam.”

²²Oxem uloun, Tannem tancher svas sôddlo ani tankam mhonn’lem: “Povitr Atmo gheiat.

²³Tumi mon’xanchim patkam bhogxixeat zalear, Dev tim tankam bhogxita; ani tumi tim bhogxina zaxeat zalear, Dev tankam tim bhogxicho na.

²⁴Jezu ailo tedna, Baram modlo eklo, Zonvllo mhonnlolo Tomas, tanchê borabôr naslo.

²⁵Hea pasot dusream xisamnim taka mhonn’lem: “Ami Somiak pollela.” Punn tannem tankam mhonn’lem: “Tacheam hatancher hanvem khilleanchi khunna pollelea xivai, ani khilleanchê svater mhojem bott ghalea bogor, ani mhozo hat Tachê kuxint ghalina zain zalear, hanv sotman’cheak na.”

²⁶Atth disam uprant, xis novean ghorant asle, ani tanchê borabôr Tomas. Daram bond astana, Jezu bhitôr ailo, ani tanchê modem ubo ravun Tannem mhonn’lem: “Xanti tumkam!”

²⁷Uprant tannem Tomasak mhonn’lem: “Tujem bott hanga ghal: he polle asat Mhoje hat! Tuzo hat lagim hadd ani Mhojê kuxint ghal! Hea fuddem bhavart-naslolo zaum naka, punn bhavart dhôr.”

²⁸Tomasan Taka zap diun mhonn’lem: “Mhojea Somia ani mhojea Deva!”

²⁹Jezun taka mhonn’lem: “Mhaka polleloi mhonn tunvem bhavart dhôrloi; pollenastana bhavart dhôrtat tim khorench subhagi!”

³⁰Jezun xisam hujir kel’leô anink zaiteô khunna hea pustokar boroun dovrunk nant;

³¹punn Jezu khore-ponnim Krist ani Devacho Put mhonn tumi bhavart dhôrchê khatir ani, bhavart dhorun, Tachea Nanva vorvim tumkam Jivit mellchê pasot, heô vostu boroun dovorleat.[6]