Read Goan Konkani Ju 4 Bible Online

Ju 4 - Goan Konkani bible

Ju 4

¹Apunn Juanva poros odik chodd xis korta, ani tankam batism dita, oxem Farizevanchea kanar poddlam mhonn Jezuk gomun ailem.

²(Khorem mhonn’lear, Jezu Apunn batism dinaslo, punn batism ditale te Tache xis.)

³Tedna To Judeiantlo bhair sorlo ani portun Galileiant gelo.

⁴Taka Samarientlean vechem poddtalem.

⁵Sikar nanvachea Samariechea eka nogrant To pavlo; Jakoban aplea puta Juzek dil’lea xeta laginch hem nogor aslem.

⁶Jakobachi bãi thõi asli, ani Jezu, cholun-cholun thoklolo dekhun, bãichea kanttar boslo. Sumar donpar zal’lo.

⁷Samariechi êk bail udok kaddunk thõi aili. Jezun tika mhonn’lem: “Mhaka ilem pieunk dixi?”

⁸Tache xis jevnnak kitem-i gheunk mhonn nogrant gel’le.

⁹Samariechê bailen Taka mhonn’lem: “Tum Judêv ani hanv Samariekarnn, tôr koso mhonn tum mhojê kodde pieunk magtai?” Khorem mhonn’lear, Judêv lôk ani Samariekar lôk ekamekachim aidonam vaprinant.

¹⁰Jezun tika portipall kelo: “Devachem dennem koslem tem tuka tôr gomlelem ani ‘Mhaka ilem pieunk dixi?, ’ oxem tuka mhonnta To konn to tum zanno aslii zalear, tunch Tachê kodde magto aslii ani To tuka jivem udok dito aslo.”

¹¹Bailen Taka mhonn’lem: “Saiba, udok kaddunk tujê lagim xidi kãi na, ani bãi khôl asa; tôr tujê kodde jivem udok khõichem?

¹²Amchea purvoza Jakoba poros tum vhôdd kitem? Tannem amkam hi bãi dili, apunn tichem udok pielo, toxench tachim bhurgim-ballam ani tache hindd.”

¹³Jezun tika mhonn’lem: “Hem udok pietat tankam soglleank portun tan lagteli,

¹⁴punn Hanv diin tem udok pietit tankam kodinch tan lagchi na Hanv tankam diin tea udkachi tanchê bhitôr êk zhôr zateli ani ti tankam Sasnnik Jivit diit vhanvteli.”

¹⁵Bailen Taka mhonn’lem: “Saiba, tem udok mhaka di, oxi mhaka anink tan lagchi na ani udok kaddunk hanga ieunk-ui poddchem na.”

¹⁶Jezun tika mhonn’lem: “Voch, tujea ghovak apoun hadd ani hanga ie.”

¹⁷Bailen zap dili: “Mhaka ghôv na.” Jezun tika portun mhonn’lem: “ ‘Mhaka ghôv na, ’ hem tunvem sarkem sangli,

¹⁸‘kiteak tuka panch asle ani tujea sangata atam asa to-i tuzo ghôv nhoi; hem tunvem sarkem sangli. ’ ”

¹⁹Bailen Taka mhonn’lem: “Saiba, Tum provadi mhonn mhaka koll’lem.

²⁰Amcheam purvozamnim hea dongrar Devak bhôzlo, punn tumi Taka Jeruzaleantuch bhozunk zai mhonn sangtat.”

²¹Jezun tika mhonn’lem: “Mhojem aik, bai: tumi hea dongrar zaum vô Jeruzaleant zaum Bapak bhôzchim nant oslo vêll ieuncho zalo.

²²Tumi ollkhonant Taka bhôztat; ami zalear ollkhotanv Taka bhôztanv, kiteak taronn Judêv loka thaun ieta.

²³Punn oslo vêll ieta, khorench mhonn’lear ho vêll pavlo, ki khore bhôzpi atmean ani sotan Bapachi bhokti kortele, kiteak mhollear oslech bhôzpi Bap sôdta.

²⁴Dev Atmo, ani Tacheam bhôzpiamnim Taka atmean ani sotan bhozunk zai.”

²⁵Bailen Taka mhonn’lem: “Mesias - mhonngê Krist - ieuncho zalo mhonn hanv zanno. To ietolo tedna amkam sogllem sangtolo.”

²⁶Jezun tika mhonn’lem: “Hanvuch to, tujê kodde uloitam to.”

²⁷Teach vellar Tache xis thõi pavle. Ani êkê bailê lagim To uloita mhonn tankam ojap dislem, punn “tichem Tuka kitem zai?” vô “tichê kodde Tum kiteak uloitai?” oxem konnench vicharunk na.

