Read Goan Konkani Ju 21 Bible Online

Ju 21 - Goan Konkani bible

Ju 21

¹Tea uprant, Tiberiasachea Doria- xim Jezu novean xisank dixtti poddlo. Hê porim To dixtti poddlo:

²Simanv Pedru, Zonvllo mhonnlolo Tomas, Galileiantlea Kanacho Natanael, Zebedevache put, ani Tacheam xisam modle anink dog ektthãi asle.

³Simanv Pedrun tankam mhonn’lem: “Hanv maslli marunk vetam.” Tãnnim taka mhonn’lem: “Ami-i tujê borabôr ietanv.” Te gele ani hoddeant choddle; punn tê rati tankam kãich mell’lem na.

⁴Sokall zatôch Jezu veller ubo aslo; to Jezu mhonn xisank kollunk na.

⁵Jezun tankam mhonn’lem: “Arê babamnô, maslli kitem tori poddlea mum?” Tãnnim Taka zobab dilo: “Kãich na.”

⁶Tannem tankam sanglem: “Hoddeachê uzvê vatten rampônn ghalat ani tumkam maslli poddteli.” Tãnnim rampônn ghali, ani maslli ekdom’ chôdd poddli dekhun, tanchean rampônn oddunk zaina zali.

⁷Jezu môg kori tea xisan Pedruk mhonn’lem: “To Somi!” To Somi mhonn aikun, Simanv Pedrun aplem voilem anglem penkttak bandlem (kiteak to sarko nheslolo naslo) ani doriant uddki marli.

⁸Punn ier xis hoddear bosun ani masllen bhòrloli rampônn oddit-oddit aile; te toddik laginch asle, sumar deddxem hat bhair.

⁹Toddir pavle tedna, tãnnim thõi kollxeanchea ujear dovorloli maslli ani unnddo dekhlim.

¹⁰Jezun tankam mhonn’lem: “Tumi atam dhôrlea tantli maslli hanga haddat.”

¹¹Hoddear choddun Simanv Pedrun rampônn toddir oddun haddli. Ti ekxem trepon’n vhoddleam maslliamnim bhòrleli asli; ani itleô maslleô astanam-i, rampônn pinzunk na.

¹²Jezun tankam mhonn’lem: “Nasteak ieiat.” Tum konn kai mhonn vicharunk nasteak bosleleantlea konnakuch kalliz zaunk na; To Somi mhonn te zanno asle.

¹³Tedna Jezun fuddem sorun unddo ghetlo ani tankam dilo; toxench maslli-i dili.

¹⁴Mel’leantlo punorjivont zalea uprant Jezu xisank dixtti poddlo ti hi tisri pavtt.

¹⁵Nasto zatôch Jezun Simanv Pedruk mhonn’lem: “Ximanv, Juanvachea puta, hanchê poros odik Mhozo môg kortai mum tum?” Tannem Taka mhonn’lem: “Hôi, Somia, hanv Tuzo môg kortam mhonn Tum zannoi!” Jezun taka mhonn’lem: “Mhojeam menddrank chorvak vhor.”

¹⁶Dusrê pavtti Tannem taka vicharlem: “Simanv, Juanvachea puta, Tum mhozo môg kortai?” Tannem Taka zobab dilo: “Hôi, Somia, hanv Tuzo môg kortam mhonn Tum zannoi.” Jezun mhonn’lem: “Mhojeam xelliank rakh.”

¹⁷Tannem taka tisrê pavtti vicharlem: “Simanv, Suanvachea puta, Mhozo môg kortai mum tum?” ‘Mhozo môg kortai mum tum?’, oxem apnnak tisrê pavtt vicharlem dekhun Pedruk khônt zali, ani tannem oso portipall kelo: “Somia, Tum sogllem zannoi; hanv Tuzo môg kortam mhonn Tum zannoi.” Jezun taka mhonn’lem: “Mhojeam xelliank chorvak vhor.

¹⁸Khorench khorem Hanv tuka sangtam: tum lhan asloi tedna, tujea penkttak bandtaloi ani tuka zai thõi tum vetaloi; punn tum mhataro zatôch, tuje hat vistartoloi ani dusro konn tujea penkttak bandtolo ani tuka naka thõi tuka gheun vetolo.”

¹⁹Koslea mornna vorvim to Devak mhoima diuncho aslo tem dakhounk, Jezun toxem mhonn’lem. Tea uprant mhonn’lem: “Mhojê pattlean ie.”

²⁰Pedru voll’lo ani Jezucho mogacho xis apnna pattlean ieto tannem pollelo; heach xisan, ratchea jevnnar Jezuchea horddeak tenkun, Taka mhonnlelem: “Somia, Tuzo ghat ghetolo to konn?”

²¹Taka pollelo tedna, Pedrun Jezuk mhonn’lem: “Somia, hachem kitem?”

²²Jezun taka mhonn’lem: “Hanv ie-sôr to ravlolo Mhaka zai zalear, tuka kiteak poddlam? Tum Mhojê pattlean ie.”

²³Ho xis morcho na mhonn bhavam-bhoinnim modem khobor zali; punn “to morcho na”, oxem Jezun Pedruk mhonnunk na, punn “Hanv ie-sôr to ravlolo Mhaka zai zalear, tuka kiteak poddlam?”

²⁴Hoch xis heam vostunchi govai dita: tannench heô vostu boroun dovorleat; ani tachi govaiki khori mhonn ami zannonv.

²⁵Jezun kel’leô anink-ui zaiteô vostu asat; teô soglleô ekan-êk boroun dovorleleô zalear, borounk poddtelim aslim tim pustokam dovrunk sonvsar legun pavcho naslo mhonn mhaka dista.