Read Goan Konkani Ju 3 Bible Online

Ju 3 - Goan Konkani bible

Ju 3

¹Nikodem’ nanvacho, Farizevanchea pokxantlo, Judevanchê Mha-Dhormsobhecho vangddi, konn-eklo monis aslo,

²To ekdam ratcho Jezu-xim ailo. Tannem Jezuk mhonn’lem: “Rab’bi (mhonngê ‘Guruji’), Tum Deva koddsun ail’lo xastri mhonn ami zannonv, kiteak apnna sovem Dev na zalear, Tum kortai tosleô khunna konnuch korunk xokona.”

³Jezun taka portipall kelo; “Khorench khorem Hanv tuka sangtam: novean zolmolea bogor, konnachean Devachem raj polleunk zaina.”

⁴Nikodeman Taka mhonn’lem: “Mhataro zal’lo monis koso mhonn zolmotolo? Tachean anink êk pavtt aplê avoichea kusveant bhitôr sorunk ani zolmunk zait?”

⁵Jezun portipall kelo: “Khorench khorem Hanv tuka sangtam: udka ani Atmea thaun zolmolea xivai, konnuch Devachea Rajeant bhitôr sorunk xokona.

⁶Mon’xa thaun zolmotat tim mon’xa-soimbachim, ani Atmea thaun zolmotat tim Atmeachea soimbachim.

⁷Tumi novean zolmunk zai, oxem Hanvem tuka mhonn’lam dekhun, tum ojap zaum naka.

⁸Varem apnnak zai thõi marta, ani tum tacho avaz aikotai, punn tem khõi thaun ieta vô khõi veta tem tum noklloi; jim konn Atmea thaun zolmoleant tanchê sovem toxench ghòddta.”

⁹Nikodeman Taka porot mhonn’lem: “Hem koxem zaunk xokta?”

¹⁰Jezun taka zobab dilo: “Tum Israel-porjecho xastri ani tori tum hem noklloi?

¹¹Khoreponninch Hanv tuka sangtam: ami zannonv tem uloitanv, ani ami dekhlam tachi sakxi ditanv, punn tumi amchi sakxi manun ghenant.

¹²Tumkam sonvsaracheam vostunchi khobor sangtam tedna tumi sotmaninant; sorgincheam vostunchi khobor sangin tôr, tumi ti koxi sotman’telet?

¹³Sorgar thaun denvlelea Mon’xachea Puta bogor konnuch sorgar choddunk na.

¹⁴Zoso Moizesan oroneant sorôp ubarlo, tosoch Dev Mon’xachea Putak ubartolo: oxem Putacher bhavart tthevteleam somestank sasnnik jivit astelem.

¹⁶Khorench, Tacher bhavart tthevta tea dôr-eka mon’xacho nas zaina zaunk punn taka Sasnnik Jivit mellchê khatir, Devan Aplea ekleach Putak dilo: itlo Tannem sonvsaracho môg kelo!.

¹⁷Kiteak sonvsaracher khastichem formonn marunk nhoi, punn Puta vorvim sonvsarachem taronn zaunchê khatir Devan Taka sonvsarant dhaddlo.

¹⁸Jim konn Tacher bhavart tthevtat tankam khastichem formonn na; punn jim konn Tacher bhavart tthevinant, tancher khastichem formonn poddlelem asa, kiteak tãnnim Devachea ekleach Putacher bhavart dovrunk na.

¹⁹Ani hoch to nivaddo: sonvsarant uzvadd ailo, punn mon’xamnim Uzvadda poros kallokacho odik môg kelo, kiteak tanchim kortubam noxttim aslim.

²⁰Khorench, khotteponn kortat tim uzvaddak kanttalltat ani aplim kortubam koslim tim kollon iena zaunk uzvaddak ienant.

²¹Punn sota pormannem choltat tim, apleô kornneo Devache khuxê pormannem keleat mhonn ugddapim kollon ieunchê khatir, uzvaddak ietat.”

²²Uprant Jezu ani Tache xis Judeiachea prantant gele; thõi To tanchea sangata ravlo ani batism ditalo.

²³Salima lagim, Aenonant, thõi udok chodd dekhun, Juanv-ui batism ditalo; ani lôk thõi vetalo ani batism ghetalo.

²⁴Juanvak ozun bondkhonnint ghalunk naslo.

²⁵Ekdam Juanvacheam kãi xisamnim eka Judeva lagim xud’dhi vixim vivad suru kelo.

²⁶Ani Juanva-xim ieun tãnnim mhonn’lem: “Rab’bi (mhonngê ‘Guruji’) Jordana poltoddi zo tujea sangata aslo ani zachê vixim tunvem govai dilii, to polle apunn-ui batism dita ani sogllo lôk tachê-xim veta.”

²⁷Juanvan zap diun mhonn’lem: “Devan dilea xivai konnak kãich mellona.

²⁸‘Hanv Krist nhoi, punn Tachê mukhar vochunk Devan mhaka dhaddla, ’ oxem hanvem sanglam mhonn tumich mhojê vixim govaiki ditat.

²⁹Hokol mhonn’lear novreachi; taka lagim aslolo novreacho ixtt, novreacho tallo aikun, vhoddê khuxalkaien murgott’ta. Hich mhoji khuxalkai; ti atam bhoron ailea.

³⁰To vaddot vochunk zai, punn hanv zalear odik-odik lhan zaunk zai.”

³¹Voir thaun ieta To soglleam-von vorto. Prithumentlim upzotat tim prithumechim, ani tanchem ulovnnem prithumechem. Sorgar thaun ieta To soglleam-von vorto.

³²Apnnem dekhlam ani aikolam tachi To sakxi dita, toripunn konn Tachi sakxi mandun ghena;

³³Tachi sakxi mandun ghetat tim Dev sotevont mhonn ruzu kortat,

³⁴kiteak zaka Devan pattoila, To Devachim utram uloita: Dev Taka map-mezop nastana Atmo dita.

³⁵Bap Putacho môg korta ani Tannem soglleô vostu Tachea hatant dileat.

³⁶Putacher bhavart dovortat tanchê sovem sasnnik jivit asa; Putak khaltim zaunk kobul nant tankam jivit mellchem na, punn Devacho krôdh tanchea mathear asa.