²⁸Tedna ti bail udkacho kollso thõich sanddun nogrant geli ani lokak mhonnunk lagli: “Hanvem kelam titlem-i konn-eklean mhaka sanglam;

²⁹ieiat ani taka polleiat; hoch Krist zait kai?”

³⁰To lôk nograntlo bhair sorun Taka mellunk ailo.

³¹Itlea mhonnosôr xis Tachê kodde magtale: “Rab’bi, jêv atam.”

³²Punn Tannem tankam mhonn’lem: “Mhaka jem khann-jevonn asa, tanchi tumkam ollokh na.”

³³Dekhun xis ekamekak mhonnunk lagle: “Taka konnem jevunk haddun dilam kai?”

³⁴Jezun tankam mhonn’lem: “Zannem Mhaka pattoila Tachi khuxi korunk ani Tachem kam’ sompadunk, hench Mhojem jevonn-khann.

³⁵‘Char mhoine, uprant lunvnni’, oxi tumchê modem mhonn’nni asa nhoi? Hanv tumkam sangtam: tumche dolle uklun polleiat, xetam zalim dhovim, lunvchim zalim!

³⁶Lunvtat tim apli mozuri ghetat ani sasnnik jivitak pik ektthãi kortat ani oxe vomp’pi ani lunvpi borabôr sontostat.

³⁷Hanga hi mhonn’nni lagta: ‘eklo vompta, dusro lunvta’:

³⁸jea xetache koxtt tumi kaddunk nant, tea xetant tumkam Hanvem lunvunk dhaddleat; dusreamnim tache koxtt kaddleat, ani tancheam koxttanchea follant tumkam bhag mell’lam.”

³⁹“Hanvem kelam titlem-i tannem mhaka sanglam,” oxi tê bailen govai dil’li dekhun, tea nograntleam puskoll Samariekaramnim Tacher bhavart dovorlo.

⁴⁰Hea pasot, Samariekaram Tachê-xim ailim tedna, apnnam-xim rav mhonn tãnnim Tachê kodde maglem; ani thõi To don dis ravlo.

⁴¹Ani Tachea utrak lagun anink khup-khup zannamnim Tacher bhavart tthevlo.

⁴²Tim bailek mhonntalim: “Atam anink tujeam utrank lagun nhoi, punn aminch Taka aikola dekhun ami bhavart dhôrtanv, ani To khoroch sonvsaracho Tarôk mhonn amkam kollon ailam.”

⁴³Thõi don dis ravlea uprant, Jezu Galileiak gelo.

⁴⁴“Khõicheach provadeak aplea ganv-ghora man mellona”, oxi Jezunuch govaiki dil’li.

⁴⁵Galileiantlo lôk Porbek gel’lo; Jeruzaleant Porbechea somoiar Jezun kel’lem tem sogllem tãnnim dekhlem; dekhun, To Galileiant ailo tedna, tãnnim Taka boro ievkar diun ghetlo.

⁴⁶Mhonntôch Tannem udkacho soro kel’lo tea Galileiachea Kana ganvant anink êk pavtt To ailo. Ani Kapernau-nt eka raj-odhikareacho put piddent aslo.

⁴⁷Jezu Judeiak thaun Galileiant pavla mhonn aikun, to Taka mellunk gelo. Mornnachê tonnir pavlelea aplea putak boro korunk ie mhonn to Jezu lagim magtalo.

⁴⁸Jezun taka mhonn’lem: “Khunna ani vismitam dekhlea xivai tumi bhavart dhôrpak nant.”

⁴⁹Raj-odhikarean Taka mhonn’lem: “Saiba, mhozo bhurgo morchê adim ie”.

⁵⁰Jezun taka mhonn’lem: “Voch tum, tuzo put jivo asa.” Jezuchea utracher bhavart dovrun to monis aplê vattek laglo.

⁵¹To vatter astananch, tache chakor taka mellunk aile, ani tacho put jivo asa mhonn tãnnim taka sanglem.

⁵²Hea pasot, khõichea vogtar taka borem dislem kai mhonn tannem tankam vicharlem. Tãnnim taka sanglem: “Kal, donparchea eka voracher tacho zôr gelo.”

⁵³Jea vellar Jezun apnnak “tuzo put jivo asa”, oxem mhonnlelem, teach vellar hem ghòddlem mhonn bapaik gomun ailem; hea khatir tannem ani tachea akhea ghorabean Jezucher bhavart tthevlo.

⁵⁴Judeiantlo Galileiant portun ietôch hi Jezun kel’li dusri khunna.